Génesis 31 - Qheshwa Biblia DC

Jacob wakichikun ripunampaj

¹ Jacob uyarerqa Labampa wawasnin nisqankuta: Jacobqa tatanchejpa tukuy kapuyninta jap'ikapun, chaywan qhapajyaykun, nispa.

² Chanta Jacobqa reparallarqataj, Labanqa manaña ñaupajta jinachu payta munakuywan qhawasqanta.

³ Chaymanta Señorqa Jacobman nerqa: Kutipuy jallp'aykiman, tatasniykej jallp'anman, maypichus ayllusniyki kashan chayman, noqataj qanwan kasaj.

⁴ Jacobtaj wajyachimorqa Raquelta, Leatawan taripaj rinankupaj, maypichus ovejasninwan kasharqa chayman.

⁵ Chayajtinkutaj nerqa: Noqa reparakuni, tataykichejqa manaña ñaupajta jinachu qhawawasqanta; chaywampis tataypa Diosnenqa noqawampuni kashan.

⁶ Qankuna yachankichej maytachá atisqayta paypaj llank'anipuni.

⁷ Payri sapa kuti ch'aukiyawan, chunka kutikama pagoyta waj jinayachin. Chaywampis Señorneyqa mana saqenchu ni ima sajrata ruwawajta.

⁸ Chayrayku nerqa: Sañi ovejasta qopusqayki, tukuynin ovejas alqas kajtintaj, niwan: Tukuy alqasninta qopusqayki, nispa; uñastaj alqasllapuni karqa.

⁹ Ajinamanta Diosqa uywasninta qhechun, noqaman qonawampaj.

¹⁰ Uj kuti, uywas chajrukusharqanku chaypacha mosqokorqani; chaypi rikorqani orqos kajkuna chinasman lloq'asharqanku chaypacha karqanku, ch'ejchis, sañis ima.

¹¹ Chay mosqoyniypi Diospa angelnin sutiymanta wajyawarqa, noqataj kuticherqani, kaypi kashani, nispa.

¹² Chay angelqa niwarqa: Allinta qhawariy, rikunki tukuy orqos kajkuna, chinasman lloq'ajkuna alqas, sañis, ch'ejchis ima kanku. Noqa rikuni imaynatachus Labán ruwasusqanta.

¹³ Betelpi rikhurisorqa chay Dios noqa kani, maypichus qan niwarqanki imatachus ruwanaykita, uj rumita sayachispa chayman aceiteta jich'aspa. Kunanqa jaku, sayariy, ripuy kay jallp'amanta, kutipuy maypichus nacerqanki chayman, nispa niwarqa.

¹⁴ Chayta nejtintaj Raquelwan Leawan nerqanku: Noqaykojtaqa manaña ima chayaqeykupis kanchu tataykoj wasimpi.

¹⁵ Noqaykutapis waj runasta jinallaña qhawawayku. Chanta vendewaykutaj. Qan noqaykuwan casaranaykipaj pagasqaykitapis mikhuykakapun.

¹⁶ Cheqamanta tataykumanta tukuy kapuyninta Dios qhechusqanqa, noqanchejpata, wawasninchejpatawan. Ajina kajtenqa qan ruway ari imatachus Dios nisunki chayta.

Jacob ripun Padan-aranmanta

¹⁷ Jacobtaj wakichikuytawan ripunampaj wawasninta, warmisnintawan camellosman lloq'aykucherqa.

¹⁸ Jinaspataj tukuy uywasninta qhatiriykukorqa, Padan-arampi ima uywastachus ganakusqasninta; Canaanman tatan Isaacpa wasinman kutipunampaj.

¹⁹ Chaykamataj Labanqa ovejasnimpa millmasninta ruthusharqa. Raqueltaj tatampa lantisninta suwarqa.

²⁰ Ajinata Jacobqa ch'inllamanta riporqa arameo Labanman mana ripushani nispalla.

²¹ Ayqeporqa tukuy imanwan. Chaymantaqa chimparqa Eufrates mayuta, chaymantapis rillarqapuni Galaad orqokama.

Labán Jacobta qhatirin

²² Kinsa p'unchaymantaña Labanqa yacharqa Jacob ayqepusqanta.

²³ Chaymantaqa ayllusninta mink'arikuspa, chaykunawan Jacobpa qhepanta kacharikorqa. Qanchis p'unchay puriyta rispa Galaad orqopi taripamorqa.

²⁴ Chay ch'isitaj arameo Labanman Dios mosqoypi nerqa: Uyariway, Jacobta ama phiñasqa parlapayankichu, nispa.

²⁵ Labanqa Jacobta tariparqa Galaad orqopi jarasqa kashajtin. Paypis chaynejllapitaj jarakorqa mink'asqa ayllusninwan.

²⁶ Jinaspataj Jacobman nerqa: Imatataj kayta ruwawankiri? Imaraykutaj jinata ch'aukiyawankiri? Wawasniyta pusampuwanki guerramantapis jap'isqas kankuman jina.

²⁷ Imaraykutaj mana ima niwaspalla pakayllamanta ayqemunkiri? Yachaspaqa sumaj kusiywan kacharpayamuykiman karqa, cajata, arpata tocajkunawan.

²⁸ Mana saqewankichu wawasniyta, allchhisniyta much'aykurejllatapis. Loco jina kaytaqa ruwanki.

²⁹ Noqamantaqa atiykichejman karqa imatapis qankunata ruwayta; kunanrí mana atiykichejchu, tataykej Diosnin ch'isi niwan: Sumajta qhawarikuy, Jacobta ama may phiñasqa parlapayankichu, nispa.

³⁰ Sichus tataykej wasinmampuni kutiyta munanki, chayraykutaj kaykamapis jamunki chayqa, imaraykutaj lantisniyta suwampuwankiri?

³¹ Jacobtaj Labanman kuticherqa: Noqaqa manchachikorqayki. Yuyarqani wapuchaspa wawasniykita qhechunawaykita.

³² Sichus kaypi mayqempa makimpi dioskunasniyki kashan chayqa, wañonqa. Ayllusninchej yachashanku: Niway imaykitachus suwasusqayta, rikushajtinkutaj apakapuy imaykita suwamuni chayqa. Imaraykuchus Jacobqa mana yacharqachu Raquelnin lantisninta suwamusqanta.

³³ Chaymanta Labanqa Jacobpa jara toldon uqhuman yaykorqa lantisninta mask'akapoj. Chaymantaqa Leajmanñataj yaykorqa; chaypipis mana kajtintaj chay iskay warmi kamachisnimpamanñataj yaykorqa. Chaypipis manapuni tarikaporqachu. Leajmanta llojsispataj Raquelpamanñataj yaykorqa.

³⁴ Paytaj lantista jap'iytawan camelloj monturan uraman sat'iykorqa, jinaspataj patanman tiyaykorqa. Labanqa tukuy imas ukhuta mask'aspa manapuni tarikaporqachu lantisninta.

³⁵ Jinajtintaj Raquelqa tatanman nerqa: Tatáy, ama phiñakuychu, ñaupaqeykipi mana sayarisqaymanta, kunan killay jamushawan, chayrayku mana jatariyta atinichu. Jinamanta Labanqa lantisninta mask'aspa manapuni tarikaporqachu.

³⁶ Jacobtaj phiñarikuytawan jatarispa Labanta k'amerqa: Imatataj mana allinta ruwanichuri? Imastaj juchayri, chay jinatapuni qhatirimunawaykipajri?

³⁷ Chay jinataña tukuy imasniy ukhuta mask'anki, imaykitataj tarikapunkiri? Churanoqay ayllusniykej ñaupaqenman, ayllusniy rikushajtin, paykuna ninankupaj mayqenchus juchayoj kasqaykuta.

³⁸ Chay iskay chunka watasta qampaj llank'apuyki, ni jayk'aj ovejasniyki sullorqachu, nitaj cabrasniykipis; nitaj jayk'ajpis uj ovejallaykitapis mikhuykunichu.

³⁹ Ni jayk'aj sajra animalespa mikhusqasninta apamojchu kayki; manachayqa qopoj kayki chay mikhusqasmanta. Sichus ch'isin, chayri p'unchaynin suwaj kanku chaymantapis mañakapuwaj kanki jinallataj chinkasqasninmantapis.

⁴⁰ Noqaqa kaj kani, p'unchay q'oñita muchuspa, tutantaj chirita muchuspa, mana puñusqataj.

⁴¹ Iskay chunka watasta wasiykipi karqani, chaymanta kaykuna chayawan: Iskaynin ususisniykirayku chunka tawayoj watasta llank'aporqayki, uywasniykiraykutaj sojta watata. Sapa kutitaj pagoyta uj jinayachej kanki.

⁴² Jinaqa, sichus Abrahampa Diosnin, tatay Isaac yupaychan chay Dios mana noqawanchu kanman karqa chayqa, qanqa mana imayojta kacharpayamuwankiman karqa. Chayrayku Diosniy llakiyniyta rikuwan, imaynatachus llank'apususqayta. Chantamá á ch'iseqa k'amisunki.

Jacobwan Labanwan uj tratota ruwanku

⁴³ Chaymanta Labanqa Jacobman nerqa: Warmisniykeqa wawasniy, wawasniykeqa allchhisniy; kay ovejasqa ovejasniy; tukuy imasniykipis noqajta. Chaywampis noqaqa imanasajtaj wawasniyta, wawasninku allchhisniytapisrí?

⁴⁴ Chayrayku kunanqa jamuy; qanwan noqawan ruwanachej uj tratota, noqanchej ukhupi iskayninchejpaj allin kanampaj.

⁴⁵ Jinata nejtintaj Jacobqa uj rumita oqharispa cheqanta pañannejman sayaykucherqa.

⁴⁶ Ayllusninmantaj nerqa: Rumista tantamuychej, nispa. Paykunataj tantamorqanku rumista uj qontuta ruwanankupaj. Jinaspataj chay rumi qontu patapi mikhorqanku.

⁴⁷ Labantaj chay mikhusqanku cheqata parlaynimpi suticharqa, “Jegar Sahadurata.” Jacobtaj parlaynimpi suticharqa “Galaadta”.

⁴⁸ Chaymantataj Labanqa nerqa: Kunan, kay rumi qotoqa kanqa uj señal, iskayninchej tratota allinyakuspa kaypi ruwasqanchejta yachanankupaj. Chayrayku kay cheqaj sutenqa Galaad.

⁴⁹ Sutichallarqankutaj Mizpata, imaraykuchus Labán nerqa: Kunanqa Señor waqaychawasunchej qanta, noqata, kaymanta qhepaman mana rikunakojtinchej qanwan noqawan.

⁵⁰ Sichus kaymanta qhepaman wawasniyta llakichipuwanki, chayri waj warmiswantaj casaranki chayqa, Dioslla rikusonqa, noqanchejqa manaña rikunakusunchu.

⁵¹ Chaywampis nillarqapuni Labanqa: Qhawariy, kay rumis qontu, qanmanta noqamantawan t'aqaj rumis sayachisqayqa uj señal kanqa.

⁵² Kay rumis qontu, kay rumi chuku sayachisqaqa kanqa uj señal ni qan, nitaj noqa pasanakunanchejpaj kay mojonta ama imata ruwanakunanchejpaj.

⁵³ Abueloyki Abrahampa Diosnin, abueloyki Nacorpatawan Diosnin cheqanchawasunchej. Chaymanta Jacobqa jurarqa, mayqen Diostachus tatan Isaac yupaycharqa chaypa sutimpi.

⁵⁴ Chaymantaqa Jacob uj rikuchikuta Diosman qorqa chay orqopi, jinaspataj tukuy ayllusninta wajyarqa mikhunankupaj. Ajinata tukuyninku mikhorqanku, chay orqopitaj karqanku sut'iyanankama.

⁵⁵ Labanqa q'ayantin tutamanta jatarispa wawasninta, allchhisnintawan much'ararqa. Jinaspataj bendiciytawan wasinman kutiporqa.