Gálatas 1 - Qheshwa Biblia DC

Pabloj napaykuynin

¹ Noqa Pablo, apóstol kani, mana runaspa churasqanchu nitaj paykunaj kachasqanchu. Manachayqa Jesucristonejta churasqa kani, Dios Tatanejtataj; pichus Cristota wañusqakunamanta kausarichimorqa.

² Noqawan kashanku chay tukuy hermanoswan, Galaciapi kaj iglesiasman napaykamuyku.

³ Qankunapaj kachun khuyakuy, sonqo tiyakuytaj, Dios Tatanchejmanta, Señor Jesucristomantawan.

⁴ Pay kikin wañorqa juchasninchejrayku, kay sajra p'unchaykunamanta kacharichinawanchejpaj, Dios Tatanchejpa munayninman jina.

⁵ Pay yupaychasqa kachun wiñaypa wiñaynimpaj. Amén.

Mana waj evangelio kanchu

⁶ T'ukuni chay jina usqhayta karunchasqaykichejmanta Diosmanta, pichus Cristoj khuyakuyninrayku wajyasorqachej, waj jina evangeliota qhatisqaykichejmantapis.

⁷ Cheqamanta mana waj evangelioqa kanchu; manachayqa wakin runakuna tiyan qankunata pantachejkuna, Cristoj evangeliontataj waj jinaman tukuchiyta munanku.

⁸ Noqaykuchus, chayri janaj pachamanta jamoj angelchus, chay evangeliota willasqaykumantaña, waj jina evangeliotataj willasunkichejman chayqa, maldicisqa kachun.

⁹ Ñaupajta nerqaniña, kunan nillanitaj: Pillapis chay evangeliota uyarisqaykichejmantaña waj evangeliotataj willasunkichejman chayqa, maldicisqa kachun.

¹⁰ Chantá kunanqa runakunamanchu, chayrí Diosmanchu allin rijch'ayta mask'ashani? Chayrí, runastachu kusichiyta munashani? Runastarajchus kusichiyman chayqa, mana Cristoj kamachinchu kayman.

Pabloj ruwasqan

¹¹ Hermanos, yachaychej noqaj willasqay evangelioqa mana runaj nisqanman jinachu kasqanta.

¹² Noqaqa evangeliota mana jap'erqanichu nitaj yachakorqanichu pi runamanta, manachayqa Jesucristo sut'inchawasqanrayku yachakorqani.

¹³ Ñapis qankunaqa uyarerqankichejña noqamanta, imaynatachus ñaupajta judiospa yachachiynimpi kashaspa, Diospa iglesianta anchatapuni qhatiykacharqani chinkachinaypaj.

¹⁴ Ashkha mita masisniyta llajtaypi atiparqani, judiospa yachachiynimpi; tatasniypa yachachiyninta ancha munakuywan waqaychaspa.

¹⁵ Chantá, maypachachus Dios munarqa wajyawayta, chaypacha khuyakuyninrayku mamaypa wijsanmantapacha ajllawarqa.

¹⁶ Diosqa rejsichiwarqa Churinta, paymanta gentilespa chaupimpi willanaypaj; chaypachataj mana pi runatapis tapurikorqanichu.

¹⁷ Manataj Jerusalenmanchu wicharerqani, noqamanta astawan ñaupajta karqanku chay apostolesman, manachayqa Arabiaman rerqani. Chaymantataj ujtawan Damascoman kutirerqani.

¹⁸ Chaymantataj kinsa watamanta Jerusalenman wicharerqani Pedrowan parlanaypaj; paywantaj chunka phishqayoj p'unchayta karqani.

¹⁹ Chaypitaj mana mayqen apostoltapis rikorqanichu, manachayqa Señorpa wauqen Santiagollata.

²⁰ Kay imasta escribimuykichej, Diospa ñaupaqempi mana llullakuspa.

²¹ Chaymantataj rerqani Siria jallp'asman, Cilicia jallp'asman ima.

²² Judeapi, Cristopi kaj iglesias manaraj rejsiwarqankuchu.

²³ Paykunaqa uyarillaj kanku: Jaqay pichus ñaupajta qhatiykachawaj kanchej tukuchiyta munaspa, chay, kunanqa femanta willashan, nispa.

²⁴ Ajinata Diosta yupaycharqanku noqarayku.