Gálatas 2 - Qheshwa Biblia DC

Pabloqa gentilespa apostolnin

¹ Chunka tawayoj watamanta ujtawan Jerusalenman wicharerqani Bernabeta, Titotawan pusarikuspa.

² Chayman rerqani Dios sut'ita kamachiwasqanrayku. Kurajkunamantaj willarqani evangeliota, chay willasqayqa ama qhasi kanampaj gentilespa chaupimpi.

³ Noqawan kasharqa chay Titoqa, griego kaspapis, mana kamachisqachu karqa circuncidachikunampaj.

⁴ Chaymantaj wakin llulla hermanos pakaymanta yaykumorqanku, wateqanawaykupaj Cristo Jesusnejta kacharisqaña kasqaykuta. K'amispataj ujtawan munasharqanku leypa kamachimpi kanaykuta.

⁵ Chaykunataqa mana uj chhikallantapis kasorqaykuchu, cheqa kaj evangelio qankunawampuni kanampaj.

⁶ Kurajkunapaj qhawasqa karqanku chaykunaqa, mana ima mosojtapis willarqaykuchu; imaraykuchus ñaupajta imaynachus karqanku chaymanta mana ima ruwanay tiyanchu, Diosqa mana runaj rijch'aynintachu qhawan.

⁷ Astawanqa manaraj paykunaman willashajtiy, yacharqanku gentilesman evangeliota willanay kasqanta; imaynatachus Pedropis kamachisqa karqa judiosman evangeliota willanampaj.

⁸ Chayrayku imaynatachus Pedrota Dios judiosman kacharqa llank'anampaj, ajinallatataj noqatapis kachawarqa gentileswan llank'anaypaj.

⁹ Chayrayku kurajkuna, Santiago, Pedro, Juan ima, noqaman Bernabemanwan willana qosqa kasqanta yachaspa, paña makinkuta jaywawarqayku uj yuyaylla kanaykupaj, noqayku gentilesman evangeliota willaj rinaykupaj, paykunataj judiosman.

¹⁰ Wajchasllamanta yuyarikunaykuta mañawarqayku; chaytaqa usqhayllata tukuy sonqo junt'arqani.

Pablo Antioquiapi Pedrota k'amin

^11-12 Pedro Antioquiaman jamojtintaj, uyampi k'amerqani. Payqa juchachanapaj jina karqa, imaraykuchus Santiogomanta kajkuna manaraj jamushajtinku, gentileswan mikhoj. Chayamojtinkutaj mikhunata saqej, paykunamantataj t'aqakoj, judiosta manchachikuspa.

¹³ Ajinaqa Pedroj puraj uya kayninta wakin judíos qhaterqanku. Bernabepis paykunaj puraj uya kayninkupi purisharqa.

¹⁴ Maypachachus rikorqani mana allinta purejta, evangelioj cheqa kayninman jina, chaypacha tukuypa ñaupaqempi Pedroman nerqani: Sichus qan judío kashaspa, gentiles jina kausanki, manataj judío jinachu chayqa, imaraykutaj kamachinki gentilesqa judíos jina kanankutari?

Judioswan gentileswan fenejta salvasqas kanku

¹⁵ Noqaykoqa nacisqaykumantapacha judíos kayku, manataj gentilesmanta juchasapaschu kayku.

¹⁶ Yachaspa runaqa mana leypa ruwanasninraykuchu mana juchayojpaj rejsisqa kasqanta, manachayqa Jesucristopi creesqanraykulla. Noqaykupis Cristopi creerqayku, paypi fenejta mana juchayojpaj rejsisqa kanaykupaj, manataj leypa ruwanasninraykuchu. Mana pipis leypa ruwanasninraykuchu, mana juchayojpaj rejsisqa kanqa.

¹⁷ Cristopi mana juchayojpaj rejsisqa kayta mask'ashaspachus, noqaykupis juchayoj tarisqas kaykuman chayqa, chaychu niyta munan Cristoqa juchata ruwachisqanta? Chayqa mana jinachu.

¹⁸ Sichus imatapis urmachispaña chayllatataj sayarichiyman chayqa, juchasapa kayman.

¹⁹ Noqaqa leynejta leypaj wañusqa kani, Diospaj kausanaypaj.

²⁰ Cristowan khuska chakatasqa karqani, manataj noqañachu kausani, manachayqa Cristo kausan noqapi. Kunan aychapi kausashaspapis, Diospa Churimpi creesqayrayku kausashani. Pay munakuwarqa, pay kikintaj wañorqa noqarayku.

²¹ Diospa khuyakuynintaqa mana qhesachanichu. Sichus leynejta mana juchayoj rikhuriykuman chayqa, qhasi mana kajpaj Cristoqa wañorqa.