Génesis 19 - Qheshwa Biblia DC

Dios chinkachin Sodomata Gomorratawan

^1-2 Ña chharpuykushajtinña iskaynin ángeles Sodomaman chayarqanku. Lotqa Sodoma llajtaman yaykuy punkupi tiyakusharqa, maypichus runa tantakojpuni chaypi. Paykunata rikuytawantaj sayarikorqa; ñaupaqenkumantaj qonqoriykukorqa pampaman umanta chayachinankama, nispa: Wiraqochisníy, kunan ch'iseqa wasiypipuni qheparikuychej ari, kamachiykichejpa wasimpi; chakisniykichejtapis mayllarikullankichej, q'ayataj tutamanta ripullankichej. Paykunataj nerqanku: Mana, imaynatapis jawapi kallasqayku.

³ Chaywampis Lotqa nillarqapuni qhepakunankuta. Paykunataj yasta nispa paywan wasinman rerqanku. Wasinman chayaspataj Lotqa sumaj mikhunata wayk'uporqa, jinallataj ruwaporqa mana levadurayoj t'antata, paykunataj mikhorqanku.

⁴ Manaraj puñushajtinku, tukuy Sodoma llajtayoj qharis maltun waynas, machu runasnintin Lotpa wasinta muyuykorqanku.

⁵ Lottataj qhaparerqanku: Maytaj kunan ch'isi wasiykiman chayamorqanku chay qharis? Paykunawan puñuyta munayku. Orqhomuy, nispa.

^6-7 Lotqa llojserqa wasinta sumajta wisq'aykuspa paykunawan parlaj, nerqataj: Wauqesníy, ama chay jina millaytaqa ruwaychejchu ari, mana allinchu chayqa.

⁸ Tiyapuwan iskay ususisniy, paykuna manaraj qhariswan purinkuchu; paykunata orqhomusqaykichej, paykunata munasqaykichejta ruwaychej. Kay runastari amapuni llankhaykullaychejpischu, paykuna wasiyman chayakamusqankurayku, nispa.

⁹ Paykunataj kuticherqanku: Jatariy chaymanta! Qan jina karu llajtayoj runachu noqaykuta kamachiwasqayku? Kunanqa astawan mana allinta qanta ruwasqayku paykunamanta nisqaqa. Paykunataj Lotman maqaj phinkiykorqanku, jinaspataj punkuta khakoj qayllaykorqanku.

¹⁰ Lotpa wasinman chayakamojkunataj makinkuwan qhechuytawan wasiman Lotta aysaykorqanku, punkutataj wisq'aykamorqanku.

¹¹ Runastataj tukuyninta ciegoyarpacherqanku juch'uy jatunta jawapi kajkunata. Jinamanta runasqa sayk'unankukama punkusta mask'arqanku, imaraykuchus ñawisninku mana rikorqachu.

¹² Lotmantaj chay iskay angelesqa wasin ukhupi nerqanku: Astawan ayllusniyki tiyapusunkichu kaypi? Kunanqa qhari wawasniykita, ususisniykita, tolqasniykita, piniykichá tiyapusunki kay llajtapi chaytawan kaymanta karuman pusakapuy.

¹³ Noqayku kay tukuy llajtata chinkachisqayku. Imaraykuchus ashkhaña quejas tiyan Diospa ñaupaqempi kay llajtayojkunaj contrampi, chayrayku Señorqa kachamuwayku kay llajtata chinkachinaykupaj.

¹⁴ Lottaj usqhayta rerqa ususisninwan casarananku karqa chay qharisman willaj, nerqataj: Jatariychej usqhayta, kaymanta ayqeychej, kay llajtataqa Señor chinkachenqa kasqa! Tolqasnintaj chayta mana creespa mana kasorqankuchu, chansiyakusqanta yuyaspa.

¹⁵ Ña sut'iyamushajtintaj, angelesqa Lotman nerqanku may apurasqata: Usqhayta ripuy, pusakapuy warmiykita, iskaynin ususisniykitawan mana wañuyta munanki chayqa, kay llajtata chinkachishajtiyku.

¹⁶ Lottaj mana usqhayta puririyta aterqachu, chayrayku angelesqa Lotta, warminta, iskaynin ususisninkutawan makisninkumanta llajtamanta jawaman aysarqanku, Señor paykunata khuyakusqanrayku.

¹⁷ Llajtamanta jawapiña kajtinkutaj ujnin ángel nerqa Lotman: Kunanqa usqhayta ayqekuy ama wañunaykipaj. Ama qhepaykita qhawarikamuspa, sayaykachallankipischu chay valle ñanta risqaykipi. Cheqanta rinki orqosman mana wañuyta munanki chayqa.

¹⁸ Lottaj nerqa: Mana, uyarillawaychej wiraqochisníy!

¹⁹ Qankuna anchatapuni khuyakuwankichej, noqawan may k'acha kankichej kausayniyta libranawaykichejpaj. Noqari mana orqosmanqa riymanchu; sajra kaj ñanllapiraj taripawanman, wañupuymantaj.

²⁰ Qhawariychej, jaqaypi uj juch'uy llajta kashan, qayllallapitaj. Niwaychej ari chayllaman ayqekunayta, chayqa juch'uyllamin, chaypeqa mana wañusajchu.

²¹ Ujnin kaj angeltaj nerqa: Arí, uyariyki. Imatachus niwasqaykita ruwasaj. Chay nishawanki chay llajtata mana chinkachisajchu.

²² Jina kajtenqa usqhayta ayqekuy chay llajtaman, jaqayman chayanaykikama mana imatapis ruwasajrajchu. Chayrayku jaqay llajtaj sutenqa Zoar.

²³ Lotqa sut'iyamushajtin Zoar llajtaman chayarqa.

²⁴ Chantá Señorqa azufre nina parata parachimorqa Sodomaman Gomorra llajtamanwan.

²⁵ Jinamanta chinkaporqanku tukuy valle chay llajtas chaypi tukuy kausajkuna tukuynin q'omerkunapiwan;

²⁶ Lotpa warmintaj chay ñanta rishaspa qhepata qhawarerqa. Kikimpitaj payqa kachiman tukorqa.

²⁷ Q'ayantintaj tutamanta Abrahamqa wicharerqa maypichus Señorwan parlarqa chayman.

²⁸ Chaymanta qhawarerqa Sodomata Gomorratawan, chay tukuynin valletawan. Rikorqataj chay tukuyninmanta manchay q'osñilla llojsimushajta hornomanta jina.

²⁹ Ajinata Dios chinkacherqa chay vallepi llajtasta, maypichus Lot tiyakorqa chayta. Yuyarikorqataj Abrahampa mañakusqanta, chayrayku Lotta chay chinkachinan llajtamanta orqhorqa.

Moabitaspata amonitaspatawan rikhuriynin

³⁰ Chay qhepata Lotqa Zoarllapipuni tiyakuyta manchachikorqa, chayrayku orqosman riporqa tiyakoj iskaynin ususisinwan. Chaypi paykunaqa tiyakorqanku uj cuevapi.

³¹ Uj p'unchay Lotpa kuraj kaj ususin sullk'a kajman nerqa: Tatanchejqa machuña, manataj kay tukuynimpi ima qharipis kanchu noqanchej chaywan casarananchejpaj, yachasqa kasqanman jina.

³² Jina kajtenqa tatanchejta vinowan machaykuchina, jinaspataj paywan puñuykuna, jinamanta paynejta wawasniyoj kananchejpaj.

³³ Chanta chay ch'isi pacha tatankuman vinota ujyachispa machaykucherqanku. Jinamanta kuraj kajqa tatanwan puñorqa. Tatantaj mana reparakorqachu ususin paywan puñusqanta, nitaj jatarisqantapis.

³⁴ Q'ayantintaj kuraj kajqa sullk'anman nerqa: Noqa ch'isi tatanchejwan puñuni; kunan ch'isi ujtawan vinowan machaykuchinallataj, jinaspataj qanñataj paywan puñunki, ajinamanta tatanchejpaj wawasniyoj kananchejpaj.

³⁵ Chay ch'isi tatankuman vinota ujyachillarqankutaj. Jinaspata sullk'a kajñataj tatanwan puñuykorqa. Tatan Lottaj mana reparakorqachu paywan puñusqanta, nitaj jatarisqantapis.

³⁶ Ajinamanta iskayninku wijsayoj rikhurerqanku Lot tatankupaj.

³⁷ Kuraj kaj wawayoj karqa suticharqataj Moabta; payqa moabitaspa tatanku karqa kunankama.

³⁸ Sullk'a kajpis wawayojllataj karqa, suticharqataj Ben-amita, pichus amonitaspa tatanku karqa kunankama.