Hebreos 1 - Qheshwa Biblia DC

Dios parlan Churinnejta

¹ Ñaupa p'unchaykunapi, ashkha kutita tukuy imaymanamanta, Dios parlamorqa ñaupa tatasninchejman profetasnejta.

² Kay qhepa p'unchaykunapitaj Churinnejta parlamuwarqanchej; paytataj churarqa tukuy imamanta chayaqeyoj kanampaj; paynejtataj tukuy mundontinta ruwarqa.

³ Paytaj Diospa k'anchaynimpa lliphipiynin kaspa, Dios kaynimpa kikin rijch'aynintaj, tukuy imata palabrampa atiyninwan sayachin, pay kikintaj juchasninchejta pichaspa, jatun kajpa pañanman janaj pachapi tiyaykukorqa.

Diospa Churenqa angelesmanta nisqaqa aswan kuraj

⁴ Angelesmanta astawan sumaj kaspa, paykunamanta nisqaqa, aswan jatun sutitaraj chayaqepaj jap'erqa.

⁵ Ajina kajtenqa, mayqen angelesmantaj Dios jayk'ajpis nerqa: Qan Churiy kanki. Kunan p'unchay yumarqayki, nispa? Ujtawan nillarqataj: Noqa paypa tatan kasaj, paytaj churiy kanqa, nispa.

⁶ Ujtawan ñaupaj kaj Churinta kay mundoman pusaykamushaspa nerqa: Diospa tukuy angelesnin payta yupaychachunku.

⁷ Cheqamanta Dios angelesninmantaqa nerqa: Pichus angelesninta espiritusta ruwan, kamachisnintapis nina larwaykunata jina.

⁸ Payllataj Churimanta nin: Tiyakunaykeqa Diosníy, wiñaypaj wiñaynintinkama; reinoykej taunanqa, cheqan kaj taunamin.

⁹ Cheqan kajta munakorqanki, sajra kajtataj chejnerqanki. Chayrayku Dios, qampa Diosniyki, kusiy aceitewan jawisorqa, astawanraj kausaqesniykimanta nisqaqa.

¹⁰ Ajinallatataj nerqa: Qanmin, Señorníy, qallariypeqa jallp'ata ruwarqanki; janajkunapi kajkunapis makisniykej ruwasqallantaj.

¹¹ Chaykunaqa tukukonqanku. Qanrí kallankipuni. Tukuyninkutaj p'acha jina mauk'ayanqanku.

¹² P'acha jinataj paykunata mayt'uykukunki, paykunataj uj jinayanqanku. Qanrí kikillampuni kanki, watasniykipis mana tukukuyniyoj.

¹³ Chantá, mayqen angelmantaj jayk'ajpis nerqa: Pañayman tiyaykukuy, chejnisojkunatataj chakisniyki uraman churanaykama, nispa?

¹⁴ Manachu tukuynin espíritus kamachis kanku, Diospa kachamusqasnin, salvacionta chayaqepaj jap'ejkunata yanapanankupaj?