Génesis 37 - Qheshwa Biblia DC

Josej kausaynin

¹ Jacobtaj tiyakorqa Canaán jallp'api, maypichus tatan tiyakorqa chaypi.

² Kay jina karqa Jacobpa ayllumpa kausaynin. Chaypacha Joseqa chunka qanchisniyoj watasniyoj kasharqa; payqa ovejasta michimoj wauqesninwan khuska. Paykuna karqanku Bilhaj wawasnin Zilpajtawan; pikunachus karqanku Jacobpa tanta warmisnin. Joseqa sapa kuti tatanman willallajpuni chay wauqesnin mana allinta purisqankuta.

³ Israelqa mayta munakoj José wawanta tukuy wawasninmanta nisqaqa; imaraykuchus chay wawanta rejserqa machuyaynimpi. Chayrayku uj k'acha ponchota ruwaporqa.

⁴ Chaymanta wauqesnenqa reparakorqanku payllata astawan munakusqanta paykunamanta nisqaqa, ajinamanta chejnikuyta qallarerqanku, ni napaykullajpischu kanku.

^5-6 Uj kuti Joseqa imaynatachus mosqokusqanta wauqesninman willarqa, chaymanta paykunaqa astawan chejnikorqanku; imaraykuchus nerqa: Uyariwaychej imaynatachus mosqokusqayta willasqaykichej.

⁷ Kay jinata mosqokuni: Tukuyninchej campopi kashasqanchej, trigota q'apiy q'apiyta wataraspa. Ujllata noqaj trigo watasqay cheqanta sayaykun. Qankunaj trigo watasqasniykichejtaj noqay kajman muyuykuspa k'umuykunku.

⁸ Chaymanta wauqesnenqa kuticherqanku: Já, kaywanqa niytachu munashawayku qan reyniyku kanaykita, qanchu noqaykuta kamachiwasqayku?, nispa. Chaymanta astawanqa chejnerqanku imaynatachus willasqanmantawan.

⁹ Chaymanta Joseqa astawan mosqokullarqataj, chaymantataj wauqesninman willallarqataj, nispa: Uyariwaychej kay jinata mosqokuni: Intiwan killawan, chunka ujniyoj qoyllurkunapiwan noqaman k'umuykamushawasqanku.

¹⁰ Joseqa ajinata mosqokusqanta tatanman, wauqesninmanwan willajtintaj tatanqa k'amerqa, nispa: Imatataj niyta munanki kay mosqokusqaykiwanrí? Noqa, mamayki imachu qanman k'umuykuykuman kasqa?

¹¹ Wauqesnenqa chaymanta astawan chhoqonakorqanku, tatantaj anchata chay mosqokusqampi yuyasharqa.

Joseta wauqesnin vendenku

¹² Uj p'unchaytaj wauqesnin tatampa ovejasninta qhaterqanku Siquem nisqa lugarman chaypi michimunankupaj.

¹³ Chanta qhepamantaj Israelqa José wawanman nerqa: Wauqesniyki Siquem lugarpi ovejasta michimushanku. Noqa munani qan rinaykita paykunata waturej. Paytaj yastá, nerqa.

^14-15 Israeltaj nerqa: Ya, kunanqa rispa qhawarimuy wauqesniykita, ovejaspis imaynachus kashanku chaytawan, jinaspataj jamunki willawaj. Israelqa wawan Joseta kacharqa valle Hebronmanta. Siquemman chayaspataj Joseqa, ñanta chinkacherqa: jinata purishajtintaj uj runa chaynejpi paywan tinkukuspa taporqa: Imata mask'aspataj purishankiri?, nispa.

¹⁶ Josetaj nerqa: Wauqesniyta mask'aspa purishani. Qan manachu rikunki chaynejpi ovejasta michishajta?

¹⁷ Chay runataj nerqa: Kaymanta ripunkuña. Chaywampis uyarerqani ninakojta, Dotanman qhatina, nejta. Joseqa chaymanta kachaykukorqa wauqesninta mask'aspa, mask'aspataj Dotampi tarimorqa.

¹⁸ Wauqesnintaj karumantaña jamushajta rikorqanku, manaraj pay qayllaykamushajtintaj paykunaqa wakichikorqanku wañuchinankupaj.

¹⁹ Chantá ninakorqanku: Qhawariychej sumajta mosqokoj runa jamushan!

²⁰ Jamuychej wañuchisunchej; chaymantataj uj ch'aki pujyuman wijch'uykusunchej, nisuntaj: Ima sajra animalchá mikhuykun, nispa. Chaymantá qhawarisunchej imachus mosqoyninwan kanqa chayta!, nispa.

²¹ Rubentaj chayta uyarispa, wauqesnin wañuchinankuta yuyaspa nerqa: Ama wañuchinachu.

²² Ama yawartaqa ch'ajchuychejchu. Kay ch'impi ch'aki pujyuman wijch'uykuychej, ama paymanqa makiykichejta churaychejchu. Rubenqa chayta nerqa Joseta librananrayku, chantá tatampaman kachapunampaj.

²³ José paykunaman qayllaykojtintaj wauqesnenqa ponchonta qhechorqankupacha, mayqentachus José churasqa kasharqa chayta.

²⁴ Jap'iytawantaj pujyuman choqaykorqanku. Chay pujyoqa ch'usajlla mana yakuyoj karqa.

²⁵ Chaymantataj mikhoj tiyaykorqanku. Mikhushaspataj ujllata qhawarispa rikorqanku ismaelitas sinrulla Galaadmanta jamushajta. Chay runasqa camellospi apasharqanku perfumeta, balsamota, mirrata ima Egiptoman.

^26-27 Chaymantataj Judaqa nerqa wauqesninman: Ima allintataj noqanchej ruwasun wauqenchejta wañuchispari, chaymantataj wañusqata pakaspari? Ama jina kanampajtaj ismaelitasman vendeykuna wañuchinanchejmanta nisqaqa. Imaraykuchus Joseqa wauqenchej, nispa. Wauqesnintaj chay nisqanta, ajina kachun nerqanku.

²⁸ Madianitas qhatuspa purejkunataj chaynejta jamusharqanku; Joseta pujyumanta aysarqoytawan chay ismaelitasman vendeykorqanku iskay chunka qolqepi. Ajinamanta Josetaqa Egiptoman pusakaporqanku.

²⁹ Rubentaj kutimuspa pujyuta qhawaykuytawan mana tarerqachu Josetaqa, llakiywantaj p'achasninta llik'ikorqa llakisqa kasqanta rikuchinampaj.

³⁰ Maypichus wauqesnin kasharqanku chayman kutispataj paykunaman nerqa: Waynaqa mana kanchu! Kunanqa imanasajtajri?, nispa.

^31-32 Wauqesnintaj Josej ponchonta qhechusqankuta, uj malta chivota ñak'asqankoj yawarninman chhaporqorqanku; chaymantataj tatankuman apacherqanku ruwapusqan qhoysu poncho yawarchasqata, nerqankutaj: Kayta tariyku, qantaj allinta rejsiy, wawaykej ponchonchus manachus chayta.

³³ Jacobtaj chayta rejsiytawan nerqa: Arí, wawaypata kayqa! Ima sajra animalchari wawaytaqa mithaspa mikhuykun.

³⁴ Chaymanta Jacobqa p'achasninta llik'ikorqa, jinaspataj lutota churakorqa unayta, wawan chinkapusqanmanta.

³⁵ Tukuy qhari wawasnin, warmi wawasnin ima payta sonqochayta munarqanku, paytaj mana imaynapi sonqochakuyta aterqachu; mayta waqaspa nerqa: Noqaqa kay p'achata churakusaj, wañusqaspa chaupimpi wawaywan tinkumunaykama, nispa.

³⁶ Madianitastaj Egiptoman chayaytawan Josetaqa Potifarmanñataj vendeykorqanku; pay karqa Egiptopi rey faraompa oficialnin, capitannintaj.