Ezequiel 5 - Qheshwa Biblia DC

¹ Señorqa niwarqa: Kunanqa runa, sumaj afilasqa cuchillota jap'iy, sunkhata raphanapaj navajata jina, chaywantaj umaykita, jinallataj sunkhaykitapis raphakuy. Chantá uj balanzata jap'iy, chujchasniykitataj kinsaman t'aqay.

² Llajtata muyupayana junt'akojtintaj kinsaman t'aqasqa chujchasmanta uj kajta llajta chaupipi nanawan ruphachinki. Uj cuchillota jap'iy, chaywantaj chay kinsa t'aqamanta uj kaj t'aqa chujchasta llajtaj muyuynimpi k'uturanki. Uj kaj t'aqa chujchastataj wayrawan apachinki. Paykunaj qhepantataj noqa espada oqharisqa risaj.

³ Uj pisi chujchasta jap'iytawan p'achaykej cantosninman watarakunki.

⁴ Chay chujchasllamantataj wakinta jap'iytawan ninawan ruphachiy. Chaymantaqa nina llojsenqa israelitakunaj contrampi.

⁵ Noqa Señormin kaytaqa nini: Jerusalén llajtaqa chaypi kashan. Noqa kay llajtataqa ashkha nacionespa chaupimpi churarqani, ashkha llajtas chaupipitaj.

⁶ Payrí leyesniypa contrampi, kamachisqasniypa contrampi ima oqharikorqa, muyuynimpi kashanku chay ayllusmanta, llajtasmantapis astawanraj. Leyesniyta mana kasunkuchu, nitaj kamachisqasniytapis junt'ankuchu.

⁷ Chayrayku Señorqa kay jinata nin: Muyuyniykichejpi kajkuna nacionesmanta aswan ashkhaman miraykuspachu, qankunaqa kamachisqasniyta mana kasuspa purinkichej, nitaj leyesniytapis waqaychaspa? Nitaj muyuyniykichejpi kashanku chay nacionespa leyesninkuman jinallapis purinkichejchu.

⁸ Chayrayku noqa Señorqa, qanta niyki: Noqapis Jerusalén contraykipi churakusaj arí, noqa juchachasqayki muyuyniykipi kashanku chay nacionespa rikunanta.

⁹ Mana jayk'aj ruwasqayta qanwan ruwasaj, nitaj ujtawampis ruwasajñachu. Chay tukuy ruwasqasniykeqa millachikunapaj jina kanku.

¹⁰ Chayrayku, qankuna ukhupi wawasninkuta mikhuykojkuna kanqanku, jinallataj wawaspis tatasninkuta mikhuykojkuna kanqanku. Jasut'isniyta qampi rikuchisaj, qanmanta puchojtataj tukuynejman cheqerachisaj.

¹¹ Chantapis Señorqa nin: Noqa kausayniyrayku jurani, tiyakunay cheqanta chhika millay juchaswan ch'ichichasqaykirayku noqapis qanta qhesachasqayki, mana perdonasqaykichu, nitaj khuyakusqaykichu.

¹² Qankuna ukhupi kinsaman t'aqasqamanta uj t'aqa, onqoywan wañuranqanku, chayri yarqhaywan qankuna chaupipi tukukonqanku. Uj t'aqataj espadawan wañurachisqas muyuyniykipi kanqanku. Ujnin t'aqatataj tukuynejman ch'eqerachisaj, paykunaj qhepantataj espadawan qhatiykusaj.

¹³ K'ajaj phiñakuyniyta thasnuchisaj. Tukuy phiñakuyniywan paykunaman samarakusaj. Paykunata jasut'isqaypi sonqoyta samarichisaj. Chay jinamanta yachanqanku, noqa paykunamanta tukukuspa parlasqayta, phiñakuyniywan paykunapi samarikusqayta.

¹⁴ Qanta Jerusalén llajta, ch'impachaman tukuchisqayki, muyuyniykipi kashanku chay nacionespa ñaupaqempi p'enqaypi rikhurichisqayki, jinallataj tukuy purejkunaj rikunankuta.

¹⁵ Maypachachus noqa qanta jasut'isqayki, k'ajaj phiñakuyniywan sinch'ita ñak'arichisqayki chaypacha, tukuy runakuna alqochakusonqanku, mana allimpajtaj qhawasonqanku. Muyuyniykipi kaj naciones millachikusonqanku, jatun manchachikuyninkupajtaj kanki. Noqa Señormin kaytaqa nini.

¹⁶ Noqa yarqhayta qankunaman apachimusqaykichej manchayta t'unaykoj flechasta jina. Arí, yarqhaywan ch'ayñachisqaykichej, mikhuykunasta pisiyachisaj.

¹⁷ Noqapuni apachimusqaykichej yarqhayta, onqoyta, wañuyta ima. Sajra animalestataj kachamusqaykichej mana wawasniyojta saqesunaykichejpaj, saqesajtaj qankunamanta ashkhas ch'ajwapi wañuranaykichejta. Noqa Señormin chaytaqa nini.