Ezequiel 4 - Qheshwa Biblia DC

Ezequielqa ch'ajwa kananmanta willan

¹ Qantaj runa, uj adobeta jap'iy ñaupaqeykiman churaykuy, chay adobepitaj Jerusalén llajtata ruway.

² Chaymanta soldadoswan muyuykuchiy, maqanakupaj kaj armaswantaj, perqawan; jinallataj pakakunapaj larq'atawan muyuynimpi ruway, runaswan muyuykusqa llajta jina rikukunampaj.

³ Chaymanta uj p'alta fierrota oqhariy, chaytataj qanta llajtawan t'aqasunaykichejpaj churay perqapis kashanman jina. Qantaj llajta cheqanman qhawarispa maqanakunapaj jina sayaykuy. Kayqa israelitaspaj uj señal jina kanqa.

⁴ Qantaj lloq'emanta puñuykunki, Israel aylloj juchasnintataj pataykiman churaykukunki. Mashkha p'unchaykamachá puñunki chaykamataj, chay aylloj juchasninta pataykiman apanki.

⁵ Mashkha watatachus paykuna juchallerqanku chay chhika p'unchaykunata noqa rikuchiyki, chaytaj ruwakun kinsa pachaj isq'on chunkayoj p'unchaykuna. Chay chhika p'unchaykunata Israel aylloj juchanta apanki, chayri uj p'unchayta sapa uj wata juchanrayku.

⁶ Chay tiempo junt'akojtinkamataj, pañamantañataj puñuykunki. Judá aylloj juchantañataj pataykiman churaykukunki tawa chunka p'unchay junt'akunankama, uj p'unchayta sapa wata juchallisqanmanta.

⁷ Chantá Jerusalén cheqaman kutirispa sumajta qhawarinki enemigoswan muyurisqata. Makiykita llinkhatakuytawan Jerusalempa contrampi sutiypi parlanki.

⁸ Waskhawan wataykusqayki ama purajman tijraykachakunaykipaj mashkha p'unchaytachus ñak'arinayki kanqa chayta junt'anaykikama.

⁹ Jap'iy uj chhika trigota, cebadata, habasta, lentejasta, mijo nisqata, avenatawan. Chaykunata uj ch'illamipi pejtuykuy, chaykunamantataj t'antata ruwakuy. Chayta mikhunki lloq'emanta puñuykusqa kashaspa, kinsa pachaj isq'on chunkayoj p'unchaykuna junt'akunankukama.

¹⁰ Señalasqa horapi sapa p'unchay mikhunki khuskan librata.

¹¹ Yakutapis señalasqa horallapitaj sapa p'unchay ujyanki khuskan litrota.

¹² Mikhunaykeqa kanqa cebadamanta ruwasqa tortillata. Chay tortillata runa aka ninapi chayachinki, tukuy Israel runakunaj rikunankuta.

¹³ Chantapis Señorqa nillarqapuni: Israelpa wawasnenqa ajina ch'ichi t'antata mikhonqanku, maymanchus wijch'usaj chay llajtakunapi.

¹⁴ Noqa payman kuticherqani: Way, Señorníy. Manapuni jayk'ajpis kausayniypeqa ima millaytapis llankharerqanichu. Mana jayk'ajips pay kikinmanta wañusqa uywaj aychanta mikhuykunichu, nitaj millay animalespa sarwichasqan aychasta, nitaj millay aychatapis llamiriyta yachanichu, nispa.

¹⁵ Chayman pay kutichiwarqa: Noqa niyki, ajina kajtenqa, runa akaj cuentanmantaqa waka kharata enqhakuy, t'antaykita chayachikunaykipaj.

¹⁶ Chaymanta niwarqa: Jerusalempi mikhunata pisichisaj. Mikhunaqa pakasqa kanqa, llakikuspa mikhonqanku, yakupis tupusqa kanqa, manchachikuspataj ujyanqanku.

¹⁷ Yakoqa paykunapaj pisiyanqa, jinallataj mikhuypis, ujkuna ujkunaqa may manchasqas qhawanakonqanku. Juchasninkurayku kausayninkupi chinkayman renqanku.