Génesis 16 - Qheshwa Biblia DC

Agar Ismael wawanwan

¹ Saraiqa mana wawayoj kayta aterqachu qosan Abrampaj. Uj egipciataj kamachin karqa, sutin Agar.

² Chaymanta Saraiqa Abramman nerqa: Qhawariy, Señorqa mana wawata qowanchu, mañaykitaj kamachiy Agarwan kanaykita, jinamanta ichapis wawasniy kanqa paynejta.

³ Abramtaj, yasta nerqa warminta. Saraitaj egipcia Agar kamachinta wajyaspa Abramman entregarqa. Chaypacha Canaán jallp'api chunka watataña tiyakorqanku.

⁴ Jinamanta Agarqa onqoj rikhurerqa Abrampaj. Jina kaspataj Agarqa Saraiwan chhoqonakuyta qallarerqa.

⁵ Saraitaj nerqa Abramman: Qan juchayoj kanki Agar chhoqonakunawampaj! Paytaqa noqa entregarqayki; kunantaj payqa yachan wawayoj kananta, chayrayku creekushan noqamanta aswan sumaj warmi kasqanta. Kunanqa Señor cheqanchawasunchej, qanchus juchayoj kanki, chayri noqachus, chay jina kanampaj, chayta.

⁶ Abramtaj Saraiman nerqa: Qan chaytaqa imanaypis, atinki munasqaykita ruwayta kamachiyki Agarwan. Saraitaj jinata nejtin Agarta maqayta qallarerqa atisqanta, Agartaj ayqekorqa.

⁷ Señorpa angelnintaj Agarta tariparqa waqashajta ch'in pampapi Shur ñan patapi yaku juturi qayllapi.

⁸ Taporqataj: Agar, Saraipa kamachin, maymanta jamunki, maymantaj rishanki? Paytaj nerqa: Ayqekushani Sarai uywaqeymanta.

⁹ Señorpa angelnintaj nerqa: Kutipullay patronniykejman, kasullay imatachá nisunki chayta tukuy sonqo.

¹⁰ Chaymanta Señorpa angelnin nillarqataj: Noqa mirayniykita ashkhayachisaj, nitaj pipis yupayta atenqachu.

¹¹ Qanqa onqoj kashanki, uj qhari wawa tiyapusonqa, sutichankitaj Ismaelta; imaraykuchus Señor uyarisunki llakiyniykita.

¹² Payqa kanqa juraño runa, monte animal jina, tukuyta maqanqa, paytapis tukuy maqanqanku; kausanqataj tukuy wauqesnimpa chaupimpi.

¹³ Chaymanta Agarqa kuticherqa payman parlaj chay Señorta kay sutiwan: Qan kanki rikoj Dios, imaraykuchus Señorqa paywan parlarqa, nispa. Chaymanta pay nerqa: Noqaqa rikuwaj Diosta rikuni.

¹⁴ Chayrayku chay pujyoj sutenqa: Kausajpa pujyun, pichus rikuwan, nispa. Chay pujyoqa kashan Cadeswan Beredwan tinkuypi.

¹⁵ Agarqa Abrampaj wawayoj karqa, paytaj wawanta suticharqa Ismaelta.

¹⁶ Abramqa pusaj chunka sojtayoj watasniyoj karqa wawan Ismael naceshajtin.