Ezequiel 33 - Qheshwa Biblia DC

Qhawajpaj ruwanan

^1-2 Señorqa parlamuwaspa niwarqa: Runa, qan llajta masisniykiman kay jinata parlay: Sichus noqa maqanakuta uj llajtaman apachimuyman chayqa, chay llajtapi kaj runasta ajllaspa llajtata qhawanampaj churankuman.

³ Payta chay llajtaj contrampi soldados jamojta rikuspa, putututa waqachinman, llajta masisninmantaj willanman.

⁴ Sichus pillapis putututa waqajta uyarishaspa mana kasuta ruwanmanchu, enemigostaj yaykumuspa wañurachinman chayqa, pay kikin juchayoj kanqa.

⁵ Pututu waqajta uyarishaspa mana kasusqanrayku, paypuni juchayoj kanqa. Sichus kasukunman karqa chayqa, mana wañunmanchu karqa.

⁶ Sichus llajtata qhawajkuna, llajtaj contrampi soldados yaykumushajta rikuspa putututa mana waqachinmanchu chayqa, llajtapi runasqa mana willasqachu kanman, enemigotaj yaykumuspa mayqen runallatapis wañuchenqa chayqa, chay qhawajqa juchanrayku wañonqa, noqataj paymanta chay wañusqasmanta cuentata mañasaj.

⁷ Runa, noqa qanta churayki Israel aylluta qhawanaykipaj, palabrasniyta qanman qosqayki, qantaj ayllupi kaj runasman willanki, k'amirankitaj.

⁸ Sichus noqa juchasapa runata niyman: Sajra runa, cheqamanta wañunki, nispa. Qantaj mana reparachiwajchu sajra puriyninmanta chayqa, chay sajra runaqa juchanrayku wañonqa. Noqataj qanmanta chay wañojmanta cuentata mañasqayki.

⁹ Sichus qan juchasapa runata k'amiwaj sajra puriyninmanta kutirinampaj, paytaj mana kasukunmanchu chayqa, juchanrayku wañonqa. Qantaj kausayniykita salvanki.

Sapa uj pay kikinta qhawakunan

¹⁰ Runa, qan Israel aylluman niy: Qankunaqa kay jinata parlakunkichej: Mana kasukusqanchejqa, juchasninchejpis patanchejpi kanku, chaykunarayku kausayninchejpi tukukushanchejña, imaynata kausayta atisunmanri?, nispa.

¹¹ Paykunaman niy: Noqa Señorqa kausayniyrayku jurani: Mana munanichu juchasapa runa wañunanta, astawanqa munani sajra puriyninmanta kutirimuspa kausananta. Israel runakuna, sajra puriyniykichejmanta kutirimpuychej, kutirimpuychej, imaraykutaj wañuwajchejri?, nispa.

¹² Qantaj runa, aylluykipi kaj runasman niy: Uj allin kausayniyoj runachus juchallikunman chayqa, ñaupajta mana allinta purisqanrayku jasut'imanta ayqenqachu. Jinallataj juchasapa runa, ñaupa sajra kausayninta saqenqa chayqa, mana ñaupajta juchapi purisqannejta wañonqachu. Cheqa runachus juchallikonqa chayqa, mana ñaupajta allin purisqanchu kausachenqa.

¹³ Sichus noqa cheqa kausaypi purej runata nisaj: Cheqamanta qanqa kausanki, nispa; paytaj cheqa kaynimpi atienekuspa sajra imasta ruwanman chayqa, tukuy cheqan ruwasqasninta noqa qonqasaj, astawampis chay sajra ruwasqanmanta wañonqa.

^14-15 Sichus juchapi purej runata noqa nisaj: Cheqamanta qan wañunki; paytajchus juchamanta kutirikunman, allinta purinman cheqan imasta ruwaspa, chantapis prenda jap'isqanta, suwakusqasnintataj kutichipunman, manañataj sajra imasta ruwanmanñachu, aswampis kausanampaj churasqa kamachisqaman jina purinman chayqa, cheqamanta kausanqa, manataj wañonqachu.

¹⁶ Chay ñaupaj jucha ruwasqasnimpis mana yuyarisqachu kanqa. Allin imasta, cheqa kajtataj ruwan chayqa, cheqatapuni kausanqa.

¹⁷ Chantá aylluykipi kaj runasqa nenqanku: Señorpa ñannenqa mana cheqanchu. Astawampis paykunaj puriyninkumanqa mana cheqampichu.

¹⁸ Cheqampi kaj runachus allin kaj ruwanasninta saqespa sajra imata ruwanman chayqa, chay mana allinta ruwasqanrayku, wañonqa.

¹⁹ Sajra runatajchus, sajra kausayninmanta t'aqakuspa allinta cheqa kajman, jinataj ruwanman chayqa, chay cheqa kajta ruwasqannejta kausanqa.

²⁰ Qankunataj ninkichej: Señorqa mana cheqa kajman jinachu ruwashan, nispa. Noqataj qankunata israelitas sapa ujniykichejta ruwasqasniykichejman jina cheqanchasqaykichej.

Jerusalén llajtaj urmasqan

²¹ Wijch'usqa kasqaykichejmanta chunka watanman, chunka killampi phishqa p'unchay kashajtin, uj runa Jerusalenmanta ayqespa jamorqa. Paytaj willawarqa, llajtaqa enemigonchejpa makinmanña urmasqanta.

²² Chay ayqemoj runa chayamorqa chay ñaupaj tardenta, Señorqa makinwan llankhaykuwarqa makinta patayman churaykuwaspa. Q'ayantimpajqa chay runa chayamunampaj Señorqa simiyta kichariwarqaña, manataj opañachu karqani.

Jerusalén llajtaj juchasnin

^23-24 Señorqa parlamuwaspa niwarqa: Runa, Israelpa jallp'an ch'in pampaman tukuchisqa karqa chaypi tiyakoj runasqa kay jinata parlashanku: Abrahamqa sapallan karqa, chaywampis kay jallp'ata jap'ikaporqa. Noqanchejtaj ashkha kanchej, chayrayku kay jallp'aqa noqanchejpataña.

²⁵ Chayrayku paykunaman niy: Señorqa kay jinata nin: Qankunaqa aychata yawarnintinta mikhunkichej, lantista yupaychankichej, runastataj wañuchinkichej. Jallp'atapis jap'ikapuyta yuyallankichejtajchu?

²⁶ Espadapi atienekuspa millay imasta ruwankichej, runa masiykichejpa warmisninwan qhenchachakunkichej, chay jinachu jallp'ataqa jap'ikapuyta yuyankichej?

²⁷ Paykunaman niy: Señorqa kay jinata nin: Noqa kausayniyrayku jurani, pikunachus chay ch'in pampaman tukuchisqa llajtapi kashanku chaykunaqa espadawan wañurachisqas kanqanku. Campo purejkunatataj millay animalesman oqoykunankupaj qosaj. Pikunachus qaqas ukhupi, rumi jusk'uspi kashanku, chaykunaqa onqoywan wañuranqanku.

²⁸ Jallp'ataqa ch'in pampaman tukuchisaj, sumaj thuñisqamantaj. Chinkachisajtaj atienekushan chay atiyninta. Israelpa lomasnenqa ch'impacha qhepakonqa, manataj ima runapis chayninta purej kanqachu.

²⁹ Tukuy millay sajra imasta ruwasqasninkumanta chay jallp'ata thuñisqata, ch'in pampamantaj tukuchisaj, chaypacha yachanqanku noqa Señor kasqayta.

³⁰ Runa, llajta masisniyki perqa k'uchuspi, chantá wasi punkuspi ima qanmanta alqochakusunku, paykunapura purajmanta parlanakunku kay jinata: Jamuychej uyarisunchej, ima willaychus Señormanta jamun chayta, nispa.

³¹ Ajinata aylloyqa jamuspa ñaupaqeykipi tiyarikun yachasqankuman jina, aylluypis kanman jinataj parlasqasniykita uyarinankupaj. Manataj uyarisqankuta ruwankuchu. Simisnillankuwan misk'ita parlanku, sonqonkupitaj qolqej qhepanta purishanku.

³² Qantaj paykunapajqa munakuymanta takipoj jinallaña kanki, sumaj arpawan, k'acha kunkawan takipojnin jinalla. Parlasqasniykita uyarinku, manataj junt'ankuchu.

³³ Chay tukuywampis tukuy chay willasqaqa junt'akonqañapuni. Chaypachataj yachanqanku, paykuna ukhupi uj willay profeta kasqanta.