Ezequiel 7 - Qheshwa Biblia DC

Tukukoyqa qayllapiña

^1-2 Señorqa noqaman parlamuwarqa, niwarqataj: Noqa Señorqa, Israel aylluman nini: Tukukoyqa chayamunña, tukuynin jallp'aj tukukuynenqa chayamunña.

³ Israel, chayamunña tukukuyniykeqa. Phiñakuyniyta pataykiman urmachimusaj. Purisqaykimanta cuentata mañasqayki, millay imasta ruwasqasniykimantataj jasut'isqayki.

⁴ Mana perdonasqaykichu nitaj khuyakusqaykichu. Sajrata purisqaykimanta jasut'isqayki, millay ruwasqasniykitataj sut'inchasqayki. Chaymantaraj, yachankichej noqa Señor kasqayta.

⁵ Kay jinata Señorqa nin: Mana allenqa qhepampi qhepampi jamushan.

⁶ Tukukoyqa jamushan, qayllamushampuni. Tukukunayki p'unchayqa qayllamushanña.

⁷ Kay naciompi tiyakojkunaj tukukuynenqa chayamushanña, ch'ajwana p'unchay chayamushan, lomaspi kusikoyqa tukukunña.

⁸ Kunampacha usqhayllata phiñakuyniyta pataykiman urmachimusaj, chantá phiñakuyniymanta qampi samarikusaj. Purisqaykimanta cuentata mañasqayki, millay imasta ruwasqasniykimantataj jasut'isqayki.

⁹ Mana khuyakusqaykichu, nitaj perdonasqaykichu. Astawanqa sajra kausaypi purisqaykimanta jasut'isqayki, millay imasta ruwasqasniykimantataj uyanchasqayki. Ajinamanta yachankichej, noqa Señor qankunata jasut'ej kasqayta.

¹⁰ Kayqa chay p'unchayqa. Chayamushanña! Sut'iyamushanña! Sajra kajqa tukuynejpi t'ika jina qhallallarishan, alqochakuytaj may karishan.

¹¹ Mana allin ruwayqa qallarikun, sajra kausaytataj poqon. Paykunataj munasqankuta mana ruwayta atenqankuchu qhapaj kayninkuwan, nitaj qhaparisqankuwampis, paykuna ukhupitaj mana ujpis llakirikoj kanqachu.

¹² Tiempoqa chayamunña, p'unchaytaj qayllapiña. Qhatupi vendejqa ama kusikuchunchu. Rantikojpis ama phutikuchunchu. Israelpa runaykachayninta phiñakuywan jasut'isaj.

¹³ Imallatapis vendejqa tukuy kausaynimpi manaña ujtawan jap'ikapuyta atenqañachu, qhatu ruwasqantataj mana chinkachiyta atenqachu. Sajra ruwajkunataj kausayninkuta mana waqaychayta atenqankuchu.

¹⁴ Putututa waqachenqanku maqanakuyman wajyaspa, nitaj pipis maqanakamunampaj llojsej kanqachu. Israelpa jatunchakuynintaqa k'ajaj phiñakuyniywan jasut'isaj.

¹⁵ Jawapeqa maqanakuy tiyan, ukhupitaj onqoykunawan, yarqhaykunawantaj wañuranqanku. Jawapi kajkunaqa maqanakuypi wañuranqanku. Llajtapi kajkunataj yarqhaywan, onqoykunawantaj wañuranqanku.

¹⁶ Tukuy atipajkunataj lomas pataman mancharisqa palomas jina ayqenqanku, chay tukuywampis juchankuraykoqa wañonqankupuni.

¹⁷ Tukuyninkojta makisninku llauch'iyanqa, manchariywantaj qonqorisninku kharkatitenqa.

¹⁸ Qhashqa p'achata churakonqanku sonqo nanayta rikuchispa. Tukuyninkojta uyasninkupis p'enqachisqas umankutaj raphasqas kanqanku.

¹⁹ Qolqesninkutapis callesman wijch'onqanku q'opata jina. Ni qorinku, nitaj qolqenkupis paykunataqa salvayta atenqachu Señorpa k'ajaj phiñakuynin chayamonqa chay p'unchaypeqa. Chaykunaqa almankuta mana sajsachiyta atenqankuchu, nitaj wijsantapis junt'achiyta atenqachu, imaraykuchus chay qori, paykunataqa sajra kausayman misk'acherqa.

²⁰ K'acha imasninkunejtataj jatunchakorqanku, imaraykuchus chaykunawan millay lantisninkuta ruwakorqanku. Chayrayku noqaqa chay k'acha imasninkutaqa q'opaman tukuchisaj.

²¹ Waj llajtayojta kachaykamusaj paykunamanta suwanankupaj. Waj kaypachamanta aswan chejnina jamuchunku, israel runakunata millay ch'ichi runata jina apaykachanampaj.

²² Noqa kay runasmanta karunchakusaj, saqesajtaj may munasqa yupaychanawanku imasniyta mana allinman tukuchinankuta. Sajra suwa runas jamuspa wasiytaqa mana allinman tukuchenqanku.

²³ Uj cadenata wakichiy, imaraykuchus kay naciompeqa ashkha runa wañuchista juchachashanku, llajtaqa sajra ruwaykunawan junt'a kashanku.

²⁴ Noqa Señor waj nacionesmanta sajra runasta pusamusaj, paykuna llajtapi wasista jap'ikaponqanku. Atiyniyojkunaj jatunchakuyninta chinkachisaj, yupaychanasninku cheqastataj mana allinman tukuchisaj.

²⁵ Manchay llakiypuni jamushan. Sonqo tiyakuyta mask'anqanku, manataj tarenqankuchu.

²⁶ Mana allin kausaytaj qhepan qhepanta jamonqa. Ñataj mana allin imas uyarikonqa. Qhasilla mask'anqanku mayqen profetallapis sut'inchananta. Paykunaman yachachinampaj mana sacerdotes kanqachu, nitaj kurajkunapis paykunata yupaychanankupaj.

²⁷ Reyqa llakikuy p'achata churakonqa. Kamachejqa jatun llakikuypi rikhurenqa, runakunataj tukuynin kharkatitenqanku. Purisqankuman jina paykunata ruwasaj, cheqanchasajtaj, imaynatachus paykuna cheqanchanku ajinata. Ajinamanta rejsiwanqanku noqa Señor kasqayta.