Ezequiel 6 - Qheshwa Biblia DC

Ezequiel lantispa contranta sut'inchan

^1-3 Señorqa parlamuwaspa niwarqa: Runa, Israelpa lomasta qhawariy, sutiypitaj paykunaj contrampi sut'inchay, kay jinata: Uyariychej Israel lomas, imatachus Señor lomasman nisqanta, ch'utusman, mayusman, vallesman ima. Maqanakuyta qankunaman apachimusqaykichej, lantita yupaychana cheqasniykichejta thuñirasaj.

⁴ Altaresniykichejta, inti lantisniykichejtapis t'unarasaj, maypichus qankunaqa uywasta wañuchispa jaywaj kankichej, inciensostapis ruphachej kankichej chaykunata. Runasniykichejta lantisniykichejpa ñaupaqempi wañurachisaj.

⁵ Israelitaspa ayasninta lantisninkoj ñaupaqenman wijch'urasaj, tullusniykichejtataj altaresniykichejpa muyuyninman t'akarasaj.

⁶ Tukuynej cheqapi tiyakunkichej chaykunapi llajtasqa thuñisqasllataj kanqanku. Altaresniykichejqa tukuynin t'unaykusqaspuni kanqanku. Lantisniykichej, intiman rijch'akoj lantisniykichejpis phirisqas kanqanku, inciensota ruphachinaykichej altarespis urmachisqasllataj kanqanku, tukuy ima ruwasqasniykichejpis chinkachisqas kanqanku.

⁷ Chay chhika runas qankuna ukhumanta wañurajta rikuspa rejsiwankichej noqa Señor kasqayta.

⁸ Chaywampis noqa saqesaj qankunamanta wakinkuna ama wañunankuta, astawanqa kausanankuta, waj jallp'asman ch'eqerasqas kasqankupi.

⁹ Chay nacioneswan ayqekojkunaqa noqamanta yuyarikuwanqanku. Yuyarikullanqankutaj imaynatachus noqa paykunata ñak'arichisqayta noqawan mana allinta purisqankurayku, lantista yupaychanankupaj noqamanta karunchakuspa. Paykuna kikinku p'enqachikonqanku tukuy sajra ruwayninkumanta, tukuy ima khuchiriosta ruwasqankumanta ima.

¹⁰ Chaypacha rejsiwanqanku noqa Señor kasqayta, imaraykuchus mana qhasitachu kay mana allin imasta paykunaman apachimunayta nerqani.

¹¹ Señorqa kay jinata niwarqa: Sonqoykita nanachikuy, makisniykita t'ajllakuy, chakisniykiwantaj p'atatiyay. Israel aylloj millay imasta ruwasqasninmanta nanaywan qhaparqachay, imaraykuchus ch'ajwapi, yarqhaywan, onqoywantaj wañonqanku.

¹² Karupi kajkunaqa onqoywan wañonqanku. Qayllapi kajkunaqa ch'ajwapi wañonqanku. Kausashajkunataj yarqhaywan wañuranqanku. Ajinata phiñakuyniyta paykunawan junt'ayta tukuchisaj.

¹³ Maypachachus runa wañurasqasta rikunkichej lantisniykichej chaupipi, altarespa muyuynimpi, chantá alto lomas patapi, lomaspa kinraykunasnimpi, jinallataj q'omer sach'as urapi, encinas nisqa thansarara sach'as urapi, chantá maypichus tukuy lantisniykichejman inciensota jaywarqankichej chay tukuynejpitaj, chaypacharaj yachankichej noqa Señorqa kasqaytaqa.

¹⁴ Makiyta oqharisaj paykunata jasut'inaypaj, uray ladopi ch'in pampamanta wichaypi kaj Ribla nisqa chaykama. Tukuynejpi tiyakunku chay jallp'astaqa, ch'inmantapis aswan ch'inman tukuchisaj. Chaypacharaj rejsiwanqanku noqa Señor kasqaytaqa.