Ezequiel 36 - Qheshwa Biblia DC

Israelqa jamoj p'unchaykunapi allimpi kanqa

¹ Runa, qan sutiypi parlay Israelpa kaj orqosman kay jinata: Israelpi kaj lomasnin Señorpa parlasqanta uyariychej.

² Atiyniyoj Señorqa kay jinata nin: Enemigosqa Israelpa wiñaypaj kaj orqosnin noqanchejman qosqaña kanku, nispa parlashanku.

³ Chayrayku paykunamanqa sutiypi parlay, niytaj: Atiyniyoj Señorqa kay jinata nin: Tukuy llajtas qankunata jap'ispa t'unasorqachej, paykunataj qankunata jap'ikapusorqachej; waj llajtasmanta kajkunataj qankunamanta alqochakunku.

⁴ Chayrayku Israelpa alto orqosnin, atiyniyoj Señorpa nisqanta uyariychej: Señorqa kay jinata nin, Israelpa lomasninman, alto orqosninman, wayq'osninman, vallesninman, q'ara pampaman tukuchisqa jallp'asman, saqerasqa Israelpa llajtasninman ima, paykunataqa qayllampi kaj llajtaj suwarqanku, alqochakorqankutaj.

⁵ Chayrayku, Atiyniyoj Señorqa kay jinata nin: Waj llajtaspa contrantaqa nina jina k'ajashaj phiñakuyniypi parlani, astawanqa tukuynin Edom llajtaj contranta. Paykunaqa tukuy sonqonkumanta kusikuspa jallp'ayta jap'ikaporqanku, manchay qhesachaywantaj camposnimpi kaj imasta suwakaporqanku.

⁶ Chayrayku Israelpa jallp'anmanta sutiypi parlay: Sutiypi lomasman, jatun lomasman, wayq'osninman, vallesninmantaj kay jinata niy: Señorqa kay jinata nin: Qankunamanta munakuspa phiñakuyniypi parlani waj llajtayoj runas qankunata ñak'arichisusqanmanta.

⁷ Chayrayku Atiyniyoj Señorqa kay jinata nin: Makiyta oqharispa jurani, muyuyniykichejpi kaj llajtasqa p'enqaypi rikhurenqanku.

⁸ Qankunataj, Israelpa orqosnin, sumaj sach'asta wicharichinkichej, Israel ayllupajtaj sumajta poqochipunkichej, imaraykuchus aylluypa kutimpunan p'unchayqa qayllamushanña.

⁹ Noqa qankunawan kashani, imaraykuchus qankunaman kutirikampusaj, chayrayku llank'asqas, tarpusqastaj kankichej.

¹⁰ Qankunapi Israelpa ayllusninta ashkhaman mirachisaj. Llajtaspi runas tiyakonqanku. Thuñisqa llajtastaj watejmanta ruwasqas kanqanku.

¹¹ Qankunapi runasta ashkhata miraykuchisaj. Miranqanku, wiñanqankutaj. Ñaupa tiempospi may chhikachus kaj kanku, chay jina ashkhallataj kanqanku. Qankunataj ñaupa karqankichej, chaymantapis aswan allintaraj tiyakunkichej. Yachankichejtaj noqa Señor kasqayta.

¹² Israelpa orqosnin, Israel llajtaypa runasnin qankunapi purikonqanku. Paykunataj qankunamanta dueños kanqanku, qankunataj paykunaj jap'isqan kankichej, manañataj wawasqa jayk'ajpis qampi wañonqankuñachu.

¹³ Señorqa kay jinata nin: Qankunataqa nisunkichej: Runasta wañuchej kasqaykichejta, wawasta mikhuykoj kasqaykichejta ima.

¹⁴ Chayrayku, manaña runasta mikhunkichejchu, manataj jallp'aykichejpi kaj wawastapis wañuchinkichejñachu, nin Señorqa.

¹⁵ Manataj waj llajtakunaj sajra parlayninkuta uyarinkichejñachu. Qantaj manaña sajra nisusqankuwan ñak'arinkiñachu, imaraykuchus aylluykipi wawas manaña wañonqankuchu. Noqa Señormin kaytaqa nin.

^16-17 Señorqa parlamuwaspa niwarqa: Runa, Israel aylloqa jallp'ampi tiyakushaspa, millay ch'ichi imasta ruwaspa kausayninta ñaupaqeypi ch'ichichakorqa, killa yawarnimpi kashaj warmi jina.

¹⁸ Chayrayku paykunaj patankuman k'ajaj phiñakuyniyta urmachimorqani, imaraykuchus paykunaqa chay jallp'api runasta wañucherqanku, qhasi mana kaj dioskunata yupaychaspataj ch'ichicharqanku.

¹⁹ Chaynejta paykunataqa waj llajtasman wijch'orqani, waj jallp'aspi ch'eqerasqastaj rikhurerqanku. Millayta kausasqankumanta, sajra ruwasqankumantawan ajinata jasut'erqani.

²⁰ Wijch'usqas kasqankumanta, mayqen llajtasmanchus paykuna chayarqanku chaykunapi santo sutiyta p'enqaypi rikhuricherqanku, imaraykuchus chay waj llajtaspi kaj runas nerqanku: Kay runasqa Señorpa ayllunmanta kanku, paypa jallp'anmanta llojsimorqanku, nispa.

²¹ Israel ayllu waj llajtasman rispa santo sutiyta p'enqaypi rikhurichisqanmanta sonqoy nanawarqa.

²² Chayrayku Israel ayllumanta niy: Señorqa kay jinata nin: Imatachus ruwasaj chaytaqa mana qankuna Israel aylluraykuchu ruwasaj, manachayqa santo sutiyrayku ruwasaj; imaraykuchus waj llajtaspi sutiyta p'enqaypi rikhuricherqankichej.

²³ Qankuna waj llajtaspi santo sutiyta ch'ichicharqankichej. Noqataj kunanqa jatun sutiyta chay llajtaspa rikuynimpi llimphuchasaj. Chay llajtastaj rejsiwanqanku noqa Señor kasqayta, qankunanejta sutiy llimphu kasqanta rikuchisaj chaypacha, nin Señorqa.

²⁴ Qankunataqa noqa waj llajtasmanta orqhomusqaykichej, tukuy jallp'asmanta tantaykuspataj jallp'aykichejman kutirichisqaykichej.

²⁵ Llimphu yakuwan mayllasqaykichej, tukuy ch'ichi kausayniykichejmanta llimphuchasqas kankichej. Tukuy qhasi mana kaj dioskunamantapis t'aqasqaykichej.

²⁶ Mosoj sonqota qosqaykichej, qankuna ukhupitaj mosoj espirituta churasaj. Qhechusqaykichejtaj chay rumi sonqoykichejta, llamp'u sonqotataj qosqaykichej.

²⁷ Espirituyta qosqaykichej. Leyesniyman jina purichisqaykichej, kamachisqasniytataj junt'ankichej.

²⁸ Ñaupa tatasniykichejman qorqani chay jallp'apitaj tiyakunkichej. Qankuna aylluy kankichej, noqataj Diosniykichej kasaj.

²⁹ Ama ch'ichichakunaykichejpaj noqa waqaychasqaykichej. Trigota poqochipusqaykichej, manataj ujtawan yarqhaywan ñak'arichisqaykichejñachu.

³⁰ Jinallatataj ashkha frutasta poqochipusqaykichej; campospipis mikhunaqa ashkha poqonqa, nitaj jayk'ajpis ujtawan naciones ñaupaqempi yarqhaywan tarikunaykichejpaj.

³¹ Chaypachataj, mana allin purisqaykichejmanta, sajra imasta ruwasqaykichejmantawan yuyarikunkichej. Qankuna kikiykichej sajra purisqaykichejmanta, mana allin imasta ruwasqasniykichejmantawan p'enqakunkichej.

³² Mana qankuna allin kasqaykichejraykuchu kaytaqa ruwani, nin Señorqa. Israel ayllu, allinta yachaychej, k'umuykuychej, p'enqakuychejtaj millayta purisqasniykichejmanta.

³³ Señorqa kay jinata nin: Noqa tukuy juchasniykichejmanta llimphuchasqaykichej chaypachaqa, llajtaspi ujtawan runas tiyakullanqankutaj. Thuñisqas kajtaj watejmanta ruwasqas kanqanku.

³⁴ Mana imayoj ch'usaj pampas karqanku chaykunataj llank'asqas kanqanku, chaynejta tukuy purejkuna rikunankupaj.

³⁵ Nenqankutaj: Kay ch'in pampaman tukuchisqa jallp'asqa, Edén huertamanña rijch'akunku. Kay llajtasqa thuñisqas, ch'inyachisqastaj, ch'usaj pampaman tukuchisqas karqanku. Kunantaj watejmanta sinch'i ruwasqaña, runaspis tiyakunkuña, nispa.

³⁶ Muyuyniykichejpi qhepakoj ayllus yachanqanku, t'unaykusqa karqanku, chay llajtasta noqa watejmanta sayarichisqayta. Ch'in pampaman tukuchisqa karqa chay jallp'apitaj noqa poqochisqayta. Noqa Señor parlani, ruwasajtaj.

³⁷ Atiyniyoj Señorqa kay jinata nin: Israel aylloqa mask'awanqaraj aswan imasta ruwapunaypaj. Chayrayku aswan ashkhata runasninta mirachisaj, ovejas miranku ajinata.

³⁸ Jatuchaj qhochukuspi jaywanapaj Jerusalenman ashkha ovejasta apaj kanku, chay kikinta ch'inyasqa karqa chay llajtasman ashkha runas junt'aykonqanku, yachanqankutaj noqa Señor kasqayta.