Ezequiel 38 - Qheshwa Biblia DC

Gogpa contrampi willaykuna

^1-2 Señorqa parlamuwaspa niwarqa: Runa, Magog jallp'aman qhawariy. Sutiypi Gogpa contrampi parlay, payqa Mesecpata, Tubalpatawan kuraj kamachejnin.

³ Sutiypi niy: Señorqa kay jinata nin: Qanqa Gog, Mesecpata, Tubalpatawan jatun kamachejnin kanki. Sut'inta nisqayki, noqa contraykipi sayarini.

⁴ Noqa t'unaykusqayki, quijadasniykiman ganchosta churaspataj orqhomusqayki, chantá tukuy soldadosniykita, caballosta, chay sumachaj p'achallisqa caballospi purej soldadostawan. May ashkha soldados, manchay armasqas, espadasniyoj, tukuy laya escudosniyojtaj kanku.

⁵ Persia llajtamanta kajkuna, Cusmanta kajkuna, Futmanta kajkunapis paykunawan kanqanku, tukuyninkutaj escudosniyojkuna, fierro monterayojtaj renqanku.

⁶ Gomermanta kaj soldados, Bet-togarmamanta, chantá aswan wichaynejmanta kajkuna, jinallataj ashkha qanman ujchakojkuna ayllus rillanqankutaj.

⁷ Wakichikuy, armaykukuytaj, qan, chantá tukuy qanwan kashanku chay tukuy ashkha soldadoswan. Qan paykunata kamachinki.

⁸ Kaymanta ashkha watasman waturisqa kanki. Chay tiempo pasajtintaj kamachisqa kanki ch'in pampaman tukuchisqa karqa chay jallp'aman rinaykipaj. Chay llajtayoj runasqa espadawan wañunankumanta salvasqas karqanku, ashkha llajtasman ch'eqerasqamanta orqhomuspa Israelpa lomasninman tantaykusqas karqanku. Chaypitaj tukuyninku sonqo tiyasqas tiyakushanqanku.

⁹ Qantaj chay jallp'aman chayaspa phuyu jina junt'aykunki, ashkha tropa soldadosniykiwan ashkha llajtasmanta qanwan tantakorqanku chaykunawan ima.

¹⁰ Señorqa kay jinata nin: Chay tiempospi sonqoykiman sajra palabras jamusonqa, mana allin yuyaykuna ima.

¹¹ Chayrayku ninki: Chay mana kutichikuy atej llajtaj contrampi wicharisaj. Mana imata yuyarispa tukuy sonqo tiyakushanku chay runaspa contranta risaj. Tukuyninku paykunaqa mana perqawan muyuykuchisqapichu tiyakunku, mana punkusniyoj kanku, nitaj soldadosninkupis kanchu.

¹² Kapuyninkuta qhechumusaj, suwamusajtaj. Ch'inyachisqa jallp'api watejmanta sayarichisqa llajtaspi runas tiyakushanku chaykunata t'unaykamusaj, waj jallp'asmanta orqhomusqa kanku chay runastawan. Paykunaqa ashkha uywasta mirachishanku, jallp'asniyojtaj kanku. Chantapis tukuy kay pachapi kaj jallp'aj chaupimpi tiyakushanku, ajinata nispa sonqoykipi yuyaychakunki.

¹³ Sabá nisqa llajtayoj runas, chantá Dedanmanta kajkunapis, jinallataj Tarsis llajtayoj qhatu apaykachajkuna, chantá tukuy jatun kamachejkuna tapurisonqanku: Suwajchu jamorqanki? Chaypacha soldadosniykitapis tantaykunkichu tukuy imasta qhechuranaykipaj, qolqeta, qorita, chantapis uywasta, jallp'asta waj kapuykunatawan ashkha imasta qhechuraspa apakapunaykipaj?, nispa.

^14-15 Chayrayku runa, sutiypi Gogman parlay, niytaj: Señorqa kay jinata nin: Jamoj p'unchaykunapi, Israel aylluy mana imamanta llakiyniyoj tiyakushajtin, llajta cheqaman puririmunki, jallp'aykimanta wichaynejpi kaj karu jallp'asmanta llojsimuspa, ashkha llajtasmanta kaj ashkha soldadosniykiwan. Paykunaqa caballospi may atiyniyoj ashkha soldados kanku.

¹⁶ Llojsimunkitaj Israel aylluypa contrampi, yana phuyus jina jallp'ata urphuykuspa. Chay qhepa p'unchaykunapi pusamusqayki jallp'aypa contrampi, waj jallp'asmanta kaj runas qannejta noqata rejsinawankupaj, llimphu kayniyta noqa rejsichisaj ñaupaqenkupi chaypacha.

¹⁷ Atiyniyoj Señorqa kay jinata nin: Qanmanta noqa sut'inchacherqani ñaupa tiempopi Israelpi kay kamachisniy profetaspa siminnejta. Paykuna parlarqanku ñaupa tiempospi, qanta noqa paykunaj contrankupi yaykuchimusunayta.

Gogpa jasut'iynin

¹⁸ Señorqa nin: Israel aylloj contrampi Gog jatarimonqa chay p'unchaykunapi k'ajaj phiñakuyniy phatanqa.

¹⁹ Noqa parlani k'ajaj phiñakuyniypi juraspa kay imas kananta: Chay jamoj p'unchaykunapi Israel jallp'api jallp'a kharkatitiy kanqa.

²⁰ Chaypacha mar qochapi kaj challwas, tukuy kaj p'isqos, campopi kaj animales, pampaspi qhatatikuspa purej kataris, tukuy jallp'antimpi kaj runastaj ñaupaqeypi kharkatitenqanku. Jatuchaj lomas urmanqanku, tukuy perqastaj thuñikuspa pampaman urmanqanku.

²¹ Tukuynin alto lomasnimpi Gogpa contranta wañurachejkunata wajyasaj nin Señorqa. Paykunapura wauqepura wañunachikonqanku.

²² Paykunata onqoywan jasut'isaj, yawar apaywantaj. Paypa patanman, soldadosniypa patanmantaj paywan kaj ashkha llajtasmanta kaj runasnimpa patanman ima manchay sinch'i parata urmachimusaj. Rumista, chejchi parata, ninawan azufrewan parata parachimusaj. Noqa Señormin kaytaqa nini.

²³ Ajinamanta sut'inchasaj may jatun kasqayta, nitaj llimphu kasqayta. Rejsisqa kasaj ashkha runaspa ñaupaqempi, yachanqankutaj noqa Señor kasqayta.