Ezequiel 24 - Qheshwa Biblia DC

T'impoj mankamanta yachana

^1-2 Isq'on wataña kashajtin, chunka kaj killamanta chunka p'unchay uraykusqampi, Señorqa parlamullawarqataj kay jinata: Runa, kay p'unchayta qelqaykuy, imaraykuchus kay p'unchaypi Babiloniamanta reyqa Jerusalempa contrampi jatarimun.

³ Kay mana kasukoj aylluman parlay uj rijch'anachinawan. Noqaj sutiypi kay jinata niy: Uj mankata nina chhaqaman churaykuy, yakutataj chay mankaman jich'aykuy.

⁴ T'unasqa sumachaj mat'a aychata tantaykuspa chay mankaman churaykuy: Piernamanta, wasamantawan, chantapis sumachaj ajllasqa tullustawan.

⁵ Tukuyninmanta aswan sumaj ajllasqa ovejata ñak'ay, uranmantaj ashkhata llant'ata enqhaykuy, chayman mankaqa sumajta t'impunampaj chay tullus sumajta chayanankama.

⁶ Señorqa kay jinata nin: Way, kay runa wañuchi llajtamanta! Millay kharkachasqa mankaman rijch'akun, chay kharkantaj mana mayllana jina. Qan orqhoy chay t'unasqa aychata ujmanta uj, ama ujta puchuchispa.

⁷ Kay llajtaj yawar jich'asqanqa juntasqa kashan. Sumaj llusq'o rumis patapimin jich'asqa kashan, manataj jallp'a patapichu qhatasqa kanampajqa.

⁸ Noqa chay yawartaqa llosq'o rumis patapi p'achanta saqesaj, ama jallp'awan chinkachisqa kanampaj. Chay jinamanta phiñakuyniyta patampi urmachimuspa, cheqanchanampa, ruwakunampaj.

⁹ Señorqa kay jinata nin: Way kay runa wañuchi llajtamanta! Noqapis llant'awan enqhaykusaj.

¹⁰ Qantaj ashkha llant'ata apamuy, chantá ninata jap'iykuchiy. Aychaqa sumajta chayachun caldon ch'akinankama, tullus ruphaykunankamataj.

¹¹ Chaymanta ch'usaj mankataqa nina brasa patapi churaykuy, chaypi cobreqa pukayanankama ruphanampaj, ch'ichi kajtenqa llimphuchakunankama, ajinapi ch'ichin chinkarinankama.

¹² Chay tukuywampis manapuni llojsinchu chay chhika ch'ichichakusqanqa, ninawampis manapuni llojsinchu.

¹³ Jerusalén, chay jina millay ch'ichichakusqasniykita llimphuchasuyta munarqani, qantaj manapuni llimphuchakorqankichu, llimphoqa kanki maypachachus noqa phiñakuyniyta qampi thasnusaj chaypacha.

¹⁴ Noqa Señor chaytaqa nini, junt'akonqataj. Mana qhepaman kutirisajchu, manataj khuyakusajchu, nitaj llakirikusajchu. Ruwasqasniykiman jina, purisqasniykiman jinataj jasut'isqayki, nin Señorqa.

Ezequielpa warmin wañun

^15-16 Señorqa parlamuwaspa niwarqa: Runa, ujllata qhechusqayki, pitachá astawan munakunki chayta. Qantaj ama yuyarikunkichu, nitaj waqankichu, nitaj waqayniykipis surumusuchunchu.

¹⁷ Ch'inllamanta phutikuy, amataj llakiy p'achata churakuychu wañusqayoj runa jinataqa. Umaykita mayt'ukuy, ujut'asniykitataj churaykukuy. Umaykitapis ama p'antawan llakiyniyoj jinataqa qhatakuychu, amataj llakiypi kashaspa mikhuna imasta mikhuychu.

¹⁸ Paqarinmanta runaswan parlarqani, chay tardentaj warmiy wañuporqa. Q'ayantinrí, Señorpa kamachiwasqanman jina ruwarqani.

¹⁹ Chaymanta runasqa tapuriwarqanku: Allinta willawayku, ima niyta munawayku chay jinata ruwaspari?

^20-21 Noqataj nerqani: Señorqa parlamuwaspa niwarqa: Sutiypi Israel aylluman parlay, wasiyta mana kasuta ruwasajchu, chhikatapuni qankuna qhawayta munankichej chayta, chay jinatapuni munakunkichej chayta, jatunchakuyniykichejpa k'anchayninta. Wawasniykichej, warmi wawasniykichejwan Jerusalempi saqerqankichej chaykunaqa, espadawan wañurachisqas kanqanku.

²² Qankunapis imaynatachus noqa ruwani, chay kikillantataj ruwankichej: Uyaykichejtaqa ama qhataykukunkichejchu llakisqa runa jinaqa, nitaj mikhunkichejchu llakikuy p'unchaykunapi mikhuna kajta.

²³ Uyaykichejta mayt'ukunkichej, ujut'astapis churakunkichej. Manaña llakikunkichejchu, nitaj waqankichejchu. Manachayqa sajra ruwayniykichejrayku tukukunkichej, ujkuna ujkunawantaj waqapayanakunkichej.

²⁴ Qankunapajqa Ezequiel uj señal kanqa. Imastachá pay ruwarqa, chay jinallatataj qankunapis ruwanaykichej tiyan. Chay imas ruwakojtintaj yachankichej noqa Señor kasqayta.

²⁵ Kunanqa runa, Israelpa kallpanta qhechusaj, chaytaj Diosta yupaychana wasi, chaypi payqa chhikata kusikun, chhikatapuni qhawayta munan, maytataj munakun. Qhechurallasajtaj qhari wawasninta, warmi wawasnintawan.

²⁶ Chay p'unchaypi atipakuyta atejqa, willarisoj jamonqa.

²⁷ Chay p'unchaypi qalluyki phaskarakonqa, chaypacha atipakojwan parlayta atinki. Chaywantaj qanqa paykunapaj uj señal kanki, chaypacha paykunaqa yachanqanku noqa Señor kasqayta.