Gálatas 6 - Qheshwa Biblia DC

Purajmanta yanapanakuychej

¹ Hermanos, sichus qankunamanta pipis juchaman urman chayqa, qankuna Espirituman jina purejkunaqa khuyakuywan yanapaychej, ujtawan sayarinampaj. Sapa uj qhawakuchun, ama juchaman urmanampaj.

² Purajmanta q'episniykichejta apaysinakuychej, ajinapi Cristoj leyninta junt'anaykichejpaj.

³ Pipis ima kasqanta yuyakun chayqa, mana imapis kashaspa, pay kikinta ch'aukiyakun.

⁴ Ajinaqa sapa uj pay kikimpa ruwasqanta qhawakuchun; chantá paypa kallpanwan kusikuchun, amataj wajpa ruwasqanwanqa.

⁵ Sapa uj kikin q'epinta apachun.

⁶ Pichus evangeliopi yachachisqa kajqa, tukuy ima allin kajta yachachejninman jaywarichun.

⁷ Ama ch'aukiyakuychejchu; Dioswanqa mana pujllakuy kanchu; chayrayku runa imatachus tarpun, chayllatataj oqharenqa.

⁸ Aychapaj tarpojqa, aychamanta wañuyta jap'enqa. Pichus Espiritupaj tarpojtaj, Espiritumanta wiñay kausayta jap'enqa.

⁹ Ama sayk'unachu allin kajta ruwaspa; tiempompi oqharisun, sichus llank'ayninchejpi mana sayk'usunchu chayqa.

¹⁰ Chayrayku sapa kuti atisqanchejman jina tukuypaj allinta ruwana, astawanqa fepi hermanosninchejpaj.

Pabloqa Cristoj cruzninmanta kusikun

¹¹ Qhawariychej. Kikin makisniywan jatuchaj letraswantaj escribimuykichej.

¹² Tukuy, aychaj munayninta ruwajkunaqa, munanku circuncidachikunaykichejta, ama Cristoj cruzninrayku qhatiykachachikunankupaj.

¹³ Circuncidasqa kajkunapis leyta waqaychaytaqa mana atinkuchu. Chantá munankutaj qankuna circuncidachikunaykichejta, chay jawa kusikunankupaj.

¹⁴ Noqaqa Señorninchej Jesucristoj cruznillampi kusikuni. Paynejta noqapajqa mundo chakatasqa karqa, noqataj mundopaj.

¹⁵ Cristopeqa mana allinchu circuncidasqa kayqa, nillataj mana circuncidasqa kaypis. Astawanqa, mosoj kausaymin aswan allin.

¹⁶ Tukuy kay kamachiykunaman jina purejkunaman sonqo samakuy, khuyakuytaj kachun; jinallataj Diospa ayllun Israelmampis.

¹⁷ Kunanmanta ñaupajmanqa amaña pipis umayta nanachiwachunchu, imaraykuchus ukhuypi apashani Jesuspa t'irisninta.

¹⁸ Hermanos, Señorninchej Jesucristoj khuyakuynin qankunawan kachun. Amén.