Génesis 5 - Qheshwa Biblia DC

Adampa miraynin

¹ Kaykuna kanku Adampa mirayninmanta kajkuna. Mayk'ajchus Dios runata ruwarqa, chaypacha runaqa payman rijch'akoj karqa.

² Dios ruwarqa qharita warmitawan; chaymantataj bendicerqa, suticharqataj runata, ima diachus ruwasqas karqanku chaypacha.

³ Adanqa karqa pachaj kinsa chunka watasniyoj, wawan payman rijch'akoj nacerqa chaypacha, pitachus suticharqa Setta.

⁴ Chaymanta Adanqa kausarqa pusaj pachaj watastawan, wawasnintaj astawan karqankuraj qharis, chanta warmis.

⁵ Adanqa kausarqa tukuynimpi isq'on pachaj kinsa chunkayoj watasta. Chay chhika watasniyoj wañuporqa.

⁶ Setqa pachaj phishqayoj watasniyoj karqa wawan Enós naceshajtin.

⁷ Chaymanta Set kausarqa pusaj pachaj qanchisniyoj watastawan, wawasnintaj karqankuraj qharis, chanta warmis.

⁸ Tukuynimpi Setqa kausarqa isq'on pachaj chunka iskayniyoj watasta. Chay chhika watasniyoj wañuporqa.

⁹ Enós isq'on chunka watasniyoj karqa Cainán wawan naceshajtin.

¹⁰ Chay qhepata Enós kausarqa pusaj pachaj chunka phishqayoj watastawan. Wawasnintaj karqankuraj qharis, chanta warmis.

¹¹ Tukuynimpi Enosqa kausarqa isq'on pachaj phishqayoj watasta. Chay chhika watasniyoj wañuporqa.

¹² Cainán qanchis chunka watasniyoj karqa Mahalaleel wawan naceshajtin.

¹³ Chay qhepata Cainán kausarqa pusaj pachaj tawa chunkayoj watastawan. Wawasnintaj karqankuraj qharis, chanta warmis.

¹⁴ Tukuynimpi Cainán kausarqa isq'on pachaj chunkayoj watasta. Chay chhika watasniyoj wañuporqa.

¹⁵ Mahaleel sojta chunka phishqayoj watasniyoj karqa wawan Jared naceshajtin.

¹⁶ Chay qhepata Mahaleel kausarqa pusaj pachaj kinsa chunkayoj watastawan. Wawasnintaj karqankuraj qharis, chanta warmis.

¹⁷ Tukuynimpi Mahaleelqa kausarqa pusaj pachaj isq'on chunka phishqayoj watasta. Chay chhika watasniyoj wañuporqa.

¹⁸ Jared pachaj sojta chunka iskayniyoj watasniyoj karqa Enoc wawan naceshajtin.

¹⁹ Chay qhepata Jared kausarqa pusaj pachaj watastawan. Wawasnintaj karqankuraj qharis, chanta warmis.

²⁰ Tukuynimpi Jared kausarqa isq'on pachaj sojta chunka iskayniyoj watasta. Chay chhika watasniyoj wañuporqa.

²¹ Enoc sojta chunka phishqayoj watasniyoj karqa Matusalén wawan naceshajtin.

²² Enocqa Diospa munayninman jinapuni kausarqa. Matusalén nacesqanmanta qhepata, Enoc kausarqa kinsa pachaj watastawan. Wawasnintaj karqanku qharis, chanta warmis.

²³ Tukuynimpi Enocqa kausarqa kinsa pachaj sojta chunka phishqayoj watasta.

²⁴ Enoc Diospa munayninman jinapuni kausasqanrayku uj p'unchay chinkaporqa, imaraykuchus Dios pusakaporqa.

²⁵ Matusalenqa karqa pachaj pusaj chunka qanchisniyoj watasniyoj wawan Lamec naceshajtin.

²⁶ Chay qhepata Matusalén kausarqa qanchis pachaj pusaj chunka iskayniyoj watastawanraj. Wawasnintaj karqankuraj qharis, chanta warmis.

²⁷ Tukuynimpi Matusalenqa kausarqa isq'on pachaj sojta chunka isq'onniyoj watasta. Chay chhika watasniyoj wañuporqa.

²⁸ Lamecqa pachaj pusaj chunka iskayniyoj watasniyoj karqa uj wawan naceshajtin.

²⁹ Chaytaj karqa Noé, imaraykuchus nerqa: Dios maldicin jallp'ata, llank'ananchej tiyan atiy mana atiyta, chaymanta kay wawa samarichiwasun.

³⁰ Noé nacesqanmanta qhepaman, Lamecqa kausarqa phishqa pachaj isq'on chunka phishqayoj watastawanraj. Wawasnintaj karqankuraj qharis, chanta warmis.

³¹ Tukuynimpi Lamecqa kausarqa qanchis pachaj qanchis chunka qanchisniyoj watasta. Chay chhika watasniyoj wañuporqa.

³² Noé phishqa pachaj watasniyoj kasqanmanta wawasnin nacerqanku: Sem, Cam, Jafet.