Génesis 32 - Qheshwa Biblia DC

Jacob Esauwan tinkunampaj wakichikun

¹ Jacobqa chaymanta ripullarqapuni. Diospa angelesnintaj payta taripaj jamorqanku.

² Jacobtaj paykunata rikuspa nerqa: Kayqa Diospa ejérciton, nispa. Chayrayku chay cheqata suticharqa Mahanainta.

^3-4 Chaynejmanta Jacob kacharqa kachasta Seirman, Edom chaynejman; willamunankupaj wauqen Esauman pay chayapushasqanta, ajinata nichispa: Niychej wauqey Esauman: Wauqeyki kamachiyki Jacob nichimusunki: Labanwan kamorqayku, chayrayku mana usqhayta jamunichu.

⁵ Kunantaj tiyapuwan wakas, burros, ovejas, warmi kamachis, qhari kamachis ima. Kayta nichimuyki wiraqochíy, qampa ñaupaqeykipi khuyakuyta tariyta munaspa.

⁶ Chay kachastaj kutirimuspa Jacobman willarqanku: Riyku wauqeyki Esauman tinkoj. Kunantaj qanta taripasoj jamushanña tawa pachaj runaswan.

^7-8 Paytaj chayta uyariytawan mayta mancharikorqa, maytataj unanchakorqa imatachus ruwayta atinampaj. Chay ratopacha iskay t'aqararqa pischus paywan kasharqanku chaykunata. Jinallataj wakasta, ovejasta, camellosta, ima, yuyaspa: Sichus chay Esaú ñaupaj kaj t'aqawan maqanakonqa chayqa, qhepan kaj t'aqaqa ayqekonqa, nispa.

⁹ Chaymantataj Jacobqa Diosmanta mañakuyta qallarerqa: Señor, abueloy Abrahampa Diosnin, tatay Isaacpatawan Diosnin, qan niwarqanki ayllusniypaman, jallp'ayman kutipunayta, niwarqankitaj noqawan kanaykita allin rinawampaj.

¹⁰ Mana cheqa kayniykiwan khuyanawaykipaj jinachu kani. Noqa Jordán mayuta chimpamorqani ni imawan, tojnuy oqharisqalla; kunanqa tiyapuwan iskay jaras.

¹¹ Chayrayku Señorníy, libraway ari wauqey Esaupa makinmanta. Manchachikuni jamuspa wañuchinawanta; warmisniyta, chanta wawasniytapis wañurachinanta.

¹² Qan niwarqanki allin rinawanta tukuy imapi, mirayniypis mar qocha t'iyu jina kananta mana yupay atina.

^13-15 Chay ch'isi chaypi Jacob puñorqa, jinaspataj wauqen Esauman qonampaj ajllarqa imachá kapusqanmanta: Iskay pachaj cabrasta, iskay chunka chivostawan; iskay pachaj ovejasta, iskay chunka orqo ovejastawan; juch'uy uñasniyoj kinsa chunka camellosta, tawa chunka wakasta, chunka torostawan; iskay chunka china burrosta, chunka orqo burrostawan.

¹⁶ Chaykunatataj kamachisninman qhaticherqa waj wajllata sapa t'aqata, ajinata kamachispa: Ñaupaychej kunanqa sapa ujniykichej karukarullata qhatirikuspa sapa uj t'aqata.

^17-18 Ñaupajta rej kajman nerqa: Wauqey Esauwan tinkuspa tapusojtin: Pitaj patronniyki, maymantaj rishanki, pejpa uywasnintataj qhatishanki, nisojtenqa, ninkipacha: Wiraqochíy, kay uywasqa qampaj, kamachiyki Jacob apachimushasunki. Payqa qhepataraj jamushan.

¹⁹ Kikillantapuni nerqa iskay kajman, kinsa kajman, tukuynin p'iti p'itillata qhatejkunaman, nispa: Qankunapis kikillantataj ninkichej Esauwan tinkuspa.

²⁰ Chanta nillankichejtaj: Kamachiyki Jacobqa qhepaykutaraj jamushan. Jacobqa yuyarqa: Phiñakuyninta thasnusaj kay tukuy imata qorisqayta ñaupajta apachispa, chaymanta uya purakullasqayku. Ichapis ajinamanta manaña phiñakuwanqachu, walejllata tinkukusqayku, nispa.

²¹ Ajinata ñaupajta tukuy ima qorisqanta apacherqa, jinaspataj chay ch'isi jarampi puñorqa.

Jacob maqanakun uj angelwan

²² Chay ch'isitaj Jacobqa rijch'ariytawan riporqa pusariykukuspa iskaynin warmisninta, iskaynin kamachisninta, chunka ujniyoj wawasnintawan. Jinata rispa Jacobqa Jaboc wayq'ota chimparqa.

²³ Ajinata payqa chay wayq'ota tukuy ayllunta chimpacherqa, tukuy imasnintawan khuska.

²⁴ Chaypitaj Jacobqa sapallan qhepakorqa. Jinallaman uj qhari rikhurimorqa, chaytaj Jacobwan maqanakorqa sut'iyamunankama.

²⁵ Chay qharitaj Jacobta mana atipayta atispa, chakampi sajmaspa k'inkiykachacherqa jinata maqanakushaspa.

²⁶ Chay qharitaj nerqa: Kachariway, ñapis sut'iyamushanña. Jacobtaj nerqa: Bendiciway, manachayqa manapuni kacharisqaykichu, nispa.

²⁷ Chay qharitaj taporqa: Imataj sutiyki?, nispa. Paytaj nerqa: Jacob kani, nispa.

²⁸ Chanta chay qhareqa nerqa: Kunanmanta manaña Jacobchu sutiyki kanqa. Kaymanta qhepaman Israel kanqa sutiykeqa; imaraykuchus Dioswan maqanakunki, runaswan ima, atipankitaj.

²⁹ Chaymanta Jacobqa taporqa: Qampa sutiykiri imataj?, nispa. Chay qharitaj nerqa: Imapajtaj qan sutiyta watuwankiri?, nispa. Jinata nispataj chay kikimpi Jacobta bendicerqa.

³⁰ Jacobqa chay cheqata suticharqa Penuel, nispa; imaraykuchus Dioswan tinkunakuyku, chay tukuywampis kausashaniraj, nispa.

³¹ Inti llojsimushajtintaj Jacobqa chay Penuelmanta llojserqa, chakan nanasqa kajtin k'inkiykachaspa.

³² Chayrayku kunankama Israelpa mirayninkunaqa mana mikhunkuchu uywaspa chakan chaynejpi untusta; imaraykuchus Jacob chaynimpi k'irinchasqa karqa.