Génesis 50 - Qheshwa Biblia DC

¹ Josetaj tatampa ayanta ujllaykuytawan much'aykuspataj waqarikorqa.

² Chaymantataj jampejkunasninta kamacherqa Israel tatanta q'apaj jampiswan mayt'uykapunankuta, paykunataj ajinata ruwarqanku.

³ Paykuna chay jinata ruwarqanku tawa chunka diaspi, imaraykuchus chay chhika diaspipuni ruwakunan tiyan chay imasqa. Egipciostaj Jacobpa wañupusqanta yachaspa waqarqanku, qanchis chunka diasta llakiy p'achasta churakuspa.

^4-5 Chay qanchis chunka días junt'akojtintaj Joseqa parlarqa palaciopi kaj faraompa kamachisninwan, nispa: Noqa tarini qankunaj khuyakuyniykichejta, chayrayku niripuwaychej ari faraonman, imatachus tatay niwasqanta, pay jurachiwarqa wañuy patapiña kashaspa, wañupojtin noqa p'ampamunaypaj paypa wakichikusqan sepulturaman, chaytaj kashan Canaán jallp'api. Noqa mañakuni ari faraón saqerinawanta rispa tatayta p'ampakampunayta, chaymantataj kutimusajpacha.

⁶ Faraontaj nerqa: Riy ari, tataykita p'ampaykakampuy, imaynatachus pay kamachisusqanman jina.

⁷ Chaymanta Joseqa rerqa tatanta p'ampakampoj, faraompa palaciompi tukuy llank'ajkunataj payta riyserqanku chay Egiptomanta.

⁸ Jinallataj Jacobpa tukuy ayllusnin, Josej ayllusnin, wauqesnin ima. Gosén jallp'apeqa saqerqanku wawasllata uywastawan.

⁹ Chaymantaqa rillarqankutaj carroswan, caballospi ima. Ajinata Josewanqa ashkha runas rerqanku.

¹⁰ Jordán mayoj chimpampi Goren-ha-atadman chayaspataj maytapuni Jacobmanta waqarikorqanku, sumaj ruwayta chaypi ruwarqanku. Chaypi Joseqa qanchis diata llakiy p'achasta apaykacharqa.

¹¹ Chaynejpi cananeos tiyakojkunataj chayta rikuspa nerqanku: Egipcios wañusqankuta may sumajtapuni p'ampaykushanku, nispa. Chayrayku chay cheqata suticharqanku Abel-mizraimta. Chayqa kashan Jordán mayoj inti llojsimuyninnejpi.

¹² Jacobpa wawasnenqa ruwarqanku imatachá tatanku kamacherqa paykunaman chayta.

¹³ Chayrayku Jacobpa ayanta apakaporqanku Canaán jallp'aman, chaypi p'ampakaporqanku Macpela cuevapi, mayqentachus Abraham rantikorqa Hetpa wawan Efronmanta, chayman tukuy ayllun p'ampakunankupaj. Chay jallp'a, maypichus chay cueva tarikun, chayqa kashan Mamrej inti llojsimuyninnejpi.

¹⁴ Joseqa tatanta p'ampaykuytawan Egiptoman kutiporqa wauqesninwan khuska, pikunachus payta rejserqanku chaykunawan ima.

Josej tukukuynin

¹⁵ Jacob wañupojtintaj Josej wauqesnin ninakorqanku: Ichapis kunan Joseqa chejnikuwasun tukuy sajrata paypaj ruwasqasninchejmanta.

^16-17 Chaymanta Joseman nichimorqanku: Tatanchej manaraj wañupushaspa niwarqayku, kayta qanman ninaykuta: Kunanqa wawáy, mañakuyki ari, wauqesniykej tukuy sajrata ruwasusqankuta, juchasninkuta perdonanaykita; imaraykuchus paykuna mana allintachu ruwasorqanku, nispa. Chayrayku mañakuyku ari, tukuy sajrata qampaj ruwasqasniykuta perdonapuwayku, imaraykuchus tataykej Diosnimpa kamachisnin kayku, nispa. Ajinata nisqankuta chay kachas willashajtinkutaj Joseqa mayta waqasharqa.

¹⁸ Chaymantataj kikin wauqesnin jamorqanku; k'umuykuspataj ñaupaqenman qonqoriykukorqanku pampaman umankuta chayachinankukama, jinata nispa: Kamachisniyki kayku imanawaykupis ari.

¹⁹ Josetaj paykunaman nerqa: Ama chaymantaqa llakikuychejchu, mana noqaqa Diospa sutimpi oqharikuymanchu.

²⁰ Qankuna mana allintachu ruwawayta munarqankichej, Diostaj chay mana allinta, allinman tukucherqa, mayqentachus kunan rikushankichej, ashkhasta kausachinaypaj.

²¹ Chayrayku ama llakikuychejchu. Noqaqa mikhunata qosqaykichej mikhunaykichejpaj, wawasniykichej mikhunankupaj ima. Ajinata Joseqa wauqesninta llakiyninkumanta sonqocharqa, may misk'i simiwan k'achamanta parlapayaspa.

²² Josewan, chanta tatampa tukuy familian ima Egiptopi tiyakaporqanku. Joseqa kausarqa pachaj chunkayoj watasta.

²³ Jinamanta Joseqa rikorqaraj wawan Efraimpa wawasnimpa allchhinta. Jinallataj rikorqaraj wawan Manasespa allchhinta Maquirpa wawanta.

²⁴ Uj kuti Joseqa wauqesninman nerqa: Pisillaña kashan wañupunayman, Dios qankunamanta yuyarikusonqachej, kay jallp'amanta orqhosonqachej, pusasunaykichejpaj mayqen jallp'atachus qosqaykichej nerqa Abrahamman, Jacobman ima, chayman.

²⁵ Chaymantaqa José Israelpa wawasninta juracherqa, kay jinata nispa: Dios cheqamanta jamonqa qankunata kaymanta orqhosunaykichejpaj. Jina kajtinkamataj qankunaqa kaymanta tullusniyta apapuwankichej maymanchus rishankichej chayman.

²⁶ Jinamanta Joseqa wañuporqa pachaj chunkayoj watasniyoj. Wauqesnintaj ayanta jawiykuspa, sumajta ch'akichispataj, cajonman churaykuspa waqaycharqanku Egiptopi.