Génesis 28 - Qheshwa Biblia DC

¹ Chaymanta Isaacqa Jacobta wajyachispa bendicerqa, kamacherqataj: Qanqa amapuni pusarikunkichu kay Canaán llajtayoj warmista.

² Manachayqa riy Padan-aranman abueloyke Betuelpa wasinman, chaypi casaranki tioyki Labampa ujnin kaj ususinwan.

³ Tukuy atiyniyoj Dios bendicisuchun, ashkhayachisuchun, mirayniykita mirachichun, qanmanta ashkha naciones kanankupaj.

⁴ Qanman mirayniykimanwan bendicionninta qosuchun, imatachus Abrahamman qosqayki nerqa chayta, kay jallp'ata jap'ikapunaykichejta, mayqempichus kunan tiyakushanchej karu llajtayojpis kasunman jina. Kay jallp'ataqa Dios qorqa Abrahamman.

⁵ Ajinata Isaacqa wawan Jacobta kacharpayarqa Padan-aranman Jacobqa chayarqa arameo Betuelpa wawan Labampa wasinman. Pay karqa Rebecaj turan, Esaujta, Jacobpatawan mamankojta.

Esaú casaran

⁶ Esaú yacharqa tatan Isaac Jacobta bendicisqanta, Padanaranman kachasqanta chaypi casaramunampaj. Chanta reparallarqataj bendicishaspa Jacobman nisqanta Canaanmanta kaj warmiswan casarananta.

⁷ Reparallarqata; Esauqa Jacobqa risqanta Padan-aranman tatampa nisqanta, mamampa nisqantawan kasuspa.

⁸ Ajinamanta Esauqa yacharqa tatasnimpaj mana allinchu kasqanta Canaán warmiswan casarana.

⁹ Chayrayku rerqa Ismaelpaman Abrahampa wawampaman. Chaypitaj pay casararqa ujnin kaj ususinwan, pay karqa Mahalat, Nebaiotpa panan. Ajinata paywampis casarallarqataj, iskay cananea warmisnin kashajtin.

Betelpi Dios rikhurin Jacobman

¹⁰ Jacob Beersebamanta llojsispa Harán ñanta risharqa.

¹¹ Chaymanta chayarqa uj cheqaman, chaypitaj uj ch'isi qhepakorqa, imaraykuchus ch'isiyaykuchikorqa. Chaypi puñorqa uj rumita saunaykukuspa.

¹² Chaypi mosqokorqa, uj escalera pampamanta cielokama chayashajta, Diospa angelnintataj chayta uraykamushajta wicharishajtataj.

¹³ Jinallataj paypa ñaupaqempi Señor sayashajta, payman nishajta: Noqa kani Señor, abueloyki Abrahampa Diosnin, tatayki Isaacpatawan. Qanman mirayniykimanwan qosqayki kay jallp'ata, maypichus puñushanki chayta.

¹⁴ Mirayniykeqa ashkhata miranqa mana yupay atina jallp'a t'iyu jina; paykuna junt'anqanku patanejman, uranejman, inti llojsimuynejman, inti yaykuynejman. Tukuy ayllus qannejta bendicisqas kanqanku, jinallataj mirayniykinejtapis.

¹⁵ Noqa qanwan kashani, noqa waqaychasqayki maymampis rejtiyki, kutichimusqaykitaj kay jallp'allamantaj. Mana saqerparisqaykichu, imatachus qosunay kajta qosunaykama.

¹⁶ Jacobqa puñusqanmanta rijch'ariytawan, nerqa: Cheqamanta Señor kaypi kashan, noqaqa mana yacharqanichu.

¹⁷ Anchatataj manchachikorqa, nispa: Kayqa Diospa wasin, janaj pacha punkutaj.

¹⁸ Q'ayantintaj Jacobqa tutamanta jatarerqa. Saunakorqa chay rumita oqharispataj, cheqanta sayaykucherqa, aceitewantaj jich'aykorqa.

¹⁹ Chay cheqapi ñaupajta karqa uj llajta, Luz sutiyoj. Jacobtaj waj sutita churara, Betel sutiyoj kanqa, nispa.

^20-21 Chaypi Jacobqa nerqa imatachus ruwananta: Sichus Dios pusaykachashawan, kay purisqaypi waqaychashawan; mikhuchishawantaj, p'achachishawantaj; sitajchus allillanta kutipusaj tataypa wasinman chayqa, Señorqa noqaj Diosniy kanqa.

²² Kay rumita sayachisqayqa Diospa wasin kanqa. Diosníy, qosqaykipuni sapa chunkamanta ujta tukuy ima qowasqaykimanta.