Hebreos 4 - Qheshwa Biblia DC

¹ Manchachikuna ari, Diospa samakuyninman yaykuna kashajtintaj, qankunamanta pillapis mana yaykunmanchu.

² Paykunaman jina, noqanchejman evangeliota willawarqanchej; chaywampis, uyarisqankoqa paykunapaj mana allimpajchu karqa, mana feniyoj uyarisqankurayku.

³ Noqanchej creejkunaqa samakuyninman yaykunchej, nisqanman jina. Chayrayku anchata phiñakuspa jurarqani, mana samakuyniyman yaykonqankuchu, nispa. Chaykama, Diospa ruwasqasnenqa tukusqasña karqanku, kay mundota ruwasqanmantapacha.

⁴ Qanchis kaj p'unchaymantaqa, wajnejpi nerqa: Diosqa qanchis kaj p'unchaypitaj tukuy ruwasqasninmanta samarikorqa.

⁵ Ujtawan kaynejpi nillarqataj: Samakuyniyman mana yaykonqankuchu, nispa.

⁶ Wakenqa samakuyninman yaykunankuraj tiyan; chay ñaupajta allin willanasta uyarejkunaqa, mana yaykorqankuchu, mana kasuyta munasqankurayku.

⁷ Watejmanta uj p'unchayta churallantaj kunan, nispa: Davidnejta chay chhika unaymanta, imaynachus patapi nisqaña kashan, ajinata: Kunan p'unchaychus parlasqanta uyariwajchej chayqa, ama sonqoykichejta rumiyachiychejchu, nispa.

⁸ Josuechus paykunaman samakuyta qonman karqa chayqa, mana chay qhepataña, waj p'unchaymanta parlanmanchu karqa.

⁹ Chayrayku, Diospa ayllumpaj uj samakuy kanrajpuni.

¹⁰ Pichus samakuyninman yaykorqa chayqa, ruwasqasninmanta imaynatachus Diospis samakunña, ajinata.

¹¹ Kallpachakuna ari jaqay samakuyman yaykunapaj; amataj pipis paykuna jina, chay mana kasukuy juchaman urmanampaj.

¹² Diospa palabranqa kausayniyoj, atiyniyojtaj; khuchuytataj atin astawan iskay filoyoj espadamanta nisqaqa; yaykuntaj ukhukama, almata, espirituta, ankusta, chilenatapis p'itinankama; allintataj rejsin sonqoj yuyasqasninta, munasqasnintapis.

¹³ Tukuy ruwasqa kajqa, paypa ñaupaqempi, mana pakasqa kayta atinchu; astawanqa, tukuy imapis sut'i, rikusqastaj kanku paypa ñawisnimpaj, paymantaj kausayninchejmanta willakunanchej tiyan.

Jesusqa kuraj sacerdote

¹⁴ Chayrayku, kuraj sacerdoteyoj kaspa, pichus janaj pachaman yaykorqa; Jesús, Diospa Churimpi creesqanchejpi allinta sayananchej tiyan.

¹⁵ Uj kuraj sacerdote tiyapuwanchej, pichus onqoykunasninchejmanta khuyakuyta atiwanchej. Payqa tukuy imapi tentasqa karqa noqanchej jina; manataj payqa jayk'ajpis juchallikojchu.

¹⁶ Mana manchachikuspa ari, yanapaynimpaj tiyakunanman qayllaykuna, khuyakuyninta jap'inanchejpaj, yanapayninta tarinanchejpajtaj maychus tiempompi.