Génesis 8 - Qheshwa Biblia DC

Jatun muspha paraj tukukuynin

¹ Dios yuyarikorqa Noemanta, paywan khuska tukuy animales arcapi kajkunamantawan. Chaymanta wayrachimorqa, chaytaj yakuta ch'akiykucherqa.

² Yuyay chinkay ukhu qochataj manaña phullchimorqachu, jinallataj janaj pachamanta t'ojyaspa phullchimoj yakupis. Parapis thañiporqa.

³ Yakoqa pisimanta pisi ch'akikaporqa. Pachaj phishqa chunkayoj diamanta astawan yakoqa ch'akiykorqa.

⁴ Chunka qanchisniyoj p'unchaypi, qanchis kaj killapi arcaqa tiyaykorqa Ararat nisqa orqo pataman.

⁵ Yakoqa astawanñapuni ch'akiykusharqa. Chunka kaj killaj ñaupaj kaj diampi ñapis rikukorqankuña aswan alto kaj orqospa puntasnin.

⁶ Tawa chunka p'unchaymanta, Noeqa arca ruwasqan ventananta kicharikamorqa.

⁷ Kacharerqataj jatun yana q'arqañata. Chaytaj kayman jaqayman phawaykacharqa ch'aki jallp'ata mask'aspa, nitaj ni mayman tiyaykuyta atispa kutimpullarqataj.

⁸ Chayta Noeqa uj palomantañataj kacharerqa jallp'a rikhurinñachus manarajchus chayta yachanampaj.

⁹ Palomaqa kutirimpullarqataj arcaman; imaraykuchus manarajpuni jallp'ata tarerqachu chayman tiyaykunampaj, jallp'aqa yakuwan p'ampasqallaraj karqa. Noetaj makinta jaywarqorqa ventanamanta, palomataj makinman tiyaykorqa, paytaj arca ukhuman apaykorqa.

¹⁰ Noeqa suyakorqa qanchis diatawan, chaymanta ujtawan phawachillarqataj palomata.

¹¹ Palomataj ña chharpuykushajtinña Noeman kutimporqa, uj q'omer olivo laqhe achurisqa. Ajinamanta Noeqa yacharqa yakoqa ch'akiykushasqantaña.

¹² Chaymanta qanchis diatawanraj suyallarqataj. Chaymantaraj palomata ujtawan phawachillarqataj, palomari manaña chay kutipi Noeman kutimporqachu.

¹³ Chaypacha Noeqa sojta pachaj ujniyoj watasniyojña karqa, yakutaj tukuynin ch'akiykaporqa. Chaypacha karqa ñaupaj kaj día ñaupaj kaj killapi. Noeqa arcaj patanta qhatararqa; qhawarejtintaj jallp'aqa ch'akiña karqa.

¹⁴ Iskay chunka qanchisniyoj diapi iskay kaj killapi jallp'aqa sumaj ch'akiñapuni karqa.

^15-16 Chaymanta Dios nerqa Noeman: Arcamanta llojsillayña, warmiykiwan, wawasniykiwan, qhachunisniykiwan ima.

¹⁷ Jinallataj qanwan khuska kaj animalestapis jawaman kicharillayña: P'isqosta, uywasta, pampata qhatatakojkunata ima; jallp'aman tukuynejman rispa miranankupaj, kay mundoman junt'anankukama, nispa.

¹⁸ Chaymanta Noeqa llojserqa arcamanta warminwan, wawasninwan, qhachunisninwan ima.

¹⁹ Jinallataj llojserqanku tukuy uywas, monte animales, pampata qhatatakojkuna, tukuy lijrayoj animales ima.

²⁰ Noetaj uj altarta Señorpaj ruwarqa, chaypitaj Diospaj uj rikuchikuta ruphacherqa, mikhuna uywasta, phawajkunata ima sapa ujmanta ujtakama ajllaspa.

²¹ Chay q'apaytaj Diospaj may sumajpuni karqa munasqanman jina, nerqataj sonqompi: Kunanqa manaña jallp'ata jasut'isajchu runaj juchanrayku. Imaraykuchus runaqa waynamantapacha mana allin kajllatachu yuyan. Nillataj kausajkunatapis tukuchisajchu kunampi jina.

²² Jallp'a kanankama kallanqapuni chajras, cosechas; kallanqataj q'oñi, chiri, q'omer tiempo, chirawi tiempo; chantaqa p'unchay, tutapis.