Génesis 41 - Qheshwa Biblia DC

José sut'inchan faraompa mosqoyninta

¹ Iskay wata pasayta faraonqa mosqokorqa. Chay mosqoynimpi pay kashasqa Nilo mayu cantopi.

² Chaypi rikusqa qanchis sumachaj wira wakas mayumanta llojsimushajta, mikhushajtataj juncos ukhupi pastosta.

³ Chaykunaj qhepantataj qanchis millay tullu wakas llojsimusqanku mayumanta; chay wira wakaspa ñaupaqenmantaj mayu cantopi qayllaykushajta.

⁴ Jinaspataj chay millay tullu wakasqa mikhurasqanku chay wira wakasta. Jina kashajtintaj faraonqa ujllata rijch'arisqa.

⁵ Chay qhepatataj ujtawan puñuykusqa; chaypeqa waj jinatañataj mosqokullasqataj: Chaypi rikusqa sumachaj trigo espigasta uj wiñayllamanta wiñasqata.

⁶ Chayllamantataj wiñasqanku qanchis ch'aki espigas, inti llojsimuynejmanta jamoj wayraj ch'akichisqasnin.

⁷ Chaykunataj chay qanchis sumachaj trigo espigasta mikhuykusqanku. Faraonqa rijch'ariytawan yuyarqa chayqa uj mosqoy kasqanta.

⁸ Q'ayantin paqarenqa may llakisqa karqa; chayrayku wajyacherqa tukuy adivinosta, yachayniyojkunatawan tukuy Egiptomanta. Faraón chay mosqokusqanta willajtintaj ni mayqenninku sut'inchayta aterqankuchu imastachus niyta munasqanta chay mosqokusqan.

⁹ Chaymantaña vinota jaywajkunaj kurajninku faraonman willarqa: A…, kunan yuyarikuni imatachus mana allinta ruwasqaymanta.

^10-11 Qan, faraón maypachachus kamachisniykej contranta phiñarikorqanki, t'antata ruwajkunaj kurajnimpa contranta, noqaj contraytawan, chaypacha capitampa wasin carcelman wisq'achiwarqayku, chaypacha paywan noqawan mosqokorqayku uj ch'isillapi, sapa ujniykoj mosqokusqaykutaj niyta munarqa imachus kanawaykuta.

¹² Chayllapitaj karqa uj hebreo wayna, chay karqa capitampa kamachin. Payman willakorqayku mosqokusqasniykuta, paytaj sut'inchawarqayku, niwarqaykutaj imaschus noqaykupaj kananta.

¹³ Kikintaj karqa imastachus niwasqaykuman jina. Noqa llank'anayman kutiykapuni, ujtaj sipisqa.

¹⁴ Chayta yachaspataj faraonqa Joseta carcelmanta wajyachimorqa. Orqhomorqankutaj usqhay usqhayta. Josetaj chujchanta k'utuchikorqa, jinaspataj p'achanta cambiakuytawan faraonman rerqa.

¹⁵ Paytaj nerqa Joseman: Noqa mosqokuni, nitaj pipis kanchu sut'inchapuwaj; uyarinitaj qan mosqoykunata uyarispa sut'inchasqaykita.

¹⁶ Josetaj nerqa: Chayqa mana noqamantachu, Dios atin sut'inchapusuyta allinniykipaj.

¹⁷ Faraontaj nerqa: Mosqoyniypi Nilo mayu cantopi sayashasqani.

¹⁸ Chay mayumanta qanchis sumachaj wira wakas llojsimunku, juncos ukhupitaj pastota mikhunku.

¹⁹ Qhepankutataj llojsimullankutaj qanchis millay tullu wakas. Chay jina millay tullu wakastaqa manapuni rikojchu kani kay tukuy Egiptopi!

²⁰ Chay qanchis millay tullu wakastaj chay qanchis wira wakasta mikhuykunku.

²¹ Chay jinata mikhuykojtinkutaj ni pipis reparanchu mikhukusqankuta, imaraykuchus manapunipis mikhunkumanchu karqa jina tullusllapuni karqanku ñaupajta jina. Noqataj ujllata rijch'arini.

²² Chaymanta puñuykuytawan waj jinatañataj mosqokullanitaj. Qanchis trigo espigas uj wiñayllamanta wiñasqanku.

²³ Chay qhepata chay wiñayllamantataj qanchis millay ch'aki ch'usu espigas inti llojsimuymanta jamoj wayraj ch'akichisqan.

²⁴ Chay qanchis ch'aki ch'usu espigas mikhuykunku chay sumachaj k'acha trigo espigasta. Chayta willani yatirisman, nitaj ni mayqenninku willawankuchu imatachus niyta munasqanta.

²⁵ Josetaj nerqa Faraonman: Iskaynin mosqokusqasniyki ujlla kanku. Dios willasunki Pay imatachus ruwanan kasqanta.

²⁶ Qanchis wira wakasqa qanchis watas, kikillantataj niyta munan qanchis trigo espigaspis.

²⁷ Qanchis millay tullu wakastaj, wira wakaspa qhepanta llojsimojkunapis kanku qanchis watas. Kikillantaj qanchis millay espigas inti llojsimuymanta jamoj wayraj ch'akichisqampis yarqhay qanchis watas kanku.

²⁸ Kay imatachus nishayki chayllatataj Diospis willasunki Pay imatachus ruwanan kasqanta.

²⁹ Kay tukuynin Egipto jallp'aspi qanchis watasta sumajta mikhuykunas poqonqanku.

³⁰ Qanchis watastaqa sinch'i yarqhay kanqa. Chayrayku ni pipis yuyarenqachu qanchis watasta sumajta mikhuy poqosqanta. Ajinata yarqhayqa tukuynin jallp'aspi k'atej nichenqa.

³¹ Yarqhayqa musphaypuni kanqa mana muchuy atina, ñaupajta sumajta poqosqanqa mana lastroyoj qhepakonqa q'ara t'ojlapacha.

³² Qanqa iskay kutita kikillantapuni mosqokusqanki. Diosqa ruwanampuni kashan kayta, imatachus ruwayta munasqanman jina usqhayllata.

³³ Chayrayku allin kanman uj sumaj yuyayniyoj, yachayniyoj runata mask'anayki kay llajtamanta cuentayoj kanampaj.

³⁴ Qanqa kayta ruway: Ajllay allinta kamachejkunata, paykuna tukuynejpi kamachimunankupaj, llank'achimunankupaj, jinaspataj trigota pisimanta pisi tantachinankupaj, chay qanchis wataspi sumajta poqoshajtin.

³⁵ Chay sumaj watas jamojpi trigota tantachunku tukuy runas yarqhay wataspi mikhunankupaj. Chayta tantachunku, qampa nisqaykiman jinataj llajtaspi waqaychachunku.

³⁶ Ajinamanta trigoqa kanqa runas mikhunankupaj ama yarqhaywan wañunankupaj, Egipto jallp'aspi manchay yarqhay kashajtin.

José Egiptopi kamachin

³⁷ Chay jinata Josej nisqanqa allin rijch'arqa faraonman, jinallataj kamachisninmampis.

³⁸ Chaymanta faraonqa nerqa: Waj runata tarisunmanchu kay runata jina Diospa espiritunniyojta?

³⁹ Josemantaj nerqa: Mana pipis kanchu qan jina sumaj yuyayniyoj, yachayniyoj runa. Dios qanmanqa yachachisunki kay tukuy imas kananmanta.

⁴⁰ Qan palacioypi kamachiy ari, tukuy runastaj qampa kamachisqaykita kasusonqanku. Noqalla qanmanta astawan kuraj kasaj, imaraykuchus noqaqa rey kani.

⁴¹ Noqa kay tukuynin Egiptota kamachinaykipaj ajllayki, churaykitaj.

⁴² Chayta niytawantaj faraonqa makinmanta sortejanta orqhokuytawan, chaypi karqa chay sellontawan Josej makinman churaykorqa. Chaymantataj kamacherqa sumaj lino p'achasta churanankuta, jinaspataj kunkanman churaykorqanku qorimanta ruwasqa walqata.

⁴³ Chaymantataj Josetaqa ujnin sumaj kaj carroman wicharicherqa; ñaupaqentataj qhaparispa rerqanku: Pasota qoychej!, nispa. Ajinata Josetaqa ajllaspa churarqanku kamachej kanampaj tukuy Egipto jallp'api.

⁴⁴ Faraontaj nerqa: Noqaqa faraonlla kani; kay tukuynin Egipto jallp'api, mana pipis makinta, nitaj chakintapis oqharenqachu, qan mana imatapis nejtiykeqa.

⁴⁵ Jinaspataj Josemanqa faraón churarqa Zafnat-panea sutita. Chaymantataj casaracherqa On llajtamanta sacerdote Potiferaj ususin Asenatwan. Ajinamanta Joseqa muyumorqa tukuy Egipto jallp'asta.

⁴⁶ Joseqa kinsa chunka watasniyoj karqa Egiptopi reyman pusashajtinku. Chaymanta Joseqa rishani niytawan faraompa ñaupaqenmanta rispa, qallarerqa tukuynin Egipto jallp'asta riyta.

⁴⁷ Chay wataspi mikhoyqa sumajta poqorqa oqhariy mana atinasta.

⁴⁸ Chay trigostaqa José waqaychacherqa qanchis wata junt'api; sapa llajtapi waqaychacherqa, chaykunapitaj sapa llajtaspi poqoykunasta wasi qayllaspi saqerqa.

⁴⁹ Joseqa chay wataspi trigota oqharerqa mar qocha t'iyuta jinapuni. Chay chhika trigota manaña pesaspachu jap'ej, jinallataña jallch'aj, imarayuchus mana yupay atina karqa.

⁵⁰ Manaraj chay yarqhay watas chayamushajtin Josejtaqa iskayña wawasnin karqa Asenat warmimpi.

⁵¹ Kuraj kajta suticharqa Manasesta, imaraykuchus nerqa: Dios qonqachiwan tukuy llakiyniyta, ayllusniytawan, nispa.

⁵² Sullk'a kajtataj suticharqa Efrainta, imaraykuchus nerqa: Dios niwan wawasniyoj kanayta runaj llajtampi may llakisqa ñak'arispa purisqaypi, nispa.

⁵³ Ajinamanta junt'akorqa chay qanchis watas, mayk'ajchus sumajta mikhuy poqorqa chay watas Egiptopi.

⁵⁴ Qallarikamorqankutaj qanchis yarqhay watas, José imaynatachus nisqanman jina. Sapa llajtaspi yarqhay karqa, Egiptollapi mana karqachu, jaqaypeqa mikhuna kallarqa.

⁵⁵ Egiptopi mikhuymanta pisipaspaqa rej kanku faraonmanta mañakoj. Faraontaj egipciosman nerqa: Riychej Josemanta mañakamuychej, ruwaychejtaj paypa nisqanta, nispa.

⁵⁶ Yarqhay tukuynej llajtaspi kajtintaj Joseqa, kicharerqa maykunapichus trigos jallch'asqas karqanku chaykunata egipciosman vendenampaj; imaraykuchus yarqhayqa astawan astawan yapakusharqa tukuynejpi.

⁵⁷ Tukuynin llajtasmanta Egiptoman jamoj kanku Josemanta trigota rantikoj, imaraykuchus manañapuni ni may llajtaspi imapis karqachu mikhunankupaj.