Génesis 38 - Qheshwa Biblia DC

Judawan Tamarwan

¹ Chaypacha Judaqa wauqesninmanta t'aqakuspa Adulam llajtaman tiyakoj riporqa, Hira nisqa runaj wasinman.

² Chaypi Judaqa rejsinakorqa uj cananeo Suaj nisqa runaj ususinwan. Chantá chay sipaswan casararqa.

³ Payqa wijsallikorqa Judapaj wawayojtaj karqa, suticharqataj Er nisqata.

⁴ Chaymanta wijsallikullarqataj, qhari wawallatataj nacechikorqa, suticharqataj Onanta.

⁵ Qhepaman ujtawan wawayojllataj karqa, chaytaqa suticharqanku Selata. Pay nacerqa Judá Quezib nisqapi kashajtin.

⁶ Judaqa kuraj Er wawanta casaracherqa Tamar nisqa sipaswan.

⁷ Erqa sajra runa karqa Señorpa ñaupaqempi, chayrayku paypa kausayninta Dios qhechorqa.

⁸ Chaymanta Judaqa Onan wawanmanñataj nerqa: Wañoj wauqeykej warminwan qanñataj casaray, ajinamanta qannejta wauqeykej miraynin kanampaj.

⁹ Onanqa yacharqa wauqempa warminnejta wawasnin nacejtenqa, mana paypa miraynin jinachu kananta. Chayrayku chay viudawan sapa kuti kaspaqa manapuni munajchu wijsayoj kananta, wauqempa miraynin ama paynejta kanampaj.

¹⁰ Chay jinata Onampa ruwasqampis manallataj walejchu karqa Señorpaj, chayrayku paypa kausaynintapis Señorqa qhechullarqataj.

¹¹ Chaymantataj Judaqa ñojch'an viuda Tamarman nerqa: Kunanqa jina viudallapuni kakuy tataykej wasimpi, sullk'a waway Sela jatunyanankama. Chayta Judaqa nerqa sullk'a wawan Selapis wañunallantataj yuyaspa. Jinamanta Tamarqa tatampa wasinman tiyakoj riporqa.

¹² Qhepa tiempomantaj Judaj warmin, Suaj ususin wañuporqa. Qhepamantaj Judaqa lutonta wijch'uytawan, Timnat llajtaman rerqa, maypichus ovejasnimpa millmasninta ruthusharqanku chayman; kausaqen adulamita Hirataj paywan rerqa.

^13-14 Tamartaj Timnatman suegron ovejasnimpa millmasninta ruthuchej risqanta yachaytawan, viuda p'achanta lluch'ukuspa rerqa velowan llijllaykukuspa ama pipis rejsinampaj. Chantá Enaim llajta punkuman tiyaykukorqa. Chaytaj karqa Timnatman rej ñampi. Chayta Tamarqa ruwarqa Sela ñapis jatunña kasqanta yuyaspa; chaywampis manarajtaj casaracherqankuchu Selawan.

¹⁵ Judaqa chay warmita rikuspa yuyarqa uj sajra puriy warmi kasqanta, imaraykuchus uyan qhatasqa karqa.

¹⁶ Ñanmanta ithirispataj chay warmiman qayllaykorqa parlapayaj, mana yachaspa ñojch'an kasqanta, nerqataj: Munawajchu kunan ch'isi noqawan puñuyta?, nispa. Chay warmitaj nerqa: Imatataj qowanki kunan ch'isi qanwan puñojtiyri?

¹⁷ Judataj nerqa: Cabrasniymanta uj malta chivota apachimusqayki. Warmitaj nerqa: Walejpacha, cheqatapuni apachimunawaykipajtaj uj señata saqeway imallatapis.

¹⁸ Judaqa, imatataj saqesqaykiri?, nerqa. Warmitaj nerqa: Saqeway sortejaykita, chumpiykita, makiykipi kashan chay tojnuykitawan. Judaqa chay tukuyta jaywarqa, jinaytawantaj paywan puñorqa. Jinamanta Tamarqa Judapaj wijsayoj rikhurerqa.

¹⁹ Chaymanta riytawan Tamarqa velonta lluch'ukuytawan viuda p'achanta churaykakaporqa.

²⁰ Qhepaman Judaqa uj cabra chivota apacherqa kausaqen adulamitawan, seña saqesqasninta chay warmi qopunampaj. Kausaqenri mana payta tariparqachu.

²¹ Paytaj chaypi tiyakoj runasta taporqa. Maytaj Enaimmanta qhola warmi ñan patapi tiyasharqa chay?, nispa. Paykunataj nerqanku: Mana noqaykoqa ima qhola warmitapis rikuykuchu, nispa.

²² Chaymanta Hiraqa kutipuspa Judaman willamorqa, nispa: Mana ima warmipis kanchu, chaypi tiyakoj runaspis niwanku, chaynejpi mana ima qhola warmipis kasqanta.

²³ Jina jap'ikuchun seña qosqasniyta, ama pipis noqanchejmanta alqochakunawanchejpaj nerqa. Noqaqa nisqayman jina apachiyki uj chivota, qantaj mana tarimunkichu chay warmita.

²⁴ Kinsa killamanta jinataj Judaman willaj jamorqanku, nispa: Qampa ñojch'aykeqa pi qhariwanchá karqa, chayrayku kunanqa wijsayoj kashan. Judataj may phiñasqa nerqa: Jawaman orqhoychej, ruphachiychejtaj!, nispa.

²⁵ Jawaman orqhoshajtinkutaj chay warmeqa willachimorqa, nispa: Pichus kay señasta saqewarqa chaypaj wijsayoj kani. Allinta qhawariy, rejsiy pejpatachus kasqanta, kay sorteja, kay chumpi, kay tojnupiwan.

²⁶ Judataj chay imasta qhawarispa rejsiytawan nerqa: Cheqamanta paypa nisqanqa allin, imaraykuchus noqaqa mana casarachinichu Sela wawaywan. Jinamanta Judaqa manaña jayk'ajpis chay warmiwan puñorqañachu.

²⁷ Tamartaj wachakunan tiempo chayamojtin wachakorqa iskay wawasta.

²⁸ Naceshaspataj ujnin kaj ñaupajta makinta jaywarqamorqa. Parterataj uj puka q'aytuwan makinman wataykorqa, kay ñaupajta llojsimun, nispa.

²⁹ Wawataj chay ratopacha makinta chinkaykucherqa. Jinamanta wauqenraj ñaupajta nacerqa. Chayrayku chay parteraqa chay wawata suticharqa Fares, nispa. Nerqataj: Qanqa campota kicharimunki!, nispa.

³⁰ Chaymanta ujñataj nacerqa, makimpi puka q'aytuyoj kaj; chaytataj suticharqa Zara nispa.