Génesis 48 - Qheshwa Biblia DC

Jacob bendicin Efrainta Manasestawan

¹ Pisi tiempomantawan Joseman willarqanku tatan astawan onqoykapusqanta. Josetaj chayta uyarispa iskaynin wawasnin Manasesta Efraintawan pusarikuspa watukoj rerqa.

² Jacobtaj wawayki José jamususqa, nispa willajtinku, mayta kallpakuspa ñak'ayta camanmanta tiyaykamorqa.

^3-4 Chaymantataj Joseman nerqa: Tukuy atiyniyoj Dios Luz llajtapi rikhuriwarqa, bendiciwarqataj Canaán jallp'api, kay palabraswan: Noqa qanta ashkhata mirachisqayki, chay mirayniykimanta ashkha naciones ruwakonqanku. Chanta mana chayllachu, kay jallp'ata mirayniykiman qopusaj, paykunajta kanqa wiñaynintimpaj.

⁵ Kunanqa qampa iskay wawasniyki Efrainwan Manaseswan kay Egipto jallp'api nacepusorqanku, manaraj qanwan noqa tinkukoj jamushajtiy; paykunapis noqajta kanku, Rubenwan Simeonwan jina.

⁶ Qhepaman wawasniyki kanqankuraj chaykunapis qampa kanqanku, Efraimpata Manasespatawan wauqenku kasqankurayku paykunapis chayaqeta jap'illanqankutaj.

⁷ Padan-aranmanta kutimushajtiy mamayki Raquel wañuporqa Canaán jallp'api, manaraj Efrataman chayamushaspa, chay Efrata ñampi p'ampaykorqani, kunantaj chayqa Belén sutiyoj.

⁸ Jinata nishaspalla Israelqa Josej wawasninta ñak'ayta repararqa, taporqataj: Pistaj kaykunari?, nispa.

⁹ Josetaj kuticherqa: Kaykunaqa wawasniy kanku Dios qowarqa kay Egiptopi. Tatantaj nerqa: Astawan qayllaykamuwaychej wawasníy, bendicionniyta qosqaykichej, nispa.

¹⁰ Israelqa allin machuña karqa, chayrayku ñawisnenqa manaña imatapis allinta rikuyta aterqachu. Josetaj astawan wawasninta tatanman qayllaykucherqa, paytaj much'araspa ojllaykorqa.

¹¹ Chaymantataj Joseman nerqa: Noqaqa manañapuni ujtawan rikusuyta yuyarqanichu. Chaywampis Diosqa wawasniykitapis rejsichiwanraj.

¹² Joseqa tatampa arphisninmanta wawasninta suchurichispa qonqoriykukorqa ñaupaqempi pampaman umanta chayachinankama.

¹³ Chaymantataj Joseqa iskaynin wawasninta aysariykukuspa Efrainta paña makinwan, Manasestataj lloq'e makinwan qayllaykorqa tatanman. Ajinamanta Efraenqa Israelpa lloq'enman chayarqa, Manasestaj pañanman.

¹⁴ Israeltaj makisninta jaywarispa simp'aykorqa, paña makinta churarqa Efraimpa umanman, sullk'a kajman; lloq'e makintataj churarqa Manasespa umanman, kuraj kajpaman.

^15-16 Jinaspataj Joseta bendicerqa kay jinata: Tukuy atiyniyoj Dios, pitachus kasorqanku abuelosniy Abraham, Isaacwan; mayqenchus noqata pusaykachakuwarqa nacesqay ratomantapacha, tukuy sajra kajmanta waqaychawaj, ángel, kay wawasta bendicichun. Paykunanejta sutiy yuyarisqa kanampaj, jinallataj tatasniypa sutisnimpis Abrahampata, Isaacpatawan. Paykuna kachunku ashkha wawasniyoj, ashkhas kachunku kay mundopi.

¹⁷ Joseman mana allinchu rijch'arqa, ajinata tatan Efraimpa umanman paña makinta churasqan. Chayrayku makinta jap'ispa Manasespa umanman churayta munarqa, jinata nishajtin.

¹⁸ Kay jinata nispa: Mana jinachu chayqa tatáy. Kay kajraj kuraj kajqa. Paypa umanman makisniykita churay.

¹⁹ Tatantaj mana munarqachu, nerqataj: Chaytaqa yachallani wawáy. Paypis uj jatun nacionman tukonqa. Chaywampis kay sullk'a kajtaj aswan jatun nación kanqa paymanta nisqaqa.

²⁰ Jacobqa chay diapacha bendicerqa paykunata kay jinata nispa: Qankunaj sutiykichejta oqharispa israelitasqa bendicionta qonqanku, nenqankutaj: Dios qanwan ruwachun imaynatachus Efrainwan Manaseswan ruwarqa ajinata, nispa. Ajinata Israelqa Efrainmanraj ñaupajta churarqa Manasesmanta nisqaqa.

²¹ Chaymantataj Joseman nerqa: Qhaway, noqaqa wañupusajña, Dios qankunawan kanqa. Payllataj kutichisonqachej ñaupa tatasniykichejpa jallp'anman.

²² Qanman qoyki aswan kurajta wauqesniykimanta nisqaqa Siquem jallp'ata, chaytari mayta maqanakuspa amorreosmanta qhechorqani.