Génesis 15 - Qheshwa Biblia DC

Dios tratota ruwan Abramwan

¹ Chay qhepata Dios parlarqa Abramman mosqoypi jina, nispa: Ama manchachikuychu Abram, noqa qampa jark'ajniyki kani, qampa t'inkaykeqa may chhikapuni kanqa.

² Abramtaj kuticherqa: Señor Dios, imatataj qowankiri? Qan yachashanki waway mana kasqanta, Damascomanta Eliezer kamachiy tukuy imasniytapis jap'ikapunan kasqanta.

³ Abram nillarqataj: Qhawariy, Señor, qan mana qowankichu uj wawallatapis, tukuy imay kajtapis wasiypi nacekoj kamachillaychá jap'ikaponqa ari.

⁴ Señortaj kuticherqa: Tukuy imayki kajtaqa kikin wawaykipuni jap'enqa, mana waj runachu.

⁵ Chaymanta Señorqa Abramta jawaman pusarqa, chaypitaj nerqa: Qhawariy allinta cielota, ichapis atiwaj yupayta qoyllurkunata. Ajina kanqa qampa mirayniyki, mana yupay atina.

⁶ Abramqa creerqa Señorpi, chayrayku cheqan runapaj qhawasqa karqa.

⁷ Chaymanta nerqa: Noqa orqhomorqayki Caldea Ur llajtamanta, kay jallp'ata chayaqeykipaj qosunaypaj.

⁸ Chaymanta Abram nerqa: Señor Diosníy, imaynapitaj yachasaj noqapuni kay jallp'ata chayaqeyta jina jap'ikapunaytari?, nispa.

⁹ Diostaj nerqa: Apamuy kinsa watayoj wakata, cabrata, carnerosta ima, jinallataj juruk'utata, paloma irpatawan.

¹⁰ Abramtaj tukuy kay uywasta apamorqa Señorpa ñaupaqenman, khuskanmanta rak'iraspataj wakinta ujnin chimpanman, wakintataj ujnin chimpanman churarqa, lijrayojkunatari mana rak'erqachu.

¹¹ Chay wañuchisqa uywaspa patanmantaj q'arqañas uraykamorqanku, Abramtaj chaykunata phawacherqa.

¹² Chharpuykushajtintaj Abramqa puñuywan atipachikorqa, laqhaykojtintaj sinch'i manchachikuy payman jamorqa.

¹³ Señortaj payman nerqa: Yachay kayta, mirayniykeqa tiyakonqa runaj llajtampi, chaypitaj runaj kamachisnin, may k'irinchasqastaj kanqanku tawa pachaj watasta.

¹⁴ Pichus chay jinata ruwaj llajtata jasut'isaj, mirayniykitaj ashkha imas aparisqa llojsenqa.

¹⁵ Qanqa kusisqa wañupunki, allin machuña kaspa.

¹⁶ Tawa mita qhepata mirayniykeqa kay jallp'aman kutimullanqataj; imaraykuchus amorreospa sajra ruwaynenqa manaraj kaykamaqa chhikapunichu.

¹⁷ Allin laqhayaykuytataj rikhurerqa uj horno, mayta q'osñishaj. Uj nina k'anchaytaj chay rak'isqa uywaspa chaupinta kayman jaqayman puriykachasharqa.

¹⁸ Chay kikimpacha Señorqa uj tratota Abramwan ruwarqa, nispa: Mirayniykiman qosaj kay jallp'ata. Chaytaj kanqa Egipto mayumanta, Eufrates jatun mayukama.

^19-21 Chay jallp'aqa kashan ceneospata, cenezeospata, cadmoneospata, heteospata, ferezeospata, refaitaspata, amorreospata, cananeospata, gergeseospata, jebuseospata ima.