Filipenses 2 - Qheshwa Biblia DC

Cristoqa k'umuykukusqanrayku oqharisqa karqa

^1-2 Chayrayku, sichus Cristopi tiyan ima sonqochakuypis, Espíritoj ujchakuynimpis, tukuy sonqo munakuypis, ima khuyakuypis chayqa, kusikuywan sonqoyta junt'aykuchiychej; uj sonqolla kaspa uj kikin munakuywan, ujchakuspa uj yuyaylla kaspa imapipis.

³ Ama imatapis ruwaychejchu churanakuspaqa, nitaj may yachayniyojman tukuspa, astawanqa llamp'u sonqowan sapa ujtaj qhawachun ujkunata, paymanta aswan kurajkunata jina.

⁴ Amataj mayqempis paypa kajllata qhawachunchu, astawanqa sapa uj wajkunapajpis allin kajta qhawachun.

⁵ Qankunapipis kachun, imaynatachus Cristo Jesuspi kay yuyay karqa, chay jinallataj.

⁶ Cristoqa Dios kashaspapis, payqa mana munarqachu Diosta jina qhawanankuta.

⁷ Pay kikin, Dios kayninta lluch'ukuspa, uj kamachi jina jamorqa runaman rijch'asqa.

⁸ Runa kaspataj, k'umuykukorqa; paytaj kasukoj kaspa wañuyman rerqa, cruzpi chakatasqa wañumoj.

^9-11 Chayrayku Diosqa payta anchatapuni jatuncharqa, uj sutitataj qorqa tukuy sutismanta astawan sumaj sutita, Jesuspa sutimpi qonqorikunankupaj tukuy janaj pachapi kajkuna, kay pachapi kajkunapis, ukhu pachapi kajkunapis; tukuy runastaj ninankupaj Jesucristo Señor kasqanta, Dios Tata yupaychasqa kanampaj.

Cristianosqa k'anchay kanku kay pachapeqa

¹² Munakusqasníy, imaynatachus qankuna kasuwajpuni kankichej chaypi kashajtiy; chantá mana chaypi kashajtillaychu, astawanqa karupi kashajtiypis kasuwankichej. Chayrayku kunanqa astawan llank'aychej salvacionniykichejpi Diosta manchachikuspa.

¹³ Diosqa qosunkichej allin munayta, ruwaytataj sumaj munayninman jina.

^14-15 Tukuy imata ruwaychej ama rimanakuspa, nitaj phiñanakuspa, ama k'amina kanaykichejpaj. Diospa wawasnin kaychej mana ch'ichiyoj, juchasapa sajra miraypa chaupimpi. Qankunaqa lliphipishankichej qoyllurkuna jina kay laqhayaj pachapi.

¹⁶ Diospa wiñay kausaj palabranmanta jap'ikuychej, Cristoj p'unchaynin jamojtin, noqa kusikunaypaj, imaraykuchus mana qhasipajchu purerqani, nitaj qhasipajchu llank'arqani.

¹⁷ Yawarniy jich'asqa kanman chayqa ofrendasniykichej pataman, feniykichejpa patanmampis chayqa, chaymanta kusikuni jatun kusiywan tukuyniykichejwan khuska.

¹⁸ Jinallatataj qankunapis kusikuychej noqawan khuska.

Timoteowan Epafroditowan kachamusqas kanku

¹⁹ Señor Jesús munanqa chayqa, suyashani usqhayta kachamuyta Timoteota qankunaman, noqapis kusikunaypaj imaynachus kasqaykichejmanta yachaspa.

²⁰ Manataj pipis kanchu pay jina qankunamanta yuyarikojqa; imaraykuchus tukuy sonqo qankunamanta watukun.

²¹ Tukuy mask'anku ari paykunajllata, manataj Cristo Jesuspa kajtaqa.

²² Chaywampis, qankuna yachankichej imaynatachus Timoteo rejsichikusqanta qankunawan; jinallataj imaynatachus uj chureqa tatanta yanapan, ajinata payqa noqawan evangeliomanta willaspa.

²³ Kunanqa suyashani payta kachamunaypaj qankunaman, imaynachus rinawanta yachaytawankama jamunampaj.

²⁴ Kunanqa Señorpi suyashani noqa kikiy usqhayta jamuyta qankunata watukoj.

²⁵ Kachamunaypuni karqa hermano Epafroditota. Payqa yanapawajniy, noqawan khuskataj maqanakupi ima kaj. Payta qankuna kachamuwarqankichej yanapanawampaj tukuy pisichikuyniypi.

²⁶ Payqa maytapuni munarqa tukuyniykichejta rikuyta; llakikorqataj yachaspa qankuna uyarisqaykichejta pay onqosqa kasqanta.

²⁷ Arí, cheqamanta onqosqa karqa, yaqhapuni wañorqa. Chaywampis Dios payta khuyarqa, manataj payllatachu, noqatapis khuyallawarqataj, ama astawan llakisqa kanaypaj llakiyniy patai.

²⁸ Chayrayku usqhayta kachamushani qankuna kusikunaykichejpaj ujtawan payta rikuspa, noqapis amaña chaykama llakisqa kanaypaj.

²⁹ Wajyarikuychej payta tukuy kusikuywan, Señorpi pay jina kajkunatapis sumajta qhawaychej tukuy imapi.

³⁰ Wañusharqaña Cristoj ruwayninrayku, noqaraykutaj kausaynintaj churarqa. Wañuy patapiña karqa yanapanawampaj, imaraykuchus mana qankunaqa karupi kaspa yanapawayta aterqankichejchu.