Génesis 46 - Qheshwa Biblia DC

Jacob Egiptoman ripun

¹ Jinamanta Jacobqa purirerqa tukuy iman kajwan. Chayarqataj Beersebaman, chaypitaj rikuchikusta jaywarqa Isaac tatampa Diosninman.

² Chay ch'isi Israelman Dios parlarqa mosqoypi jina Jacob sutinmanta wajyaspa. Paytaj kuticherqa kaypi kashani, nispa.

³ Chaypi Dios payman nerqa: Noqa Dios kani, tataykej Diosnin. Ama Egiptoman riyta manchachikuychu; chaypi mirachisaj mirayniykita uj jatun nación kanampaj.

⁴ Noqa qanwan Egiptoman uraykusaj; noqallataj qhepaman mirayniykita orqhuspa kutichimusaj kayman. Chantapis wañojtiyki Joseyki qayllaykipi kanqa.

⁵ Chaymanta Jacobqa Beersebamanta rillarqapuni. Israelpa wawasnenqa tatankuta, wawasninkuta, warmisninkuta ima faraompa carrosta ripunankupaj apachimusqampi churaykuspa pusakaporqanku.

⁶ Jacobqa pininchá tiyaporqa chaykunawan riporqa Egiptoman. Chantapis apakaporqanku wakasninkuta, ovejasninkuta, imasninkuchá tiyaporqa Canaán jallp'api kashajtinku chaykunatawan.

⁷ Tukuy qhari wawasnin, warmi wawasnin, qhari kaj allchhisnin, warmi kaj allchhisnin ima riporqanku paywan.

⁸ Kaykuna karqanku israelitaspa sutisninku Egiptoman ripojkunajta; niyta munan Jacobpa mirayninmanta: Jacobpa kuraj kaj wawan Rubén.

⁹ Rubempa wawasnintaj karqanku: Janoc, Falú, Hezrón, Carmi ima.

¹⁰ Simeompa wawasnintaj karqanku: Jemuel, Jamín, Ohad, Jaquín, Zohar, Saul ima, mayqenchus karqa cananea warmej wawan.

¹¹ Levej wawasnintaj karqanku: Gersón, Coat, Merari ima.

¹² Judaj wawasnin karqanku: Er, Onán, Sela, Fares, Zara ima. Chaypacha Canaán jallp'api wañusqasña karqanku Erwan, Onanwan. Farespa wawasnin karqanku Hezronwan, Hamulwan.

¹³ Isacarpa wawasnin karqanku: Tola, Fúa, Job, Simron ima.

¹⁴ Zabulompa wawasnin karqanku: Sered, Elón, Jahleel ima.

¹⁵ Chaykuna karqanku Leaj wawasnin, mayqenkunatachus Jacobpaj rejserqa chay, Padan-arampi kashaspa, Dina warmi wawantawan. Chaykunamanta mirajkunaqa karqanku kinsa chunka kinsayoj qharis, chanta warmis ima.

¹⁶ Gadpa wawasnintaj karqanku: Zifión, Hagui, Ezbón, Suni, Eri, Arodi, Areli ima.

¹⁷ Aserpa wawasnintaj karqanku: Imna, Isúa, Isúi, Bería; chaykunaj panankutaj karqa Sera. Beriaj wawasnin karqanku Heberwan, Malquielwan.

¹⁸ Chaykuna karqanku Zilpaj wawasnin Jacobpaj rejsisqasnin. Payqa karqa warmi kamachin, mayqentachus Labán qoporqa wawan Leaman. Chaykunamanta kajkuna karqanku tukuyninkupi chunka sojtayoj.

¹⁹ Jacobpa warmin Raquelpa wawasnin karqanku iskay: Josewan, Benjaminwan.

²⁰ Josej wawasnintaj Asenatpi rejsisqasnin iskay karqanku: Manaseswan, Efrainwan Egiptopi nacejkuna. Asenat warmenqa karqa On sacerdotej Potifaraj ususin.

²¹ Benjamimpa wawasnintaj karqanku: Bela, Bequer, Asbel, Gera, Naamán, Ehi, Ros, Mupin, Hupin, Ard ima.

²² Chaykuna karqanku Raquelpa miraynin Jacobpa warmimpata. Tukuynimpi chunka tawayoj karqanku.

²³ Dampa wawanqa karqa Husim.

²⁴ Neftaléj wawasnin karqanku: Jahseel, Gumi, Jezer, Silen ima.

²⁵ Chaykuna karqanku Bilhaj wawasnin Jacobpaj rejsisqasnin. Bilhaqa kamachin karqa, mayqentachus Labán qoporqa wawan Raquelman. Chaypa miraynenqa qanchis karqanku tukuyninkupi.

²⁶ Jacobwan Egiptoman chayajkuna, pay kikimpa yawarninmanta kajkuna karqanku sojta chunka sojtayoj, wawasnimpa warmisninta mana yupaspa.

²⁷ Josej wawasnenqa karqanku iskay, Egiptopi nacejkuna. Ajinata Jacobpa ayllun chayarqa Egiptoman qanchis chunka runas.

^28-29 Jacobqa ña chayanayashaspaña, Judá wawanta kacharqa José wawanman willamojta, jamunampaj taripaj Gosén chaynejman. Gosén chaynejman chayajtinkutaj, Joseqa kamacherqa kamachisnin carrosta wakichipunankuta tatanta taripaj rinampaj. Tatanwan tinkukuspataj Joseqa sumajta ujllaykorqa, unaytataj waqarqa tatan ujllarisqa.

³⁰ Chaymanta Israelqa nerqa José wawanman: Noqa kikiy, ñawisniywan rikukuyki, kausashajta taripakapuyki. Kunanqa atini wañupuyta!

³¹ Chaymanta Joseqa wauqesninman, tatampa ayllusninman ima nerqa: Faraonman rispa willamusaj: Wauqesniy, tataypa tukuy familiasnin chayamushanku Canaán jallp'amanta noqawan tiyakoj.

³² Paykunaqa jamushanku wakasninkuwan, ovejasninkuwan, imankuchá tiyan chaykunawan ima, imaraykuchus paykuna uywasllatapuni mirachiyta yachanku.

^33-34 Maypachachus faraón wajyasonqachej, tapusonqachejtaj imastachus ruwayta yachasqaykichejta, chaypacha qankunaqa ninkichej: Ovejasllatapuni mirachiyta yachasqaykichejta, ñaupa tatasniyku tatasniykichej jina, nispa. Ajinamanta qankuna Gosén jallp'api tiyakunkichej, imaraykuchus egipciospajqa mana allinchu ovejeroswan khuska tiyakoyqa.