Habacuc 2 - Qheshwa Biblia DC

Habacucman Señorpa sut'inchasqan

¹ Allinta qhawasaj, imaynatachus uj jark'asiri sayanampi qhawashan jinata, rikunaypaj, Señor imatachus niwasqanta pay kutichiwaspa chay willakusqasniyman jina.

² Señor kutichiwarqa: Qelqay t'uru k'anallaspi imastachus rikuchisqayki chayta, jinamanta sumajta leenankupaj.

³ Chaywampis manaraj chayamunchu rikusqayniykiman jina junt'akunanqa, chaywampis mana junt'akuspaqa mana qhepakonqachu. Qhaparejmanña rijch'asunki chaypis suyarillay, chaypaj junt'akunan tiempoqa chayamullanqa.

⁴ Kay jinatamin qelqanayki kashan: Sajrata ruwajkunaqa mayta runaykachanku. Chaywampis cheqan runasqa Diospi creesqankurayku kausanqanku.

Sajra ruwajkunapaj ima llakiy kanqa

⁵ Mayta runaykachaj runasqa, patapipuni kayta munanku; mask'ankutaj mana samayta astawan astawan munaspa, imaraykuchus patapi kayqa wasanchakojlla. Simisninkuta aya p'ampanasta jina kicharinku. Wañuy jina mana sajsakuyta atinkuchu. Chayrayku nacionesman ujmantaj ujmantaj phinkiykunku jap'iranankupaj.

⁶ Chaywampis, chay tukuy jap'isqasninku naciones asikuspa kay jinata takiykapunku: Ay, qanmanta, mana qampata kajllawan qhapajyaykunki! Mayk'ajkamataj tantanki chay mañarakuspa tantarqanki chay qhapaj kayniykita?

⁷ Qonqaymanta jinalla chayamonqanku qanman chay manusojkuna manusninkuta mat'isojkunapis, q'arallatataj saqerpayasonqanku.

⁸ Contraykipi naciones tantaykukuspa tukuy kapuyniykita qhechusonqanku, imaynatachus qampis paykunamanta qhechorqanki jinata. Chaypacha pagachisonqanku; wañurachisqaykimanta, millay ruwaykunasta ruwasqaykimantataj chay jallp'ankupi, llajtasninkupi tiyakojkunaswantaj.

⁹ Ay qanmantaqa, wasiykiman suwasqa poqoykunasllawan junt'acherqanki, ama ima llakiykunasman urmanaykipaj!

¹⁰ Jinamanta wasiykej p'enqayninta junt'aykuspa, chay chhika nacionesta tukuchispaqa, qan kikiyta tukuchikuspa jinarqanki.

¹¹ Kunanqa, perqasmanta rumis, wasi lomo k'aspipis contraykipi qhaparenqanku.

¹² Ay, qanmanta, llajtasniykita jatarichishanki jucha ukhupi, jinataj sajra ruwaykunasllawan!

¹³ Tukuy Atiyniyoj Señormin, chay may sayk'uy sayk'uywan chay tukuy ruwasqasniyki qhasipaj kananta nenqa, imaraykuchus tukuy ruwasqasniyki ninawan q'ala ruphachisqas kanqanku.

¹⁴ Chaypachataj, Señor gloriayoj kasqanmanta yachayqa tukuy jallp'antinman junt'anqa, imaynatachus mama qochaman yaku junt'aykun jinata.

¹⁵ Ay qanmantaqa, imaraykuchus qayllaykipi wasiyojkunataqa jampiswan chajrusqa vinoswan machaykuchinki ima p'enqayta q'aralla puñusqasninkuta qhawakunaykirayku!

¹⁶ Kunantaj honorniyoj kanaykitaqa, may p'enqaypi rikhurinki, imaraykuchus Señor qosonqa uj ujyanata, chaytaj rikuchisonqa mana circuncidasqa kasqaykita kay may uyarisqa kasqaykitaj pampaman k'umuykaponqa.

¹⁷ Líbano orqopi chay millay ruwasqasniykeqa contrallaykipitaj kutimonqanku, mancharikunkitaj chay uywasta wañuchisqasninkuwan. Chaytaj jamusonqa chay runasta wañurachisqaykirayku chay jallp'api, llajtasninkupi tiyakojkunaswantaj millay ruwaykunasta ruwasqaykirayku.

¹⁸ Imamanta sirvin rumi lanteqa, maypachachus ruwajqa ruwayta tukunña chaypachaqa? Imamantataj sirvin uj lanti llulla yachakuykunasllata yachachin chaypachaqa? Chay lantikunaqa mana atinkuchu parlayta; chayrayku imaynatataj pichus chaykunata ruwaj runaqa paykunapi confiakunmanri?

¹⁹ Ay!, qanmanta, imaraykuchus k'aspimanta lantista rijch'ariy ninkichej, mana parlaj rumistataj sayarikuy ninkichej. Chaykunaqa imamantapis willaykuyta atiwasunmanchu? Mana, imaraykuchus mana kausayniyojchu kanku qoriwan chayri qolqewan qhatasqas kaspapis.

²⁰ Chaywampis, Señorqa llimphu yupaychana wasimpi kashan: Chayrayku tukuy jallp'a ñaupaqempi ch'inlla kakuchun!