Ezequiel 46 - Qheshwa Biblia DC

Reyeswan runaswan imaynatachus ruwanankumanta

¹ Señorqa kay jinata nin: Ukhu patioj inti llojsimuynejpi kaj punkonqa, sojtantin llank'ana p'unchaykunapi wisq'asqa kanqa. Samakuna p'unchaypitaj kichakonqa. Mosoj killa rikhuriy p'unchaypipis kichakullanqataj.

² Kamachejqa jawa patio punkumantapacha corredor punkuman yaykuspa, ujnin kaj punkoj sayantampi sayaykonqa. Chaykamataj, sacerdotesqa uywa ñak'asqasta ninapi ruphachispa Señorman jaywanqanku, kamachejpa qosqan allinyakunapaj kaj jaywanata. Kamachejtaj chay punkupi pampakama k'umuykuspa Diosta yupaychanqa, chaymantataj llojsiponqa. Punkutaj mana wisq'akonqachu inti chinkaykunankama.

³ Chay jinallatataj runaspis kikin punkoj ñaupaqempi Señorta yupaychanqanku samakuna p'unchaykunapi, chantá mosoj killa rikhuriypiwan.

⁴ Samakuna p'unchaypi, kamachejqa uywasta ñak'aspa, ninapi ruphachispataj Señorman jaywanqa. Chaykunaqa kanqa sojta ovejas, uj corderopiwan. Chay uywastaj mana iman imanasqas kananku tiyan.

⁵ Sapa corderospaj chunka kilos trigo jak'utawan qonqanku, corderospajtaj atisqankuman jina qonqanku. Sapa iskay chunka kilo jak'upajtaj kinsa litros khuskanniyoj aceiteta qonqanku.

⁶ Mosoj killa rikhuriy punchaypitaj, tropa wakamantaqa uj uña wakata qonqa, chaytaj mana iman imanasqa kanan tiyan. Chantapis sojta corderosta, uj carnerotawan, chaykunapis mana iman imanasqas kananku tiyan.

⁷ Sapa uña wakaman churanqanku, iskay chunka kilo jak'utawan, kikillantataj sapa carneromampis. Corderospajtaj atisqankuman jina. Sapa iskay chunka kilo jak'upajtaj, kinsa litros khuskanniyoj aceiteta qonqanku.

⁸ Kamachejqa corredor punkunejta yaykunan tiyan, chantá chaynillantataj llojsipunan tiyan.

⁹ Chay jallp'ayoj runas fiestapi Señorta yupaychaj yaykonqanku chaypachaqa, wichaynej punkunta yaykonqanku, uraynej punkuntataj llojsenqanku. Uray punkumanta yaykojtaj, wichaynej punkunta llojsenqanku. Mana mayqen punkuntachus yaykumorqanku chaynillantatajqa llojsenqankuchu, manachayqa chimpampi kaj punkunnejta llojsenqanku.

¹⁰ Kamachejqa runaswan khuska yaykonqa, paykunawan khuskallataj llojsenqa.

¹¹ Tukuy laya fiestapi, jinallataj jatun tantakuykunapi ofrendasta qona kanqa, sapa uña wakamanta iskay chunka kilo jak'utawan, kikillantataj sapa carneromanta. Corderosmantapis atisqankuman jina qonqanku. Sapa iskay chunka kilos jak'upajtaj kinsa litro khuskanniyoj aceiteta qonqanku.

¹² Kamachej munayninmanta, uywa ñak'asqata ninapi ruphachispa jaywana kajta, allinyakuy ofrendastawan Señorman qoyta munajtin inti llojsimuynejpi kaj punkuta paypaj kichariponqanku. Yaykuspataj samakuna p'unchaypi jina jaywanqa, chantá llojsipojtintaj punkutaqa wisq'aykaponqanku.

Señorman sapa p'unchay jaywanamanta

¹³ Sapa p'unchay tutamanta, uj watayoj orqo ovejata Señorman jaywanki ninapi ruphachispa, chaytaj mana iman imanasqa kanqa.

¹⁴ Ajinallatataj sapa paqarin Señorman ofrendata qonki, qanchis kilo granosta, uj litro aceitetawan, chaywantaj jak'u pataman jich'anki. Kay ruwanaqa kanampuni tiyan.

¹⁵ Orqo ovejata, grano ofrendasta ima, sapa paqarimpuni ninapi ruphachispa jaywanqanku.

Kamachejqa imatachus jallp'anwan ruwananmanta

¹⁶ Señorqa kay jinata nin: Sichus jatun kamachej jallp'amanta wakin jallp'anta wawasninman qonqa chayqa, paykunajtapuni kanqa, chayaqenmanta qhepa mirayninman qonankupaj.

¹⁷ Astawampis, sichus kamachejqa chayaqenmanta ujnin kamachinman qorinman chayqa, paypata kacharisqa kanqa chay watakamalla. Chaymantaqa kamachejpata kanqa, paypa wawasnimpa chayaqempajtaj qhepakonqa.

¹⁸ Kamachejqa ayllu runasmanta mana atiyniyojchu jallp'ankuta qhechuranampaj, nitaj pimantapis. Paypata kajllamanta wawasninman chayaqestas qonqa. Ajinamanta mana pipis ayllunmantaqa mana jallp'ayojqa kanqachu, nitaj ch'eqerakonqankuchu.

Diosta yupaychana wasipi q'onchas

^19-20 Chaymanta pusawarqa punkuman yaykuna ñannejta, chantá sacerdotespaj t'aqasqa kaj wasisman pusaykuwarqa. Chay wasistaj wichaynejman qhawarisqas karqanku. Rikorqanitaj uj cheqata inti yaykuy ladopi, chayta rikuchispataj, niwarqa: Kaynejpi sacerdotesqa wayk'onqanku, juchamanta jaywasqa uywaspa aychanta, jinataj ofrenda qosqa granostapis chayachenqanku. Manataj jawa patioman orqhonqankuchu. Ayllumanta kaj runaspis ajinamanta llimphu kaj imaswan mana chajrukonqankuchu.

²¹ Jawa patioman chaymanta orqhowarqa, chaypitaj tawantin patioj esquinasninman pusawarqa. Sapa esquinapitaj uj juch'uy patio karqa.

²² Chay patioj sapa esquinampi kaj juch'uy patiostaj wisq'asqas karqanku, sapa ujtaj sayt'unman iskay chunka metrosniyoj karqa, anchonmantaj chunka phishqayoj metrosniyoj, ajina tawantin uj rejlla karqanku.

²³ Uj perqawan muyuykusqas karqanku, chay cantosnimpitaj q'onchaswan muyuykusqas karqanku.

²⁴ Señortaj niwarqa: Chaynejpipis Diosta yupaychana wasimpi sirvejkunaqa, israelitas rikuchikuta jaywanapaj apamunku chay uywaspa aychasninta t'impuchenqanku.