Ezequiel 45 - Qheshwa Biblia DC

Palestinapi Señorpaj t'aqasqa jallp'a

¹ Suerteta choqaspa jallp'ata t'aqashaspaqa uj cheqata Señorpaj t'aqankichej, chay jallp'ataj sayt'unmanqa chunka iskayniyoj kilómetros khuskanniyoj kanqa, anchonmantaj chunka kilómetros kanqa, chay jallp'aqa Señorllapaj t'aqasta kanqa tukuynin jallp'amanta.

² Chay jallp'amantaqa Diosta yupaychana wasipaj t'aqakonqa iskay pachaj phishqa chunkayoj metros tawantin ladosman. Muyuynimpi pastospaj jallp'aqa, iskay chunka phishqayoj metrosniyoj anchonman kanqa.

³ Chay Diosta yupaychana waseqa chay jallp'api kanqa, chantá Diospa tiyakunan khuskannin cheqapis chay ukhullapitaj kanqa.

⁴ Chay jallp'ataj sayt'unman kanqa iskay legua khuskanniyoj, anchonmantaj uj legua. Chay t'aqasqa jallp'aqa sacerdotespaj kanqa, paykunaqa Señorqa sirvinku, paymantaj kamachisqanta ruwanankupaj qayllakunku. Paykunaj wasinkupaj kanqa. Ajllasqa jallp'aqa Diosta yupaychana wasipaj waqaychasqa kanqa.

⁵ Chantapis waj jallp'a kallanqataj sayt'unman iskay legua khuskanniyoj, anchonmantaj uj leguayoj. Chaytaj Diosta yupaychana wasipi imastapis ruwanku chay levitaspaj waqaychasqa kanqa, chaypi uj llajtata ruwakuspa tiyakunankupaj.

⁶ Chay qhepataqa uj llajtapaj t'aqasqa kanqa, sayt'unman iskay legua khuskanniyoj, iskay kilómetros, anchonmantaj khuskan legua Diosta yupaychana wasipaj t'aqasqa karqa chay qayllapi, chaytaj tukuy Israel ayllupaj qosqa kanqa.

Kamachejkunapaj t'aqasta jallp'a

⁷ Kamachejpaj uj cheqa jallp'a waqaychasqa kanqa. Uj cheqaqa inti llojsimuynejpi kanqa, uj cheqataj inti yaykuynejpi Diosta yupaychana wasipaj t'aqasqa, jinallataj llajtapajpis chaypa puraj ladompi kanqa. Uj ayllupaj t'aqasqa karqa, chay kikillantaj sayt'unman kanqa.

⁸ Kay jallp'aqa Israelpi kamachejpaj kanqa, ajinamanta aylluytaqa mana ujtawan kamachejkunaqa ñak'arichenqankuchu, astawampis israelita runasman ayllusninman jina jallp'ata qonqanku.

Kamachejqa imaynatachus ruwanampaj

⁹ Señorqa kay jinata nin: Kaykamalla kachun Israelpi kamachejkuna! Ama astawan mana allin kajta ruwaychejchu, nitaj mana kajmantapis orqhoychejchu. Cheqa kajman jina puriychej, cheqantataj imatapis ruwaychej. Amaña runasniymanta jallp'ankuta suwaychejchu. Noqa Señor kaytaqa kamachini.

¹⁰ Pesanata, jinataj medidatapis cheqanta apaychachaychej.

¹¹ Granosta midinapaj, jinataj yaku imas kajta midinapajpis uj rejlla kachun. Iskay pachaj iskay chunkayoj litrosniyoj kaj homer nisqa yachanapajqa allin kanqa. Uj bato nisqa ch'uwa imas, uj homermanta chunkaman t'aqasqas ujnin kaj kanan tiyan. Uj efa nisqa granostataj, uj homermanta chunkaman t'aqasqamanta ujnin t'aqa kanan tiyan.

¹² Uj kaj medinataj kay jina kanqa: Iskay chunka gerasqa ninakun, chunka ujniyoj gramosniyoj siclowan. Sojta chunka siclostaj ninakun uj minawan.

¹³ Kay jinata ofrendastaqa ruwanayki tiyan: Trigosniykita, chantá granosniykita oqharikuspaqa sojta chunka t'aqasman t'aqanki. Chaykunamantataj uj t'aqata ofrendata qonki.

¹⁴ Ajinallatataj aceiteta jap'ispapis pachajman t'aqanki, chaymanta uj t'aqa kajta ofrendata qonki. Aceiteqa bato nisqawan midikun. Chunka batos aceiteqa, iskay pachaj iskay chunkayoj litrosniyoj homerwan ninakun, chaytaj coro nisqa kikin.

¹⁵ Sapa iskay pachaj ovejasmantaqa, uj sumaj ovejata, Israelpi sumachej pastosninmanta t'aqankichej. Kaytaj kanqa granosmanta ofrendaspaj. Ruphachispa jaywanapaj, allinyakuy ofrendasta jaywanapaj ima, juchasmantapis jaywanapajwan kanqa. Chayta noqa Señor kamachini.

¹⁶ Tukuy israelitas kay jallp'api kaj chhika kay ofrendata Israelpi jatun kamachejpaj qonankupuni tiyan.

¹⁷ Kay tukuy kamachejpa ruwanasnenqa kay imas kanqanku: Uywasta qonan tiyan ñak'aspa jaywanampaj, poqojkunamanta atikojta, vinota, killa rikhuriypi, samakuna p'unchaykunapi. Israel llajtapi tukuy qochukupaj ima. Jinallataj juchamanta jaywana kajtapis, poqoj imasmanta, ofrendata, uywasta wañuchispa ninapi ruphachispa jaywanasta, allinyakuna jaywanasta, Israelpa juchasnin pampachasqa kanampaj.

Pascua fiesta

¹⁸ Señorqa kay jinata nin: Ñaupaj killamanta ñaupaj p'unchaypi, waka tropamanta uj mana iman imanasqa uña wakata jaywanki, chaywan Diosta yupaychana wasita llimphuchanki.

¹⁹ Sacerdotetaj uj chhikan yawarta jap'enqa jucharayku jaywasqa uywamanta, chantá Diosta yupaychana wasi punkuspa sayantasninta ch'ajchuykonqa, altarpa tawantin esquinasninta, ukhu patioj punkusnintawan.

²⁰ Kikillantataj ruwanki chay killamanta qanchis p'unchaynimpi, pichus mana reparaspa, chayri ch'aukiyasqa kaspa juchallikojpaj. Ajinata Diosta yupaychana wasitaqa llimphuchanki.

²¹ Ñaupaj kaj killamanta, chunka tawayoj p'unchaynimpi, qankunaqa Pascua fiestata qallarinkichej, qanchis p'unchay junt'ata mana levadurayoj t'antata mikhunkichej.

²² Chay p'unchaypitaj jatun kamachejqa, uj uña wakata pay kikimpa juchasninmanta jaywanqa, jinallataj tukuynin aylloj juchasninmanta ima.

²³ Qanchis p'unchaypeqa qanchis waka uñasta, qanchis corderostawan sapa p'unchay q'olachispa Señorman jaywanan tiyan. Chay uywastaj mana imasnin imanasqas kanan tiyan. Chantapis sapa p'unchay uj chivota jucharayku jaywana tiyan.

²⁴ Sapa uj waka uñapaj, sapa uj corderopajtaj, uj ofrenda iskay chunka kilos granoswan, kinsa litros khuskanniyoj aceitetawan yapaykuspa.

Ramadas nisqa fiesta

²⁵ Ramadas nisqa fiestapis qanchis kaj killamanta chunka phishqayoj p'unchaynimpi ruwakun, chaypacha jatun kamachejqa jaywanasta qanchis p'unchay junt'ata qonqa jucharayku kikin jaywanasllatataj, ñaupajta mashkhatachus chay chhikallatataj qonqa. Uywasta ñak'aspa ninapi ruphachispa jaywana uywastapis, imaynatachus Pascuapi qorqa ajinallatataj, chantá poqoymanta, aceitemantapis kikillantataj.