Gálatas 5 - Qheshwa Biblia DC

Sumajta kausakuychej kacharisqas jina

¹ Cristo juchamanta orqhospa salvawarqanchej. Chayrayku chay salvaciompi sumajta sayaychej, amataj ujtawanqa kamachi yugoman watakuychejchu.

² Uyariwaychej. Noqa Pablo niykichej: Sichus circuncidakunkichej chayqa, mana ima allintapis Cristoqa ruwasonqachejchu.

³ Ujtawan nini tukuy circuncidasqa kayta munajkunaman, Moisespa leynimpa kamachisqanta ruwananku kasqanta.

⁴ Leypi cheqan kasqaykichejta yuyakuspaqa, Cristomanta karunchakunkichej, Diospa khuyakuyninmantataj karunchakunkichej.

⁵ Noqaykoqa Espiritunejta, fenejtataj suyayku, Dios mana juchayojta jina rikhurichinawaykuta.

⁶ Cristo Jesuspeqa ni mayqen allinchu ni circuncidasqapis kay, nitaj mana circuncidasqapis. Manachayqa creeylla, maykenchus tukuy imata munakuynejta ruwan.

⁷ Qankunaqa walejllata risharqankichej. Pitaj pantachisorqachej cheqa kajta mana kasunaykichejpajri?

⁸ Kayqa mana jamunchu wajyasunkichej Diosmanta.

⁹ Qankuna yachankichej pisi levaduralla tukuynin masata poqochisqanta.

¹⁰ Noqa creeni qankuna allinta purinaykichejta, mana waj jinamanta yuyaspa. Pichus pantachisunkichej chayqa, jasut'isqa kanqa, pipis kachun.

¹¹ Hermanos, sichus noqa circuncisionmantaraj willani chayqa, imaraykutaj judíos qhatiykachawanku? Jina kanman chayqa, cruzmanta misk'ana mana kanmanchu.

¹² Walej kanman, pikunachus circuncisionwan pantachisunkichej, chaykuna ujkama khuchukunanku.

¹³ Qankunaqa hermanos, libres kanaykichejpaj wajyasqas kankichej, amataj aychaj munaynimpajchu kachun, manachayqa ujkuna ujkuna yanapanakuychej munakuywan.

¹⁴ Tukuy leyqa kay kamachiyllapi junt'akun: Runa masiykita qan kikiykita jina munakunki.

¹⁵ Sichus qankunapura khaninakuspa mikhunakuwajchej chayqa, pajtataj tukuchinakuwajchej qankunapura.

Aychaj munapayaynin, Espiritupitaj kausay

¹⁶ Niykichej ari: Espíritoj munaynimpi puriychej, amataj aychaj munaynintaqa ruwaychejchu.

¹⁷ Aychaj munaynenqa Espíritoj contran, Espiritupis aychaj munaynimpa contran. Ajina paykunaqa purajmanta chejninakunku. Chayrayku munasqaykichejtaqa, mana ruwayta atinkichejchu.

¹⁸ Sichus Espíritu pusaykachasunkichej chayqa, manaña leypa kamachimpichu kankichej.

^19-21 Sut'i kanku aychaj ruwasqasnenqa: Qhenchachakuy, ch'ichichakuy, millay puriy, lantita yupaychay, layqa kay, chejninakuy, maqanakuy, tumpanakuy, phiñanakuy, churanakuy, phiñanakuspa t'aqanakuy, waj yachachiykunata kasuy, chhoqonakuy, [runa wañuchiy,] machaykuna, qhochukuspi puriykuna, kayman rijch'akojkunapi ima. Chaykunata niykichej ama ruwanaykichejta, imaraykuchus ñaupajta nerqaykichejña. Kaykunata ruwajkunaqa Diospa chayaqenta mana jap'enqankuchu.

^22-23 Espíritoj ruwasqasninrí kaykuna: Munakuy, kusiy, sonqo tiyasqa kay, pacienciayoj kay, khuyakuy, k'acha kay, fe, llamp'u sonqo kay, maychus kajta kausakuy ima. Kaykunaj contrampeqa mana ima leypis kanchu.

²⁴ Cristojta kajkunaqa aychata chakatanku, sajra munayninkuta, munapayayninkutawan khuska.

²⁵ Sichus Espirituman jina kausanchej chayqa, Espirituman jinallataj purina.

²⁶ Ama qhasimanta runaykachanachu purajmanta phiñanakuspa, nitaj chhoqonakuspa.