Génesis 7 - Qheshwa Biblia DC

Jatun musphay para

¹ Señorqa Noeman nerqa: Arcaman yaykuy tukuy aylluykiwan; imaraykuchus qanlla allinta purinki ñaupaqeypi tukuy kay tiempo runasmanta nisqaqa.

² Tukuy llimphupaj qhawasqa uywasmanta churay qanchis china orqosta. Mana llimphupaj qhawasqa kajkunamantarí uj china orqollata churanki.

³ Jinallataj phawaykachajkunamantapis qanchis china orqostakama, sapa layamanta, jallp'a patamanta ama chinkanankupaj.

⁴ Noqataj qanchis p'unchaymantawan parachimusaj, tawa chunka p'unchayta tawa chunka tutatawan. Jallp'a patamanta chinkachisaj tukuy kausajkuna ruwasqasniyta.

⁵ Noetaj Señorpa tukuy kamachisqanta ruwarqa.

⁶ Noeqa karqa sojta pachaj watasniyoj yaku kay mundota p'ampaykushajtin.

⁷ Noetaj arcaman yaykuporqa wawasninwan, warminwan, qhachunisninwan ima, jatun musphay paramanta pakakunankupaj.

^8-9 Jinallataj mikhuna kaj animales, mana mikhuna kaj animalespis, p'isqos, jallp'a patata qhatatakojkuna ima, Noewan khuska china orqo, iskay iskaymanta arcaman yaykorqanku, Dios Noeman nisqanman jina.

¹⁰ Qanchis dianmantaj yakoqa jallp'ata p'ampayta qallarerqa.

¹¹ Chaypacha karqa chunka qanchisniyoj día iskay kaj killapi. Noetaj karqa sojta pachaj watasniyoj. Chay diapipuni yuyay chinkay ukhu pacha qocha t'ojyamorqa, jinallataj janaj pachapi kaj yakupis t'ojyamuspa musphayta jich'akamorqa.

¹² Jallp'a patata paraqa tawa chunka p'unchayta, tawa chunka tutatawan pararqa.

¹³ Kikin chay p'unchaypi Noé arcaman yaykorqa wawasninwan Sem, Cam, Jafetwan; jinallataj warminwan, kinsantin qhachunisninwan ima.

¹⁴ Paykunawan khuska yaykorqanku tukuy laya monte animales, layankuman jina, uywas, qhatatakoj animales, tukuy laya p'isqos ima.

¹⁵ Tukuy laya animales arcaman yaykorqanku Noewan khuska iskay iskaymanta, tukuy kausayniyoj kajkuna.

¹⁶ Sapa laya animales china orqo yaykorqanku, Noeman Dios kamachisqanman jina. Chaymantataj Señorqa arcaj punkunta wisq'aykorqa.

¹⁷ Jatun musphay parataj jich'akorqa tawa chunka p'unchaykunata. Yakustaj manchayta llump'irispa oqharikorqanku; arcatataj pampamanta tuytucherqapacha.

¹⁸ Yakoqa uj ima jina kay mundoman junt'aykusharqa, arcataj yakus patapi tuytorqa.

¹⁹ Yakoqa manchayta wicharispa tukuy jallp'ata p'ampaykorqa, kay mundopi aswan jatun kaj orqosnintinta.

²⁰ Chay orqosta p'ampaykuytawan yakoqa qanchis metrostawan jinaraj wicharerqa chay orqos patamanta.

²¹ Ajinapi wañuraporqanku tukuy kausajkuna kay jallp'a patapi: P'isqos, uywas, monte animales, jallp'a patapi qhatatakoj animales, tukuy runas ima.

²² Jallp'a patapi tukuy kausayniyojkuna wañurarqanku senqasninkumanta samajkuna.

²³ Noella kausarqa, pikunachus arcapi karqanku chaykunallawan khuska. Chay ujkunaqa tukuyninku chinkaporqanku: Runas, uywas, p'isqos, qhatatakoj animales ima.

²⁴ Yakutaj karqa jallp'a patapi pachaj phishqa chunkayoj diasta.