Génesis 24 - Qheshwa Biblia DC

Abrahamqa warmita mask'an Isaacpaj

¹ Abrahamqa allin machuñapuni karqa, Señortaj tukuy imapi payta bendicerqa.

² Uj kuti kamachisninmanta aswan allin machuña kajta wajyarqa, mayqenchus Abrahampa ima ninmanta allinta imatapis yacharqa chayta. Nerqataj: Makiykita piernayman churay.

³ Kunanqa juray ari, Señorrayku, janaj pachapi kay pachapipis kaj Diosrayku. Qan ama casarachinkichu waway Isaacta kay Canaampi kaj warmiswan, maypichus tiyakushani chay llajtayoj warmiswan.

⁴ Manachayqa riy ari llajtayman, aylluy ukhumanta mask'amunki uj warmita waway Isaacpaj.

⁵ Kamacheqa kuticherqa: Chay warmi noqawan mana jamuyta munajtin, imanasajtajrí? Chaypajqa wawaykitachá pusayman may jallp'amantachus qan jamorqanki chayman á?

⁶ Chanta Abrahamqa nerqa: Ama, kutimuspa wawayta pusankichu jaqayman.

⁷ Señor janaj pachapi kaj Dios orqhomuwarqa, tataypa wasinmanta, ayllusniypa jallp'anmanta; niwarqataj kay jallp'ata mirayniymanwan qonawanta. Chay Dios kachamusonqa uj angelninta qampa ñaupaqeykita rinampaj, yanapasunampajtaj wawaypaj warmita pusamuyta.

⁸ Sichus chay warmi qanwan mana jamuyta munanmanchu chayqa, qan mana juchayojchu kanki. Jina kajtimpis amapuni wawayta pusapuwaychu jaqayman.

⁹ Kamacheqa yasta nispa imatachus ruwanampaj Abrahamta llankharerqa, jinamanta junt'anampaj.

¹⁰ Chaymantaqa patronnimpa sumachaj imasninta ajllaspa wakichikorqa chayta ama uyallanwan chayanampaj, jaywanampaj pi warmiwanchá tinkonqa chayman. Chanta ajllarqa chunka camellostawan. Chayman chajnariykukuytawan jap'ererqa Mesopotamiapi Nacor llajtaman.

¹¹ Ña ch'isiyaykushajtinña llajta jawaman chayaspa, chayman camellosta iphiracherqa, yaku pujyu cantopi. Chay hora karqa warmispa yaku aysananku horaña.

¹² Chaypi kamacheqa Diosmanta mañakuyta qallarerqa, nispa: Señor patronniy Abrahampa Diosnin, niway ari allin kajta ruwanayta, k'acha kayniykita rikuchikuy ari, patronniyta khuyakuspa.

¹³ Kay yaku cantopi suyakusaj, kay llajtayoj sipaskuna yakuman jamunankuta.

¹⁴ Qan niy ari mayqenchus kananta, noqa pi sipastachus nisaj: P'uyñuykita uraychuchikuspa yakuta qoriway ujyanaypaj. Paytaj uraykuchikuytawan niwanqa: Kayqa ujyarikuy, camellosniykimampis ujyarichipusqayki, niwanqa, chay kachun ajllasqayki kamachiyki Isaacpaj. Ajinapi yachasaj qan patronniyta khuyakusqaykita.

¹⁵ Kamachi manaraj Diosmanta mañakuyta tukushaspataj rikorqapacha Rebeca Betuelpa ususin p'uyñu lijrarikuspa jamushajta. Betuelqa karqa Nacorpa warmin Milcaj wawan, pichus karqa Abrahampa wauqen.

¹⁶ Sipasqa may k'achita karqa, nitaj payqa ni pi qhariwampis karqarajchu. Payqa pujyuman uraykuspa p'uyñunman yakuta junt'aykuchikuywan kutipusharqa.

¹⁷ Kamachitaj sayariytawan correrqa qhepanta taripanankama, nerqataj: Sipas, ama jinachu kay, uj chhika yakuta qoriway ujyanaypaj p'uyñuykimanta.

¹⁸ Paytaj kuticherqa: Ujyarikuy a wiraqochi, niytawan usqhayta p'uyñunta uraykucherqa, makimpi jap'ispataj ujyacherqa.

¹⁹ Kamachi yakuta ujyayta tukojtintaj sipasqa nerqa payman: Camellosniykipajpis yakuta orqhopusqayki sajsakunankukama ujyanankupaj, nispa.

²⁰ Payqa usqhayta rispa yakuta jich'arqa uywaspa ujyananman. Jinaspataj ashkha kutista yakuta orqhomorqa tukuynin camellosninman sajsachinankama.

²¹ Chaykamataj kamacheqa qhawallarqa ni imata niyta atispa. Payqa allinta yachayta munasharqa, chay puriynimpi chaypunichus kashan manachus chayta.

²² Camellos yakuta ujyayta tukojtinkutaj kamacheqa uj qori sortejata orqhorqa, chaytaj karqa sojta gramos jina; chaytataj sipaspa senqanman warkhuykorqa. Chanta iskay qori brazaletesta qollarqtaj, chaytaj karqa pachaj gramos jina.

²³ Nerqataj: Niway ari, Pejpa wawantaj kankirí? Tataykej wasinman kunan ch'isi wajyariwaykumanchu?

²⁴ Sipastaj nerqa: Noqaqa Betuelpa ususin kani, Milcajta Nacorpatawan allchhinku.

²⁵ Wasiykupeqa tiyan campo puñunaykipaj, jinallataj camellosniykipajpis tiyan paja, q'achu ima.

²⁶ Chaymanta kamacheqa qonqoriykukuspa Señorta yupaycharqa, nispa:

²⁷ Yupaychasqa kachun Señorqa patronniypa Diosnin. Payqa k'acha khuyakuyniyojpuni patronniypaj, pay pusawan ñanta ayllusnimpa wasinman.

²⁸ Chaykamataj sipasqa usqhay usqhayta kachaykukorqa mamanman willaj tukuy imachus kasqanta.

^29-30 Rebecajta karqa uj turan Labán nisqa. Chaypis usqhayta correrqa willajtinkama yaku pujyuman chay runata taripaj, imaraykuchus pay rikorqa panampa sortejanta, makisnimpi brazaletes warkhurayashajta, uyarerqataj imatachus willakushajta chay runaj nisqanta. Chayrayku Labanqa Abrahampa kamachinman qayllaykorqa, pujyupi camelloswan kashajtin.

³¹ Nerqataj: Jamuy ari Señorpa yanapasqan, ama kayllapi kakuychu ari, wasita k'uchuychapunkiña, camellosniyki puñunankupajpis tiyanña.

³² Kamacheqa wasinman rerqa. Labantaj wasinman yaykojtinkama camellosmanta q'epista uraykucherqa. Jinaspataj camellosman qararqa pajata q'achutawan. Chaymantaqa yakuta apamorqa kamachej chakisninta paywan jamojkunasnintinta mayllanampaj.

³³ Mikhunata jaywajtinkutaj Abrahampa kamachenqa nerqa: Mana mikhuymanrajchu, imatachus ninay kashan chayta qankunaman manaraj nishaspaqa. Labantaj nerqa: Parlallay, nispa.

³⁴ Kamachi nerqa: Noqaqa kani Abrahampa kamachin.

³⁵ Señorqa ashkhata bendicin patronniy Abrahamta, qhapajyachintaj. Payman qon ovejasta, wakasta, qolqeta, qorita, qhari kamachista, warmi kamachista, camellosta, burrosta ima.

³⁶ Jinallataj warmin Sarapis uj qhari wawata rejsin payayaynimpi. Kunanqa pay saqeykun Isaac wawanman tukuy kapuyninta.

³⁷ Patronniy Abrahamtaj jurachiwarqa: Ama casarachinkichu churiyta kay Canaán llajtayoj warmiswan, maypichus noqa tiyakuni chaypi, nispa.

³⁸ Manachayqa tataypa ayllunman ripuway, chay ukhumanta wawaypaj warmita pusarimpuway.

³⁹ Noqataj nerqani: Maymantataj warmeqa noqawan pusachikamuwanqarí?

⁴⁰ Paytaj niwarqa: Noqa purini Señorpa ñannimpi, pay kachamusonqa uj angelninta, kay risqaykipi allin risunampaj. Uj warmita pusampuwanki aylluy ukhumanta, tataypa ayllunmanta.

⁴¹ Aylluy ukhuman rispa mana tarinkichu chayqa, manataj pusachikamusuyta munasonqa chayqa, qan mana juchayojchu kanki kay jurasqaykita mana junt'asqaykimantaqa.

^42-44 Ajinata chayman jina yaku pujyuman chayamuspa, Diosmanta mañakuyniypi nerqani Señorman, Abraham patronniypa Diosninman: Sichus qan ninki allin rinawanta kay puriyniypi chayqa, mañakuyki, kay yaku pujyu cantopi kashajtiy, uj sipas jamuchun yakuman ninaypaj: Ama jinachu kay, yakuta ujyanaypaj qoriway p'uyñuykimanta, nejtiytaj, kayqa ujyarikuy, camellosniykipajpis yakuta orqhopusqayki, niwanqa chayqa, chay warmi kachun ari, Señor, qampa ajllasqayki patronniypa wawampaj, nispa.

⁴⁵ Manaraj ajinata mañakuyta tukushaspataj Rebecata rikunipacha p'uyñunwan yakuman jamushajta. Pujyumanta yakuta orqhospa jamushajtintaj, nini: Sipas, yakuykita qoriway ujyanaypaj, nispa.

⁴⁶ Paytaj chay ratopacha p'uyñunta uraykuchispa, jaywawarqapacha, nispa: Kayqa, ujyarikuy, camellosniykimampis ujyarachipusqayki, nispa. Noqataj ujyarqani, camellosniymampis ujyarachipuwarqa.

⁴⁷ Chaymantataj taporqani: Pejpa ususintaj kankiri?, nispa. Paytaj niwarqa: Noqaqa Betuelpa wawan kani, Nacorpata Milcajtawan allchhinku. Niwajtinkamataj senqanman warkhuykorqani sortejata, makisninmantaj brazaletesta.

⁴⁸ Jinaspataj qonqoriykukuspa Señorta yupaycharqani; patronniy Abrahampa Señor Diosninta, pay cheqan ñanta pusamuwasqanmanta, patronniypa wauqempa ususinta wawampaj pusapunaypaj.

⁴⁹ Kunanqa qankuna niwaychej ari sut'inta jina kasqanta. Sichus qankuna patronniymanta cheqamanta khuyakunkichej chayqa, manachayri sut'inta niwaychej pañamampis lloq'emampis rinaypaj.

⁵⁰ Labanwan Betuelwantaj kuticherqanku: Kay tukoyqa Diosmanta jamun; mana niykumanchu, arí nispa, nitaj mana nispa.

⁵¹ Chayqa ari, ñaupaqeykipi kashan Rebeca, pusay ari. Patronniykej wawampa warmin kachun, Señorpa nisqanman jina.

⁵² Chay palabrasta uyariytawantaj Abrahampa kamachenqa, qonqoriykukorqa Señorpa ñaupaqempi pampaman umanta chayachinankama.

⁵³ Chaymantataj q'episninmanta orqhorqa ashkha imasta qolqemanta, qorimanta, chanta p'achastawan, jinaspataj Rebecaman jaywarqa. Chanta qollarqataj turanman, mamanmanwan.

⁵⁴ Chaymantaraj mikhorqa ujyarqataj paywan jamojkunasnintin. Chaymantataj chay ch'isi chaypi puñukaporqanku. Q'ayantintaj kamacheqa tutamanta jatariytawan nerqa: Kunanqa usqhayta kachapuwayku patronniykojman.

⁵⁵ Rebecaj turan Labantaj nerqa: Pisi p'unchaykunata karikullachunraj ari Rebecaqa noqaykuwan. Kikillantataj mamampis nerqa.

⁵⁶ Kamachitaj nerqa: Ama jark'awaychejchu, Dios ninña, kay purisqayqa mana qhasichu kasqanta; chayrayku kachapullawaychejña patronniypa wasinman.

⁵⁷ Paykunataj kuticherqanku: Wajyaspa sipasta tapusqayku pay ima nenqachus, nispa.

⁵⁸ Chaymantaqa Rebecata wajyaspa taporqanku: Kay runawan riyta munankipachachu? Paytaj kuticherqa: Arí, rillasajña, nispa.

⁵⁹ Jinata nejtintaj Rebecata warmi kamachintawan khuska pusacherqa Abrahampa kamachinwan, paywan jamojkunamanwan.

⁶⁰ Chaymantataj Rebecata bendicispa nerqanku: Oh, hermanayku, qan kanki waranqa waranqaspa mamanku, mirayniyki qhechuchun ashkha llajtasta enemigosninkumanta.

⁶¹ Jinata nejtinkukamataj Rebecaqa kamachisninwan camellosman wicharerqankupacha, kamachej qhepantataj rerqanku. Ajinata Abrahampa kamachenqa Rebeca pusarisqa kutiporqa.

⁶² Isaactaj chayashajtinku kutimusharqa, “Pichus kausaj rikuwan”, nisqa yaku pujyumanta. Pay tiyakorqa Néguev jallp'api.

⁶³ Payqa ch'isiyayta llojserqa puriyacharikoj. Jinallapi payqa ujta qhawarispa camellos jamushajta rikorqa.

⁶⁴ Jinallataj Rebecapis qhawarispa rikorqapacha Isaacta, jinaspataj camellomanta uraykorqa;

⁶⁵ kamachitataj taporqa: Pitaj jaqay runa jamushanri?, nispa. Kamachitaj kuticherqa: Pay ari patronniy, nispa. Paytaj chay ratopacha uyanta suk'umpawan ñukuykukorqa.

⁶⁶ Tiyaykukuytawantaj kamacheqa tukuy imaynachus kasqanta Isaacman willarqa.

⁶⁷ Chaymanta Isaacqa Rebecata Sara mamampa toldonman pusakaporqa. Paywantaj Isaacqa casarakorqa. Chay qhepata Isaacqa mayta munakorqa Rebecata. Ajinamanta paywan sonqochakorqa mamampa wañupusqanmanta.