Génesis 17 - Qheshwa Biblia DC

Circuncisionqa tratota ruwasqanmanta señal

¹ Abram isq'on chunka isq'onniyoj watasniyoj kashajtin, Señorqa rikhurerqa payman, nerqataj: Noqa tukuy atiyniyoj Dios kani; qan kausay ñaupaqeypi sumaj kausayta, mana pejpa k'aminan.

² Noqataj qanwan ruwasaj uj tratota: Mirayniykita ashkhata mirachisaj.

³ Abramtaj chayta uyarispa umanta pampaman chayachinankama k'umuykorqa. Diostaj payman nillarqataj:

⁴ Tratoyqa qanwan kanqa kay jina: Qan kanki ashkha runaspa tatan.

⁵ Sutiykipis manaña Abramchu kanqa, kunanmantaqa Abraham kanki; imaraykuchus churasqayki ashkha runaspa tatan kanaykipaj.

⁶ Mirayniykita ashkhata mirachisaj, qanmanta llojsenqanku reyes, naciones ima.

⁷ Kay tratota qanwan ruwasqayqa mirayniykej mirayninman ima chayanqa; noqa qampa Diosniykipuni kasaj, jinallataj paykunajtapis.

⁸ Qanman paykunamanwan qosqaykichej kay tukuynin Canaán jallp'ata, kunan maypichus tiyakushanki chayta, chayaqeyki wiñaypaj kanampaj, noqataj Diosniyki kasaj.

⁹ Ujtawan Diosqa Abrahamman nillarqataj: Qan allinta waqaychanki tratoyta, jinallataj waqaychachunku wawasniyki, jinallataj wawasninkumanta wawasninkupis.

¹⁰ Kaymin chay tratoy, qankunawan ruwasqayqa, chayta junt'ananku tiyan tukuy mirayniykimanta miraykunasnintin. Tukuy qharis qankuna ukhupi kajkuna circuncidasqas kananku tiyan.

¹¹ Circuncidayqa niyta munan, phichilitumpa qaritampa puntitanta khuchurinkichej. Chay kanqa noqa qankunawan uj tratota ruwasqaymanta.

¹² Kunanmanta qhepaman tukuy qharis nacesqanmanta pusaj p'unchayninman phichilitumpa qaritampa puntitan khuchurisqa kanqa, jinallataj qankunajpa nacekoj wawaspis, chanta waj llajtayoj kamachisniykichejpa wawasninkupis, rantisqasniykichejpa wawasninku ima.

¹³ Ajinata circuncidasqas kachunku wasiykichejpi nacekojkuna, rantisqasniykichejpa wawasninkupis. Ajinata aychaykichejpi yachakonqa, tukuy kausayniykichejpi chay señalnejta noqa qankunawan wiñaypaj sumaj tratota ruwasqay,

¹⁴ Pichus qankuna ukhupi mana jina señalasqa kajri, mana qankuna ukhupi kanqañachu, tratoyta mana kasusqanrayku.

¹⁵ Dios nillarqataj Abrahamman: Warmiyki Saraiqa manaña ajina sutiyojchu kanqa, kunanmanta ñaupajmanqa Sara sutin kanqa.

¹⁶ Noqa bendicisqayki, uj wawatataj qosqayki paynejta. Arí, bendicisqayki. Pay kanqa ashkha nacionespa maman, paypa mirayninmanta kanqanku llajtaspa reyesnin.

¹⁷ Abrahamtaj qonqoriykukorqa umanta pampaman chayachinankama, asirikorqataj, sonqompi kay jinata yuyaspa: Pachaj watasniyoj runaqa atinmanrajchu wawasniyoj kayta? Saraqa isq'on chunka watasniyojña, wawayojrajchu chanta kanman?, nispa.

¹⁸ Chaymanta Abrahamqa Diosman nerqa: Ismaelniy ñaupaqeykipi kausachun.

¹⁹ Diostaj kuticherqa: Chay tukuywampis warmiyki Sara wawayoj kapusonqa, chay wawaykitataj sutichanki Isaacta. Paywan tratoyta wiñaypaj sayachisaj, jinallataj mirayninmampis.

²⁰ Ismael wawaykimanta niwasqaykitapis uyariyki, paytapis bendicisaj. Paypis ashkha wawasniyoj kanqa, jinallataj miraynintapis ashkhayachisaj. Ismaelqa chunka iskayniyoj kurajkunaj tatanku kanqa, jinallataj paymanta ruwasaj uj jatun nacionta.

²¹ Tratoytaqa Isaacwan ruwasajpuni, warmiyki Saraqa wawata onqopusonqa uj watamantawan, chaywan.

²² Diosqa ajinata Abrahamwan parlaytawan riporqa.

²³ Chay kikin p'unchaypacha Abrahamqa wawan Ismaelta circuncidarqa, jinallataj tukuynin kamachisnimpa wawasnin wasimpi nacekojkunata, pikunatachus rantikorqa chaykunatawan. Wasimpi tukuynin kamachisnimpis circuncidakorqanku chaypacha, Diospa kamachisqanman jina.

²⁴ Abrahamqa isq'on chunka isq'onniyoj watasniyoj karqa phichilitumpa qaran puntata khuchushajtinku.

²⁵ Wawan Ismaelpis chunka kinsayoj watasniyojña karqa phichilitumpa qaritampa puntitanta khuchushajtinku.

²⁶ Abrahamqa uj diallapi circuncidasqas karqanku wawan Ismaelwan.

²⁷ Jinallataj paywan khuska chay p'unchaypi circuncidasqas karqanku wasimpi tiyakojkuna, kamachisnimpa wawasnin nacekojkuna, waj llajtayojkunata rantisqasnin ima.