Ezequiel 44 - Qheshwa Biblia DC

Inti llojsimuy punku

¹ Runaqa, inti llojsimuy ladomanta Diosta yupaychana wasiman yaykuna jawa punkunejman pusawarqa.

² Chaypitaj Señor niwarqa: Kay punkoqa wisq'asqapuni kanqa. Mana kichakonqachu, nitaj runapis chaynintaqa yaykonqachu, imaraykuchus Israelpa Señor Diosnin chayninta yaykun, wisq'asqallapuni kanqa.

³ Jatun kamachejlla chayninta yaykumuyta atin, chaypi tiyarikuspa Señorpa ñaupaqempi t'antata mikhonqa. Corredor punkunta yaykumonqa, chaynillantataj llojsenqa.

Pikunachus Diosta yupaychana wasiman yaykunanmanta

⁴ Chaymanta runaqa wichaynej punkuman Diosta yupaychana wasej ñaupajninta pusawarqa. Chaypi qhawarerqani, Señorpa k'anchaynin Señorpa wasimpi junt'aykusqata. Pampakamataj k'umuykorqani.

⁵ Señortaj niwarqa: Runa, allinta sonqoykipi unanchay, ñawisniykiwantaj allinta qhawariy, ningrisniykiwantaj allinta uyariy qanman parlasusqayta, Diosta yupaychana wasipaj ima kamachiykunatachus qosqayki chaykunata, imaynatachus purichina kanqa chaykunatawan. Allinta yachay, pikunachus Diosta yupaychana wasiman yaykonqanku, llojsenqankutaj chaykunata.

⁶ Mana kasukoj Israel ayllumantaj sutiypi ninki: Señorqa kay jinata nin: Israel aylloqa kaykamalla kachun, tukuy millay imasta ruwanaykichejqa.

⁷ Qankuna Diosta yupaychana wasiyta ch'ichichankichej, sonqompi, aychampipis mana circuncidasqa waj llajtayoj runasta wasiyman pusaykuspa paykuna chaypi kanankupaj, t'antayta, wirasta yawartawan jaywanawankupaj. Tukuy chay millay imasta ruwaspa tratoyta pampachankichej.

⁸ Wasiypi imachus ruwana kajtaqa mana qankunaqa junt'ankichejchu, astawampis waj llajtayoj runasta churarqankichej chay imasta ruwanankupaj.

⁹ Señorqa kay jinata nin: Mayqen waj llajtayoj runa sonqompi, aychampipis mana circuncidasqa runaqa wasiyman mana yaykonqachu, nillataj Israel ayllu ukhupi kashanku chay waj llajtayoj runaspis.

¹⁰ Israel ayllu noqamanta karunchakuspa llulla diosninkuta yupaychajtinku chay levitas juchallikojkunaqa juchasninkumanta paganqanku.

¹¹ Paykuna wasiyta punkuta qhawanankupaj churasqas kanqanku. Wasiypi imachus ruwanasta ruwanqanku. Paykuna ninapi ruphachispa jaywana uywasta ñak'anqanku, chantá runas jaywanasta apamonqanku chaykunatapis. Paykunaqa runaspaj imastapis ruwanankupaj churasqas kanqanku.

¹² Paykunaqa israelitaspa nisqankuta ruwasharqanku juchallichinankupaj, qhasi dioskunasninkuta yupaychaspa. Chayrayku chay juchankumanta paganqanku. Noqa Señormin kaytaqa nini.

¹³ Manaña noqaman qayllamuwanqankuchu sacerdote jina nisqasniyta ruwanankupaj, nillataj llimphu imas niymampis qayllanqankuchu, nitaj aswan llimphu imasniymampis, astawampis tukuy p'enqakuyninkuta millay ruwasqasninkumanta apanqanku.

¹⁴ Paykunataqa wasiypi imaschus sapa kuti ruwana kanqa chaykunata ruwanankupaj churasaj, waqaychanankupajtaj. Imaschus wasiypi ruwana kanqa chay tukuyta ruwanqanku.

Sacerdotesmanta

¹⁵ Aswampis, Sadocpa mirayninmanta levitasmanta kaj sacerdotes wasiypi imachus ruwanasta waqaycharqanku, Israel ayllu noqamanta karunchakusharqanku chaypacha. Chayrayku paykunaqa ñaupaqeyman qayllamuspa imatapis ruwapuwanqanku. Chantá ñaupaqeypipuni kanqanku untu wirasta, yawartawan jaywanawankupaj, nin Señorqa.

¹⁶ Paykuna Diosta yupaychana wasiman yaykumonqanku, mesaymantaj qayllamonqanku sirvinawankupaj, kamachisqasniytataj waqaychanqanku.

¹⁷ Ukhu patio punkusta yaykuytawan linomanta kaj p'achasta churakonqanku. Paykunaqa ukhu patio punkuspi sirvishaspa millmamanta ruwasqa p'achasta mana churakonqankuchu, nillataj Diosta yupaychana wasi ukhupi imasta ruwashaspapis.

¹⁸ Chantapis umasninkupi linomanta p'antaswan umankuta mayt'ukonqanku, jinallataj linomanta ruwasqa calzoncillosta churakonqanku, manataj jump'ichej imastapis chumpillikonqankuchu.

¹⁹ Jawa patioj jawankama, maypichus runas kashanqanku chayman llojsinankupajqa, ima p'achaswanchus Diosta yupaychana wasipi runastapis ruwarqanku chay p'achasta orqhokonqanku, Diosta yupaychana wasipi kashanku chay wasispitaj saqenqanku, waj p'achastataj churakonqanku, runasta chay llimphu p'achaswan ama llimphuchanankupaj.

²⁰ Uma chujchasninkutataj mana q'alata k'uturakonqankuchu, chujchasninkuta mana wiñachikonqankuchu, astawanqa patallamanta k'utukonqanku.

²¹ Mana mayqen sacerdotespis, patio ukhuman yaykunan kashajtin vinota ujyanqanku.

²² Mana casarakonqankuchu saqerasqa warmiwan, chayri viuda warmiwampis. Manachayqa Israel ayllumanta kaj doncella warmiwan, chayri uj sacerdotej viudanwan.

²³ Sacerdotesqa aylluyman cheqan kajta yachachenqanku, mana cheqan kajtapis. Jinallataj ajllanan tiyan llimphu kajta millay kajtapis.

²⁴ Paykunataj quejasta jueces jina cheqanchanqanku kamachisqasniyman jina. Jatun qochuku p'unchaykunasniypi leyesniyta junt'anqanku, jinallataj kamachisqasniytapis. Samakuna p'unchaykunasniytataj allintapuni junt'anqanku.

²⁵ Wañusqa runasman ama qayllanqankuchu ama ch'ichichakunankupaj. Jinapis sichus maman kanman, chayri tatan, chayri qhari wawan, chayri warmi wawan, wauqen, chayri mana qosayoj panan, chay jina kajtenqa atin qayllaspa aysariyta.

²⁶ Jinata ruwaspaqa llimphuchakunan tiyan, chaymantapis qanchis p'unchaytawanraj suyakonqanku.

²⁷ Ukhu patioman yaykuspa, Diosta yupaychana wasipi imatapis ruwaspa junt'anampaj chay p'unchayqa, chay juchanmantaqa uywata wañuchispa jaywanqanku. Noqa Señormin kaytaqa kamachini.

²⁸ Paykunapaj chayaqe kanqa. Noqalla paykunajta chayaqenku kani. Israelpeqa ama ima kapuykunatapis qonkichejchu. Noqa paykunaj kapuynin kani.

²⁹ Juchamanta jaywasqasta, uywa ñak'asqata ima paykuna mikhonqanku. Tukuy imasta Israel runakuna noqaman qowasqankoqa paykunajta kanqa.

³⁰ Sacerdotesqa, tukuy ima ñaupajta poqoj mikhunasta, chantá tukuy apamuwasqasniykita mikhonqanku. Jinallatataj sacerdoteman qonkichej, t'antata ruwakuspaqa, aswan allin kajninta, ajinamanta wasisniykichejpi ashkha bendiciones mana tukukuyniyoj kanqa.

³¹ Sacerdotesqa mana mikhonqankuchu, kikinmanta wañusqa uywaj aychanta, nitaj lijrayojkunaj wañusqaspa aychantapis, nillataj ima millay animalpa wañuchisqantapis.