Ezequiel 35 - Qheshwa Biblia DC

Seir nisqa orqoj contrampi willaykuna

^1-2 Señor parlamuwaspa niwarqa: Runa, Seir orqonejman qhawariy, chantá contrampi parlay.

³ Sutiypitaj niy: Señorqa kay jinata nin: Seir orqo, noqa contraykipi sayarini. Jasut'isqayki, ch'impachata, thuñisqatataj saqerparisqayki.

⁴ Llajtasniykita t'unaykuspa ch'eqerachisaj, ch'in pampaman tukuchisqa qhepakunki. Chaypacha noqa Señor kasqayta yachanki.

⁵ Israel ayllupaj wiñay enemigon karqanki, paykunata may llakiypi kashajtinku maqaykorqankichej, juchasninkumanta jasut'isqa kashajtinku.

⁶ Chayrayku Señorqa nin: Noqa kausayniyrayku jurani, wañuyman jaywaykusqayki, wañuytaj qhatiykachasonqa, qanqa wañunapaj juchachasqapuni kanki, chayrayku wañoyqa qhatirisonqa.

⁷ Seir orqota ch'in pachata, thuñisqatataj saqerpayasaj, mana pitapis chayninta purejta saqesajchu.

⁸ Orqosniyki, lomasniyki, vallesniyki, wayq'osniyki ima ch'ajwapi espadawan wañurachisqaswan junt'a kanqanku.

⁹ Wiñaypaj ch'in pachata saqesqayki, llajtasniykipi manaña jayk'ajpis runas tiyakonqañachu. Chaypacha qankuna yachankichej noqa Señor kasqayta.

¹⁰ Kay jinata nerqanki: Iskaynin llajtas, chantá iskaynin jallp'aswan noqajta kanqanku. Señorpis chaypi kakushachun, noqapuni jap'ikapusaj.

¹¹ Chayrayku Señorqa nin: Imaynatachus Israel aylluta phiñakuywan, chejnikuywan ruwarqani, chay kikillantataj qantapis ruwasqayki. Qanta jasut'isqayki, chaypacharaj paykunaqa rejsiwanqanku pichus kasqayta.

¹² Chaypi yachanki uyarikusqayta, Israelpi kaj lomaspa contrampi kay jina sajrata parlasqaykita: Kay orqosqa saqerasqasña kanku, noqanchejman mikhurananchejpaj qopuwanchej, nispa.

¹³ Qankunaqa simiykichejta jatunmanta kicharerqankichej, contraypitaj ashkhata parlarqankichej. Chayta noqa uyarerqani.

¹⁴ Atiyniyoj Señorqa kay jinata nin: Qanta t'unaykojtiy tukuy kay pachapi runas kusikonqanku.

¹⁵ Israelpa chayaqen t'unaykusqa rikhurejtin qan kusikorqanki, chay kikillantataj qanta ruwasqayki: Seir jatun orqo thuñisqa kanki, ch'in pampaman tukuchisqataj, tukuynin Edom llajtantin. Chaypacha noqa Señor kasqayta yachanki.