Ezequiel 29 - Qheshwa Biblia DC

Egipto llajtaj contrampi willaykuna

^1-2 Chunka watamanta, chunka kaj killapi, chunka iskayniyoj p'unchay kashajtin, Señorqa parlamuwarqa niwarqataj: Runa, Egipto llajtaj reynin faraompa contranta parlay, chantá tukuy Egiptoj contrantawan.

³ Kunanqa kay jinata parlay: Señorqa kay jinata nin: Egipto llajtapi kamachej faraón, sierpe, mayusniyki chaupipi winkhuraj, nishankitaj: Nilo mayoqa noqajta, noqa ruwarqani, nispa. chayrayku noqaqa contraykipi sayarini.

⁴ K'akiykimanta ganchowan jap'iykusqayki, mayusniykipi kaj challwastataj qhashqa qarasniykiman k'askaykuchisaj, chantá mayuyki ukhumanta tukuy challwaswan k'askaykusqata orqhomusqayki.

⁵ Chantá challwasniykiwan k'askaykusqata ch'innejman wijch'usqayki. Qanqa chay pampapi choqarayanki, manataj pipis p'ampaykunasumpaj aysarisonqachu. Campopi kaj millay animalesman, phawaykachaj aycha mikhu p'isqosmantaj mikhuykusunankupaj jaywaykusqayki.

⁶ Egiptopi tukuy tiyakojkunaqa noqa Señor kasqayta yachanqanku. Qantaj, Israel aylluypajqa uj soqoso jinalla karqanki.

⁷ Paykunaqa qanman k'askaspa qanmanta jap'ikusorqanku, qantaj pakikuspa paykunaj lijrasninkuta p'akerpayacherqanki, qampi atiykukusojtintaj qan p'akikuspa urmarpacherqanki.

⁸ Chayrayku Señorqa kay jinata nin: Egipto llajta, contraykipi espadata apamushani, runasniykita, uywasniykita ima wañurachisaj.

⁹ Egipto jallp'aqa ch'inyachisqa kanqa, ch'in pampaman tukuchisqataj. Chantá runas yachanqanku noqa Señor kasqayta, Qantaj nerqanki: Nilo mayoqa noqajta, noqa ruwarqani, nispa.

¹⁰ Chayrayku, kunanqa contraykipi sayarini, mayusniykej contrantataj. Egipto jallp'ataqa ch'in pampaman tukuchisaj, Migdol nisqamantapacha Asuán nisqakama, chantá Etiopiaman mojonniyki kashan chaynejkama.

¹¹ Chay jallp'apeqa mana runaspis, nitaj uywaspis saruykonqañachu. Tawa chunka watas junt'ata manapuni pi runapis tiyakonqachu.

¹² Egipto jallp'ataqa ch'inyachisqa llajtasmantapis aswan ch'inman tukuchisaj. Tawa chunka watas junt'ata, tukuy thuñisqa llajtamantapis aswan thuñisqaraj kanqa, runasnintataj waj llajtasman, tukuy kay pachapi llajtasmantaj ch'eqerachisaj.

¹³ Chantá Señorqa kay jinata nin: Tawa chunka watas junt'akojtin Egipto llajtayoj runastaqa, mayqen llajtasmanchus ch'eqeracherqani chaykunamanta tantaykamusaj.

¹⁴ Presochasqa egipcio runasta kutirichimpusaj, Egipto jallp'api maynejpichus nacerqanku chay kikin Patros jallp'ankuman. Chaypitaj qhesachasqa nación ruwakonqa.

¹⁵ Tukuy llajtasmanta aswan pisipaj qhawasqa llajta kanqa, manañataj jayk'ajpis waj llajtamanta patapichu sayarenqa. Noqa pisi atiyniyojman tukuchisaj mana waj llajtasta munayninman jina apaykachanampaj.

¹⁶ Israel aylloqa Egipto llajtaman manaña atienekonqañachu. Chay jinapi yachanqanku egipcio runaspi yanapata mask'ayqa mana allinchu kasqanta. Chaypacha noqa Señor kasqayta yachanqanku.

^17-18 Iskay chunka qanchisniyoj watamanta, ñaupaj killampi ñaupaj p'unchay kashajtin, Señor parlamuwarqa kay jinata: Runa, Babiloniaj reynin Nabucodonosorqa soldadosninta Tiro naciompa contranta kachaykorqa. Maqanakorqankutaj ch'ajwapi uma q'arakuyta, wasa llikhikuyta, chaywampis payqa, nitaj soldadosnimpis, ni ima pagota, Tiro llajtayojkunawan maqanakusqampeqa jap'erqankuchu.

¹⁹ Chaynejta Señorqa kay jinata nin: Egipto jallp'ataqa Babiloniamanta rey Nabucodonosorman qopusaj, kapuyninkutataj qhechuranqa, chay qhechusqanwantaj soldadosninman paganqa.

²⁰ Egipto jallp'ata payman qopusaj Tiro llajtaj contranta maqanakusqanmanta, imaraykuchus chaytaqa noqapaj ruwapuwarqa. Ajinata Señorqa nin.

²¹ Chay p'unchaypi, Israel aylluymanqa atiyta qosaj, Ezequiel, qanqa paykunaman sut'inta parlanki. Chaypacha noqa Señor kasqayta yachanqanku.