Ezequiel 42 - Qheshwa Biblia DC

Diosta yupaychanaman k'askasqa wasis

¹ Chaymanta runaqa jawa patioman orqhomuwarqa, wichaynejman, chantá wichay ladopi kaj wasisman pusaykuwarqa. Chaykunataj ukhu patioman qhawarisqas ruwasqas karqanku, Diosta yupaychanaman k'asqasqa.

² Wichay ladopi kaj punku ñaupaqenqa sayt'unman phishqa chunka metrosniyoj karqa, anchonmantaj iskay chunka phishqayoj metros.

³ Ukhupi patioman yaykunaqa chunka metros ancho karqa, ujnin ladopitaj jawa kaj patioman rina kajqa rumiswan churasqa karqa. Chay wasis kasharqanku, ujkunaqa uj chimpapi, ujkunatajrí uj chimpapi; chay wasistaj kinsa metrosniyoj karqanku.

⁴ Wasispa ñaupaqempi uj corredor karqa anchonman phishqa metrosniyoj. Sayt'unantaj phishqa chunka metrosniyoj, chayninta ukhuman yaykuna karqa. Wasispa punkusnintaj wichaynejman qhawarisqas karqanku.

⁵ Altospi kaj wasistaj aswan k'ullkus karqanku, chaupi altopi kajkunamantapis, imaraykuchus sapa altomanta jina aswan ithiykusqas karqanku urapi kajkunamantaqa.

⁶ Kinsa altosniyoj karqanku, mana patiopi kaj wasis jina sayantasniyojchu, manachayqa patapi kaj wasisqa aswan k'ullkus karqanku, chaupipi kajkunamanta urapi kajkunamantapis.

⁷ Patio jawapi kaj wasisqa, iskay chunka phishqayoj metrosniyoj karqanku.

⁸ Chay wasispa ñaupaqempi kaj patio perqataj, iskay chunka phishqayoj metros sayt'unman karqa jawa pationejman. Corredortaj tukuynimpi phishqa chunka metrosniyoj karqa.

⁹ Inti llojsimuy ladopi kaj punkoqa, chay wasis urampi karqa, jawa patiomanta yaykunapaj.

¹⁰ Inti llojsimuy lado patio perqaj sayt'unnejpeqa wasis karqanku, ñaupaqempitaj corredorniyoj.

¹¹ Chay wasispa corredornintaj, wichay ladopi kaj wasispata jinallataj karqa, sayt'unmampis jinataj anchonmampis. Jinallataj yaykunasniyoj, llojsinasniyoj karqa.

¹² Uray ladopi kaj cuartosman chayanapajqa corredor qallarikushan chaynejpi punku karqa, chaytaj karqa inti llojsimuy cheqa perqaj chimpampi, chayninta chay wasisman yaykuna karqa.

¹³ Runaqa niwarqa: Wichay ladopi kaj wasis, jinallataj uray ladopi kaj wasispis, mayqenkunachus patio wisq'asqapi kashanku chay wasisqa Diospaj t'aqasqas kanku. Señorman qayllaykoj sacerdotesqa chay wasispi jaywasqa imasta mikhunku. Paykunaqa chayllapitaj Diosman jaywasqa imasta churanku, uywa wañuchisqasta, jucharayku jaywasqasta ima, imaraykuchus chay cheqaqa llimphumin.

¹⁴ Sacerdotes, Diosta yupaychana wasiman yaykuspaqa jawa patioman mana llojsinankuchu tiyan, ima p'achawanchus ruwasharqa chay p'achanta mana orqhokuspaqa, imaraykuchus chay p'achaqa Diosman t'aqasqamin. Maypichus runas kashan chayman rinankupajqa waj p'achata churakunanku tiyan.

Diospa wasis patiota puraj cantonmanta midin

¹⁵ Chay runaqa Diosta yupaychana wasej ukhu jallp'asninta midiyta tukusqantawan, jawaman pusawarqa inti llojsimuy lado punkunejta. Chanta Diosta yupaychana wasej jawa muyuynimpi jallp'anta midiyta qallarerqa.

¹⁶ Medina soqosowan inti llojsimuy ladota miderqa, iskay pachaj phishqa chunka metrosniyoj karqa.

¹⁷ Chantá midillarqataj wichay ladota, iskay pachaj phishqa chunkayoj metrostaj midikorqa.

¹⁸ Chantá uray ladotañataj miderqa, iskay pachaj phishqa chunkayoj metrosllataj midikorqa.

¹⁹ Chantá inti yaykuy ladotañataj midillarqataj, chaypis iskay pachaj phishqa chunkayoj metrosllataj midikorqa.

²⁰ Tawantin ladosta miderqa. Diosta yupaychana wasi jallp'aqa, muyuynimpi sapa ladoman iskay pachaj phishqa chunkayoj metros perqawan muyuykusqa karqa, chay perqawan ch'ichi imasmanta t'aqasqa karqa.