Génesis 45 - Qheshwa Biblia DC

José wauqesninman rejsichikun

¹ Joseqa manaña astawan waqayninta jark'akuyta atispa, tukuy kamachisninta, qhawarispa nerqa jawaman llojsinankuta. Jinamanta tukuy kamachisnin mana Josewanchu karqanku, pay wauqesninman rejsichikushajtin.

² Chaymanta payqa jatunmanta waqatatarqa; chayta egipcios uyarimorqanku, jinallataj faraompa wasinmanta kajkunapis.

³ Joseqa wauqesninman nerqa: Noqa José kani. Tatayqa kausakushanrajchu?, nispa. Wauqesnintaj mana imatapis kutichiyta aterqankuchu, imaraykuchus may mancharisqas mana imanakuyta aterqankuchu ñaupaqempi tukuyninku rikhurispa.

⁴ Josetaj ujtawan paykunaman nillarqataj: Ama mancharikuspa qayllamuwaychej. Paykuna qayllaykojtinkutaj nerqa: Noqa kani José qankunaj wauqeykichej, pitachus qankuna Egiptoman venderqankichej, chay.

⁵ Kunanqa ama chaymanta llakikuychejchu, amataj qankunapura phiñanakuychejchu noqata vendewasqaykichejmanta. Noqataqa Dios kachamuwan qankunaj ñaupaqeykichejta, ashkha runasta kausachinaypaj.

⁶ Iskay wataña kay yarqhay kasqanqa, kaymanta phishqa wataswanraj kanan tiyan, chaypi manapuni ima cosechapis kanqachu, nitaj tarpusqapis poqonqachu.

⁷ Chaypajtaj Dios noqata kachamuwan qankuna ama tukukunaykichejpaj kay jallp'a patapi, mirayniykichej ama tukukunampaj, jinamanta qankuna uj t'ukunata salvakunaykichejpaj.

⁸ Ajinaqa Dios kay llajtaman kachamuwan, mana qankunachu; Pay churawan faraonman yuyaychanaypaj, wasimpi tukuy imanmanta patronta, tukuynin Egiptota kamachinaypaj.

⁹ Kunan qankunaqa usqhayta ripuychej maypichus tatay kashan chayman, niychejtaj: Wawayki José kay jinata nichimusunki: Dios churawan tukuynin Egiptota kamachinaypaj. Jampuy tatáy, usqhayllata ama iskayrayaspa.

¹⁰ Kaypi tiyakunki Gosén jallp'api tukuy wawasniykiwan, allchhisniykiwan khuska, uywasniykiwan, tukuy imayki kapusojwan ima. Ajinamanta qanqa qayllaypi kakunki.

¹¹ Chaypi qankunaman mikhuchisqaykichej qanman, wawasniykiman, pikunachus qanwan kashanku chaykunamanwan, ama yarqhaywan wañunaykichejpaj, imaraykuchus phishqa watastawanraj yarqhayqa kanqa.

¹² Qankuna noqa kikiy nisqayta uyarishawankichej, jinallataj wauqey Benjamimpis.

¹³ Ajinata qankunaqa tatayman willapuwaychej kay Egipto llajtapi kamachej kasqaymanta, jinallataj imatachá qankuna rikushankichej chaykunata ima. Chayrayku kunanqa apurasqata ripuychej, tataytataj usqhayllata pusampuwaychej kayman.

¹⁴ Joseqa ujtawan wauqen Benjaminta ujllaykuytawan waqarikorqa. Benjamimpis waqarikullarqataj José ujllarisqa.

¹⁵ Chaymantataj Joseqa sapa uj wauqesnintañataj waqarikuspa, waqarikuspa ujllaykuytawan much'aykuspataj waqarikorqa. Chaymantaña wauqesnenqa ñak'ayta parlapayarqanku.

¹⁶ Chaymantaqa Josej wauqesnin chayamusqanku uyarikorqa faraompa palaciompi; faraontaj mayta kusikorqa tukuy kamachisninwan khuska.

^17-18 Faraonqa Joseman nerqa: Niy wauqesniykiman, usqhayllata burrosninkuman chajnariykukuspa Canaanman kutiripunankuta, chayaspataj pusakampunankuta tataykichejta, familiasniykichejtawan. Noqataj qosqaykichej Egipto jallp'api imachus sumajnin kajta, mikhonqankutaj kaypi sumajta poqon chayta.

¹⁹ Qan kamachiy, kay Egipto llajtamantapacha carrosta apanankuta, chaypi wawasninkuta, warmisninkuta, tatankuta ima apakampunankupaj, jamuchunkutaj.

²⁰ Ama llakikuchunkuchu imasninkumantapis, kaypi kallanqa imaspis, imachá kay Egiptopi tiyan chaymanta sumajnin kaj paykunajta kanqa.

²¹ Israelpa wawasnenqa ajinata ruwarqanku. José paykunaman qorqa carrosta faraompa kamachisqanman jina, jinallataj mikhunastapis qorqa ñampi mikhunankupaj.

²² Chaymanta p'achastapis mosojkunata qorqa mudakunankupaj sapa ujninkuman. Benjaminmantaj qorqa kinsa pachaj qolqeta, phishqa mudakuna p'achastawan.

²³ Tatanman apacherqa chunka burrospi cargasta, imachus Egiptopi sumajta poqoj chayta, waj chunka burrospi cargastataj trigota, t'antata, chanta qoqawistawan tatan ñanta jamuspa mikhunampaj.

²⁴ Joseqa wauqesninta kacharpayashaspa nerqa: Pajtataj ñampi phiñanakuspa maqanakushawajchej, nispa. Paykunataj riporqanku.

²⁵ Egiptomanta wichariytawan tatanku Jacob kasharqa chay Canaán jallp'aman chayarqanku.

²⁶ Jacobman willarqanku José kausakushasqantaraj, pay Egiptopi chay kamachej kasqanta. Paytaj ni ima niyta aterqachu, mana yuyarerqachu ni imata ninanta, nitaj creeytapis, imaraykuchus astawan llakikorqa yuyarispa, jinata willajtinku.

²⁷ Maypachachus allinta willajtinku, tukuy imata José nisqanta, carrosta Josej apachisqanta ripunampaj rikuspataj Jacobqa mayta kusikorqa.

²⁸ Chaymantaqa nerqa: Walejpacha, chayllata yachayta munarqani, waway Joseqa kausakushasqaraj. Amaraj wañushaspa rispa tinkumusaj, nispa.