Génesis 27 - Qheshwa Biblia DC

Isaacqa Jacobta Esautawan bendicin

¹ Isaacqa chaypacha allin machuña karqa, ñawimpis manaña rikorqachu. Uj kuti kuraj wawan Esauman nerqa: Wawáy! Imata ninki tatáy, nispa Esauqa kuticherqa.

² Isaacqa nerqa: Noqaqa, wawáy, allin machuña kani, wañuy patapi, mana yachanichu mayk'ajchus wañunayta.

³ Chayrayku noqaqa niyki monteman rinaykita, arcoykita, flechaykitawan oqharikuspa ima animaltapis jap'ispa apampunawaykipaj.

⁴ Jinaspataj sumaj aycha mikhuyta wayk'upuwanki munasqayman jina; apamuwankitaj mikhunaypaj, amaraj wañushaspa kuraj wawa kaspa jap'inayki bendicionniykita qopusqayki.

⁵ Rebecataj chayta uyarisharqa imatachus Isaacqa wawan Esauman nishajta. Chaymantataj Esauqa monteman rerqa ima animalllatapis tatampaj jap'impunampaj.

⁶ Rejtinkamataj Rebecaqa sullk'a kaj wawan Jacobman nerqa: Uyarini, Esauman tatayki nishajta:

⁷ Rispa ima animalllatapis jap'impuway, sumaj aychapuruta wayk'upunawaykipaj mikhunaypaj; jinaspataj amaraj wañushaspa kuraj wawa kaspa jap'inayki bendicionniyta qopusqayki Señorpa ñaupaqempi.

⁸ Chayrayku wawáy, sumajta uyariway imatachus nisqayki chayta:

⁹ Kunampacha rerqoy uywasinchej kashan chayman, apamunkitaj cabrasninchejmanta iskay sumachajnin kaj lechonesta; chaymanta noqa wayk'orqosaj sumaj aychapuruta tataykej munasqanta.

¹⁰ Qantaj chaytaqa jaywamunki mikhunampaj, ajinamanta qanman qosunampaj kuraj wawaj jap'inan bendicionninta amaraj wañushaspa.

¹¹ Jacobqa Rebeca mamanman nerqa: Qhaway, wauqeyqa thapulla, noqataj mana.

¹² Tatayqa sichus llujchiwanqa chayqa rejserpariwanqa á, yuyanqataj paymanta alqochakusqayta. Jinamanta maldiciwanqa, bendicionninta qonawanmanta nisqaqa.

¹³ Mamantaj nerqa: Noqaman chay maldicionqa urmamuchun wawáy. Kunanqa rillayña, imatachus nisusqayta ruway; usqhayta oqharimuy iskay cabrasta.

¹⁴ Jacobqa usqhay usqhayta kachaykukuspa cabrasta aparqamorqa mamanman. Rebecataj aychapuruta sumaj q'apashajta wayk'orqa, Isaac qosan munasqanman jina sumaj misk'ejta mikhuykunampaj.

¹⁵ Chaymantaqa orqhorqa kuraj wawan Esauj wasimpi jallch'asqa sumaj p'achanta. Jinaspataj sullk'a wawan Jacobman churaykorqa.

¹⁶ Chaymantataj imasnimpichus pelos mana karqachu chaykunaman cabra qaraswan k'askaracherqa, makisninman, kunkasninman ima.

¹⁷ Jinaytawantaj chay sumaj q'apashaj mikhuy wayk'usqanta, t'antatawan wawan Jacobman jaywarqa.

¹⁸ Jacobtaj maypichus tatan kasharqa chayman yaykorqa, nispa: Tatáy!, kaypiña kani. Isaactaj taporqa: Mayqen wawaytaj kankiri?, nispa.

¹⁹ Jacobtaj nerqa: Noqa kuraj wawayki Esaú kani. Ñapis ruwaniña imatachus niwasqaykita. Jatarikuy ari; tiyaykukuy, mikhukuy, monte animalta jap'ispa wayk'usqayta; qopuwaytaj bendicionniykita.

²⁰ Isaactaj taporqa: Imaynapitaj chhika usqhayta jap'imorqanki, wawáy? Jacobtaj nerqa: Señor Diosniyki rato tarichiwan.

²¹ Isaactaj nerqa: Qayllamuway, llujchirisqayki, sichus qan cheqamanta Esaú waway kanki chayqa.

²² Jacobtaj qayllaykorqa tatan llujchirinampaj. Isaactaj nerqa: Parlasqanqa Jacobpata, makisnintaj Esaupata, nispa.

²³ Ajinata Isaacqa payta mana rejserqachu, imaraykuchus makisnenqa thapulla karqa wauqen Esaujta jina.

²⁴ Bendicinampajtaj ujtawan tapullarqataj: Cheqamanta Esaú wawaypunichu kanki?, nispa. Jacobtaj, arí Esaupuni kani, nerqa.

²⁵ Chaymanta tatanqa nerqa: Wawáy, jina kajtenqa, mikhunaypaj jaywaway, imatachus jap'isqaykita bendicionniyta qosunaypaj. Jinata nejtintaj Jacobqa jaywarqa tatanman mikhunampaj, chanta vinotawan jaywarqa. Isaactaj sumajta mikhukorqa, ujyaykorqataj.

²⁶ Chaymantataj Isaacqa nerqa: Qayllamuway wawáy; much'ariway, nispa.

²⁷ Jacob qayllaykuspa much'aykojtintaj, Isaacqa muskhinerqa p'achampa q'apayninta. Jinaspataj bendiciyta qallarerqa, kay jinata: Arí, kay q'apayqa wawaymanta. Uj campoj q'apaynin jina, mayqentachus Señor bendicerqa.

²⁸ Dios qosuchun janaj pachamanta parata, jallp'api sumaj cosechasta, ashkha trigota, ashkha vinota.

²⁹ Ashkha runas kamachisniyki kachunku, naciones ñaupaqeykipi qonqorikuchunku. Wauqesniykita kamachiy; mamaykej wawasnin qonqorikusuchunku. Maldicisojkunaqa maldicisqas kachunku, bendicisojkunataj bendicisqas kanqanku.

³⁰ Isaacqa wawan Jacobta bendiciyta tukusqantawan, Jacobqa tatampa ñaupaqenmanta llojsishajtin, Esaú chayaykamorqa monte animalta jap'ej risqanmanta.

³¹ Paypis wayk'ullarqataj sumaj q'apashaj aychapuruta, chaytataj tatanman aparqa, nispa: Jatarikuy tatáy; mikhurikuy wawaykej jap'imusqanmanta mikhuyta, qopuwaytaj bendicionniykita.

³² Isaactaj taporqa: Pitaj kankiri? Esautaj nerqa: Noqa kuraj wawayki Esaú kani, nispa.

³³ Isaacqa mancharikuspa kharkatitispa jajllu jajllullamanta nerqa: Chanta, pitaj rerqa montemanri, aycha mikhuytataj apamuwanri? Noqaqa mikhuniña manaraj apamushawajtiyki, bendicionniyta paymanña qopuni, pay qhepakun bendicisqa.

³⁴ Esautaj tatampa nisqanta uyariytawan, jatunmanta qhaparispa mayta waqarqa: Noqamampis qollawaytaj bendicionniykita ari tatáy!, nispa.

³⁵ Isaacqa nerqa: Wauqeyki jamuwanña ch'aukiyawaspa wawáy, pay apakapun qampaj karqa chay bendicionta.

³⁶ Esautaj nerqa: Chayraykuchá suticharqanku Jacobta á! Kunanwanqa iskay kutitaña ch'aukiyawan. Ñaupajtaqa kuraj wawa kaspa jap'inayta qhechuwan, kunantaj noqaman chayawaj bendicionta qhechuwan. Kunanqa manachu ima bendicionllatapis puchuchipuwarqanki?

³⁷ Isaactaj kuticherqa: Qhawariy, noqa niniña Jacob qanta kamachisunanta, tukuy ayllusnin paypa kamachisnin kananta, nillanitaj paypajqa ashkha trigo, vino ima kananta. Kunan qampajqa, imata ruwasaj, wawáy?

³⁸ Esauqa mañakullarqapuni qonanta: Manachu ujtawan bendiciytaqa atinki tatáy? Bendiciway ari noqatapis!, nispa. Ujtawan jatunmanta qhaparispa mayta waqallarqapuni.

³⁹ Isaac tatantaj nerqa: Tiyakunki sumaj t'iyu jallp'asmanta karupi, cielomanta urmamoj paramantapis.

⁴⁰ Espadaykiwan jark'akunki, wauqeykej kamachin kanki; allinta kallpacharikojtiykirí, wauqeykej kamachin kanaykimanta librakunki.

Jacob ayqen Esaumanta

⁴¹ Chaymantapacha Esauqa Jacobta manchayta chejnikorqa, tatanwan bendicionta qochikusqanmanta: Tatayqa ñapis wañuponqaña, chaymanta wañurparichisaj Jacobta, nispa.

⁴² Rebeca mamantaj imatachus Esaú wawan yuyashasqanta yachaytawan, Jacobta wajyachimuspa, nerqa: Wauqeyki Esaú wakichikushasqa qanta wañuchisunampaj bendicionta qochikusqaykimanta.

⁴³ Chayrayku wawáy, allinta uyariway: Ayqekuy turay Labampa wasinman; payqa tiyakun Harampi.

^44-45 Chaypi paywan qhepakunki, wauqeykej phiñakuynin chinkanankama; imatachus ruwasqaykita qhonqanankama, Chaymantataj willachimusqayki kutimpunaykipaj. Noqaqa mana munanichu ujllapi iskayniykichej chinkanaykichejta!

⁴⁶ Chaymanta Rebecaqa Isaacmanñataj qayllaykuspa nerqa: Anchataña umayta nanachiwanku Esaupa warmisnin Hetpa wawasnin. Sichus Jacobpis kay Canaán llajtayoj Hetpa ujnin kaj ususinwan, kaykuna jinallawantaj casaranqa chayqa, wañupuyllataña munani, imapaj kasajri?, nispa.