Génesis 6 - Qheshwa Biblia DC

Runaspa sajra ruwasqasnin

¹ Maypachachus runas kay jallp'a patapi mirayta qallarejtinku, warmi wawasninku karqa.

² Diospa wawasnintaj paykunawan casarakorqanku sumaj warmista rikuspa, ajllakuspataj munasqankuman jina.

³ Señortaj nerqa: Mana saqesajchu runasqa kay jallp'a patapi wiñaypaj kausanankuta, imaraykuchus paykunaqa aychalla kanku. Chayrayku kausanqanku pachaj iskay chunkayoj watasllata.

⁴ Chaypacha jatuchaj runas rikhurerqanku jallp'a patapi, Diospa wawasnin runaspa ususisninkuwan casarajtinku wawasniyoj kanankupaj. Chay qhepatapis kallarqankupuni. Paykuna karqanku manchay kallpasniyoj, mentasqastaj unay tiempospi.

⁵ Señor rikorqa runaspa ashkha millay sajra ruwasqasninkuta, qhepamampis tukuy sajrallatapuni ruwayta yuyasqankuta.

⁶ Chayrayku Señorqa pesachikorqa runasta ruwasqanmanta, mayta sonqonta nanachikuspa.

⁷ Señorqa nerqa: Jallp'a patamanta q'alata chinkachisaj kay ruwasqasniy runasta; jinallataj uywasta, pampata qhatatakojkunata, p'isqostawan. Anchata pesachikuni kaykunata ruwasqaymanta.

⁸ Chaywampis Noeqa Diospa ñaupaqempi khuyakuyta tarerqa.

Noeqa arcata ruwan

⁹ Kay jina karqa Noepa kausaynin: Noeqa cheqan karqa, sumaj runataj chay tiempo runa mita ukhupi, Diosta kasuspapuni. Ajinaqa pay k'atalla Diospa munasqanta ruwarqa.

¹⁰ Noepata kinsa wawasnin karqa, Sem, Cam, Jafetwan.

¹¹ Diospa ñaupaqempi mundoqa imaymana juchawan junt'a karqa, chejninakuywan ima.

^12-13 Runasqa juchapi pejtusqas karqanku. Chayrayku Dios chay jina millay juchararasta rikuspa, nerqa Noeman: Noqa tukuchisaj kay runasta. Paykunaj juchallikusqankurayku imaymana jucha mundoman junt'an. Chayrayku tukuchisaj paykunata tukuy jallp'antinta.

¹⁴ Qantaj ruway uj arcata gofer maderamanta. Ukhumpitaj ruway ashkha cuartosta. Jinaspataj mach'awan lluch'aranki ukhunta jawantawan tukuy lajrasninta ama yaku yaykunampaj.

¹⁵ Kay jinata ruwanki: Sayt'unman ruwanki pachaj kinsa chunka phishqayoj metrosniyojta, kinrayninmantaj iskay chunka iskayniyoj khuskanniyojta, patamantaj chunka kinsayoj khuskanniyoj metrosta.

¹⁶ Chanta ruway kinsa alto patasniyojta, uj ventanayojta, chaytaj cachun techo uramanta khuskan metropi; uj ladompitaj punkunta ruwanki.

¹⁷ Noqa jatun parata parachimusaj yakoqa mundota p'ampanankama, mundopi tukuy kausajkunata chinkachinampaj. Jallp'a patapi tukuy ima kausajkuna wañonqanku.

¹⁸ Qanwantaj ruwasaj uj tratota. Qan yaykunki arcaman, jinallataj yaykonqanku wawasniyki, warmiyki, qhachunisniyki ima.

¹⁹ Chanta arcaman apaykunki uj china orqota sapa uj animalesmanta kay mundopi kaj chhicamanta; chay animales qanwan kanqanku kausanankupaj.

²⁰ Qanwan khuska yaykonqanku tukuy laya animalesmanta iskaykama: P'isqosmanta, uywasmanta, tukuy qhatatakoj animalesmanta ima, kausanankupaj.

²¹ Jinallataj tukuy laya mikhunata tantay, waqaychaytaj qan mikhunaykipaj, jinallataj animales mikhunankupajpis.

²² Ajinata Noeqa ruwarqa, Dios imaynatachus payman nisqanman jina.