Gálatas 3 - Qheshwa Biblia DC

Fenejta salvación chayamun

¹ Ya, mana yuyayniyoj Gálatas! Pitaj ch'aukiyasorqachej cheqa kajta mana kasunaykichejpajri? Qankuna ukhupi ñawiykichej rikushajtin, sut'ita Jesucristoj chakatakusqanmanta willarqayku.

² Kayllata yachayta munani qankunamanta: Santo Espiritutaqa leypa ruwanasninta ruwaspachu jap'erqankichej? Chayrí, fewan uyarispachu?

³ Chay jina wampuspunichu kankichej? Espíritoj munayninman jina qallarishaspa, kunanqa aychaj munayninman jinachu tukuychayta munashankichej?

⁴ Qhasipajchu chay pruebasqaykichej? Qhasipajpunichu?

⁵ Espirituta qoj Diosqa sumachaj imasta qankuna ukhupi ruwan. Kunan payqa leypa ruwanasninraykuchu ruwan, chayri fewan uyarisqaykichejraykuchu?

Dios tratota ruwan Abrahamwan

⁶ Ajinaqa Abraham Diospi creerqa, Diostaj payta cheqan runapaj jap'erqa.

⁷ Chayrayku yachaychej, cheqamanta pikunachus feniyoj kanku, Abrahampa wawasnin kanku.

⁸ Escriturapis ñaupajmanta yachaspa, Dios gentilesta fenejta runasnimpaj qhawasqanta, kay sumaj willayta Abrahammanña qorqa, nispa: Qampi tukuy runas bendicisqas kanqanku.

⁹ Ajinaqa feniyoj kajkuna creej Abrahamwan bendicisqas kanku.

¹⁰ Moisespa leynimpi confiajkunaqa maldicisqas kanku. Escribisqaman jina, imachus leypa librompi escribisqa kashan chayta, mana pipis junt'ajqa, maldicisqa kanqa.

¹¹ Chay leynejta mana Diospajqa cheqan runachu, imaraykuchus cheqan runaqa, fenejta kausanqa.

¹² Leyqa mana femantachu. Leyqa nin: Pipis kay imasta ruwasqanrayku kausanqa.

^13-14 Cristo qhechuwarqayku leypa maldicionninmanta. Paytaj noqaykurayku maldicisqa karqa. Chaytaj escribisqa kashan: Maldicisqa kanqa tukuy k'aspipi warkhusqa kajqa, Abrahampa bendicionnin Cristo Jesusnejta gentilesman chayanampaj. Ajina fenejta Dios qonawayku karqa, chay Espirituta jap'inaykupaj.

Leywan Diospa qosqayki nisqanwan

¹⁵ Hermanos, runa jinalla parlankichej: Uj tratoqa runajtapis kachun, sayachisqaña, mana pipis yanqhayachiyta atinchu, nitaj imata yapaykuyta.

¹⁶ Kunanqa Abrahamman, mirayninmanta jamojmanwan Dios qonanta nerqa. Manataj Escritura nerqachu: Mirayniykimanta jamojman, ashkhasmampis parlashanman jina, manachayqa ujllamanta parlan, chaytaj Cristo.

¹⁷ Kayta nini: Ñaupajta Diosqa Abrahamman tratota ruwarqa Cristo nacikunanmanta. Leyqa tawa pachaj kinsa chunkayoj watas qhepataña churasqa karqa, chayrayku mana atinchu Diospa qosqayki nisqanta chinkachiyta, nitaj yanqhayachiyta.

¹⁸ Sichus leynejta chayaqe kanman chayqa, manaña Diospa qosqayki nisqanraykuchu kanman. Diosrí Abrahamman chayaqeta qorqa qosqayki nisqanta junt'aspa.

¹⁹ Chantá, leyqa imapajtaj churasqa karqari? Leyqa churasqa karqa runakunaj juchasninkurayku Cristo jamunankama; pimanchus Dios nerqa qonanta. Leyqa angelesnejta qosqa karqa allinyachejpa Moisespa makinman.

²⁰ Allinyachejqa mana uj runajllatachu; Diosrí uj sapallan.

Leypa yuyasqan

²¹ Moisespa leynenqa Diospa qosqayki nisqampa contranchu? Chayqa mana jinachu; leyqa kausachinampaj qosqa kanman karqa chayqa, cheqan kayqa, cheqamanta leynejta kanman karqa.

²² Astawanqa Escritura nishan tukuy ima juchaj atiynimpi kasqanta, Diospa qosqayki nisqan fenejta Jesucristopi creejkunaman qosqa kanampaj.

²³ Manaraj fe jamushajtin, leypa kamachimpi kasharqayku suyaspa chay fe sut'inchakunankama.

²⁴ Ajinaqa ley uywaqeyku karqa, Cristoman pusanawaykupaj, Diospajtaj fenejta cheqan runas kanaykupaj.

²⁵ Fe chayamojtinkamataj, manaña uywaqeyojchu kayku.

²⁶ Chayrayku tukuyniykichej Diospa wawasnin kankichej, Jesucristopi creesqaykichejrayku.

²⁷ Cristopi tukuy bautizasqas kajkunaqa, Cristomanta p'achallisqas kankichej.

²⁸ Manaña kanchu judíos nitaj griegopis. Manaña kanchu kamachi nitaj mana kamachi kajpis. Nillataj kanchu qhari nitaj warmipis. Qankunaqa ujllaña kankichej Cristo Jesuspi.

²⁹ Sichus qankuna Cristojta kankichej chayqa, cheqamanta Abrahampa miraynin kankichej, chayaqetataj jap'inkichej Diospa qosaj nisqanman jina.