Génesis 14 - Qheshwa Biblia DC

Abram kacharichin Lotta

¹ Chay tiempopi Amrafel rey karqa Sinarpi, Arioctaj Elasarpi, Quedorlaomertaj Elampi, Tidaltaj Goimpi.

² Paykuna guerrata ruwarqanku Sodoma rey Beraj contranta, Gomorra rey Birsaj contranta, Adma rey Sinabpa contranta, Zeboim rey Semeberpa contranta, Zoar reypa Belaj contranta ima.

³ Chay phishqa reyes soldadosninkuta tantaykorqanku Sidin vallepi, maypichus kunan kashan mar k'ara qocha chaypi.

⁴ Quedorlaomer reyqa chunka iskayniyoj watasta paykunata kamacherqa, chunka kinsayoj wataspitaj kinsantin reyes nerqanku maqanakunankuta paypa contranta.

^5-6 Qhepan watataj rey Quedorlaomer, pi reyeschus paywan karqanku chaykunawan rerqanku Astarot Karnaimman, chaypi atiparqanku refaitasta. Chaymantataj zuzitasta Hampi atiparqanku. Savequiriataimpitaj emitasta, Seir lomaspitaj atiparqanku horeosta, qhatiykorqankutaj Parán pampakama, chaytaj kashan ch'in pampa qayllapi.

⁷ Quedorlaomerqa pischus paywan kasharqanku chaykunawan kutimushaspa chayarqanku En-mispatman, uj sutintaj Cades karqa. Chaypacha tukuyninta tukucherqanku risqankupi imawanchá tinkukorqanku chaykunata, amalecitaspa jallp'annejpi. Jinallataj amorreostapis wañuracherqanku, paykuna tiyakorqanku Hazezon-tamarpi.

^8-9 Phishqa reyes ujchakuspa ujllapi maqanakoj llojserqanku: Sodoma rey, Gomorra rey, Adma rey, Zeboim rey, Zoarmanta rey Belawan ima; paykuna maqanakorqanku Sidim vallepi, tawa reyespa contranta: Quedorlaomerpa contranta, Tidalpa contranta, Amrafelpa contranta, Ariocba contranta ima; paykuna karqanku reyes Elammanta, Goinmanta, Sinarmanta, chanta Elasarmantawan.

¹⁰ Sidim vallepi ashkha t'oqos karqa mach'awan ruwasqas. Sodomamanta rey, Gomorramanta reypiwan ayqeshaspa urmaykurarqanku chay t'oqosman. Wakin reyestaj orqosman ayqekorqanku.

¹¹ Atipajkunaqa tukuy kaj chhikata sakeyaspa apakaposqanku Sodomamanta Gomorramantawan, jinallataj mikhuykunasninkutapis.

¹² Abrampa sobrinon Lotpis Sodomapi tiyakushaspa jap'ichikullarqataj, payta presota aparqanku, jinallataj imanchá tiyaporqa chaytawan.

¹³ Uj runataj ch'ajwamanta ayqemuspa hebreo Abramman willarqa imaynachus kasqanta. Pay tiyakorqa amorreo Mamrej encinas sach'arara jallp'ampi. Mamreqa Escolpata, Anerpatawan wauqenku karqa; paykunaqa karqanku Abramman sayasqas.

¹⁴ Abramtaj sobrinon preso kasqanta yachaytawan, wasimpi nacekoj kamachisninta tantarqa; tukuynimpi karqanku kinsa pachaj chunka pusajniyoj qharis. Chaykuna sumajta wakichikuytawan qhatiykorqanku Dan llajtakama.

¹⁵ Uj ch'isitaj Abramqa, tukuy kamachisninwan reyesta muyuykuspa ujllata maqarqanku. Chaymantataj qhatiykorqanku Hobakama, chaytaj kashan Damasco llajtamanta patanejpi.

¹⁶ Qhechorqankutaj imastachá aparqanku chayta. Ajinata Abramqa Lot sobrinonta qhechukamporqa, imasninchá tiyaporqa chaytawan. Jinallataj qhechorqa, warmista preso kaj runastawan.

Melquisedecqa Abramta bendicin

¹⁷ Abram maqanakusqanmanta, Quedorlaomerta, jinallataj paywan khuska reyestapis atipaspa kutimushajtin, Sodoma rey taripaj rerqa Save valleman, mayqenchus reypa vallen, nisqa chayman.

¹⁸ Salemmanta rey, patapi kaj Diospa sacerdoten Melquisedecpis orqhorqa t'antata, vinotawan.

¹⁹ Bendicerqataj Abramta kay jinata nispa: Patapi kaj Dios bendicisuchun, pichus janaj pachata, kay pachatawan ruwaj;

²⁰ yupaychasqa kachun patapi kaj Dios, pichus enemigosniykita atipachisorqa chay. Abramtaj qorqa tukuy imasta qhechusqasninmanta, sapa chunkamanta ujta.

²¹ Chaymantataj Sodomamanta kaj reyqa Abramman nerqa: Kunanqa runasllata qopuway, tukuy imas kajkunatataj jap'ikapuy.

^22-23 Abramtaj kuticherqa: Señorman juraspa niniña, patapi kaj Diosman, pichus janaj pachata kay pachatawan ruwajman, qampata kajta ni imata jap'ikapunayta, ni ima q'aytullatapis zapatoyta wataykunallaypajpis, ama ni jayk'aj ninawaykipaj, noqaj imasniywan qhapajyashan, nispa.

²⁴ Manapuni imasniykitapis munanichu, qanmantaqa jap'isaj kamachis imastachus mikhorqankuña chayllata. Pikunachus noqawan rerqanku chaykuna, Aner, Escol, Mamre imaqa, paykunachá jap'ikaponqankupis imaschus paykunaman chayajta.