Génesis 35 - Qheshwa Biblia DC

Dios bendicin Jacobta Betelpi

¹ Dios nerqa Jacobman: Jatarikuy, Betelman tiyakoj ripuy. Chaypi uj altarta ruwanki, wauqeyki Esaumanta ayqeshajtiyki rikhurisorqa chay Diospaj.

² Chaymanta Jacobqa nerqa familianman, pikunachus paywan risharqanku chaykunamanwan: Qankuna ukhupi tukuy laya dioskunata orqhoychej, jinaspataj mayllakuychej, p'achasniykichejtapis cambiakuychej.

³ Usqhayllata risunchej Betelman; chaypi ruwamunay tiyan uj altarta, llakisqa kashajtiy yanapawaj Diosman, Pay yanapawan tukuy puriyniypi.

⁴ Jinata Jacob nejtintaj tukuy imaymana lantisninkuta Jacobman jaywarqanku, ningrisninkupi apaykachaj kanku chay zarcillosninkutawan. Jacobtaj chaykunata jallp'aman p'ampaykorqa encina sach'a uraman Siquem qayllaman.

⁵ Paykuna chaynejmanta llojsejtinkutaj Dios qorqa manchachikuyta, chay qayllasnimpi kaj llajtas manchachikunankupaj. Chayrayku Jacobpa wawasninta mana qhaterqankuchu.

⁶ Jacobqa tukuy runasninwan chayarqa Luz llajtaman, chay llajtajta ujnin sutin kallarqataj Betel nisqa; chayqa karqa Canaán jallp'api.

⁷ Chaypi ruwarqa uj altarta, suticharqataj Betelta chay cheqata. Imaraykuchus Dios rikhurerqa wauqen Esaumanta ayqekushajtin chay cheqapi.

⁸ Chaypi wañuporqa Débora Rebecaj kamachin. Payta p'amparqanku encina sach'a uraman, Betel qayllapi. Jacobtaj chay p'ampasqa cheqata, llakiy encina, nispa suticharqa.

^9-11 Ujtawan Dios rikhurerqa Jacobman Padan-aranmanta kutimushajtin, nispa: Sutiykeqa Jacob, kunanmantari manaña jinachu sutiyki kanqa, manachayqa Israel kanki. Waj sutiwan sutichaspataj, nerqa: Noqa tukuy atiyniyoj kani. Wawasniyki ashkhata mirachun, mirayniyki ashkha kanampaj. Qanmanta ashkha naciones llojsenqa, ashkha llajtas; chay mirayniykimanta reyespis llojsenqanku.

¹² Abrahamman Isaacmanwan qorqani chay jallp'ata qanmampis qollaykitaj, qan wañupojtiykitaj mirayniykiman qosaj.

^13-14 Jacobqa qayllanmanta, Dios ripojtinkama, uj rumita oqhariytawan sayacherqa, maynejpichus Dios parlarqa chaypi. Chay rumi sayachisqanmantaj jich'aykorqa aceiteta vinotawan.

¹⁵ Chay cheqatataj suticharqa Betelta.

Raquel wañupun

¹⁶ Chaymantataj rerqanku Efrata qayllaman, chaypi Raquelqa uj wawata nacechikorqa ñak'ayta.

¹⁷ Mana nacechikuyta atispa ñak'arishajtin partera nerqa: Ama manchachikuychu, wawaykeqa qhari, nispa.

¹⁸ Raqueltaj nacechikuspa wañupushaspaña, ñak'ayllataña wawata suticharqa, Benoni, nispa. Tatantaj suticharqa Benjaminta.

¹⁹ Ajinata Raquelqa wañuporqa. Chaymantataj p'amparqanku Efrata ñampi, mayqenchus Belén kashan.

²⁰ Jacobqa uj chukuta ruwarqa aya p'ampasqa patapi. Chay perqaqa kashallanrajpuni, Raquelpa p'ampakusqanta señalaspa.

²¹ Israeltaj chaymanta riporqa, jarakorqataj Edar torremanta aswan jaqaynejpi.

²² Uj kutitaj chaynejpi Israel tiyakushajtin, kuraj wawan Rubén Bilhawan puñuykorqa, chaytaj tatan Jacobpa tanta warmin karqa. Paytaj chayta yachaytawan maytapuni phiñakorqa. Jacobpa wawasnenqa chunka iskayniyoj karqanku.

Jacobpa wawasnin

²³ Leapi Jacobpa kuraj kaj wawanqa karqa Rubén; sullk'astaj Simeón, Leví, Judá, Isacar, Zabulón ima.

²⁴ Raquelpi kajkunataj karqanku: Josewan Benjaminwan.

²⁵ Raquelpa kamachin Bilhapi kajkunataj karqanku, Danwan Neftaliwan.

²⁶ Leaj kamachin Zilpapi kajkunataj karqanku Gadwan Aserwan. Chaykuna karqanku Jacobpa wawasnin Padan-arampi nacejkuna.

Isaac wañupun

²⁷ Jacob Mamreman rerqa tatan Isaacta watukoj, mayqen llajtachus Arba, chayrí Hebrón nisqallataj karqa. Chaypi tiyakorqanku Abrahamwan, wawan Isaacwan.

²⁸ Chaypacha Isaacqa pachaj chunkayoj watasniyoj karqa.

²⁹ Chaymantataj wañupuspa ñaupa tatasninwan tinkukoj riporqa; payqa wañuporqa allin achachiña. Chaymantataj wawasnin Esauwan Jacobwan payta p'amparqanku.