Ezequiel 23 - Qheshwa Biblia DC

Samariawan Jerusalenwanqa juchasapas

^1-2 Señorqa parlamuwaspa niwarqa: Runa, iskay warmis uj mamayojlla karqanku.

³ Paykunataj Egiptopi qhenchachakorqanku, chaypi chuchusninkuta llankhachikorqanku, doncella kayninkuta chinkacherqanku.

⁴ Kuraj kajpa sutenqa Ahola karqa. [Chaytaj Samaria kashan]. Sullk'antaj Aholiba sutiyoj karqa. [Chaytaj Jerusalén kashan]. Paykunawan casarakorqani, nacechipuwarqankutaj qhari wawasta, warmi wawastawan.

⁵ Aholaqa makiypi kashaspa qhenchachakuspa purerqa, maytataj munapayarqa qayllampi kaj asirio runasta.

⁶ Paykunaqa puka p'achawan p'achallisqas karqanku, tukuyninku kamachejkuna, kurajkunataj karqanku. Chantapis tukuyninku munapayanapaj jina k'acha waynas, caballospi purejkunataj karqanku.

⁷ Aholaqa asiriokunamanta aswan ajllasqa kajkunawan qhenchachakorqa. Paykunaj tukuy qhasi mana kaj dioskunasninkuta yupaychaspa ima qhenchachakorqa.

⁸ Egiptopi qhenchachakusqanmantapacha mana qonqakunachu, imaraykuchus sipas kashajtin egipcio waynas paywan puñuykorqanku, paykunataj doncella chuchusninta t'ojpispa qhenchacharqanku uj qhencha warmiman tukuchinankukama.

⁹ Chayrayku, paytaqa asirio waynasman jap'icherqani, mayqenkunatachus paypis munapayarqa chayman.

¹⁰ Chay waynastaj paytaqa p'enqayninta rikorqanku. Chaymantataj qhari wawasninta, warmi wawasnintapis qhechuraspa paytaqa espadawan wañucherqanku. Tukuy warmis rikorqanku chay jinamanta wananankupaj.

¹¹ Aholiba ñañampis kay tukuyta rikorqa. Chay tukuywampis astawanraj locayarqa. Ñañanmantapis astawanraj qhenchachakuypi purerqa.

¹² Paypis asirio qharista munapayallarqataj. Tukuy paykunaqa kurajkuna, kamachejkuna, maqanakojkuna, sumaj p'achayojkuna, caballospi purejkuna, tukuyninku munapayanapaj jina waynas karqanku.

¹³ Repararqani paypis ch'ichichakullasqantataj, ñañampa puriynillantataj qhatirisqanta.

^14-15 Payqa aswan ashkhata qhenchachakorqa: Rikorqa perqapi caldeo qharis pukawan pintasqasta, chumpisninku, uma p'antasninkupis coloresmanta karqa, tukuynin chay pintasqasta Babiloniapi chay kuraj kamachej runasman rijch'akorqanku, maypichus pay nacekorqa chay Caldea jallp'ayoj runasman.

¹⁶ Rikuytawankama paykunata munapayarqa, chanta Babiloniaman willaramojkunata kacharqa.

¹⁷ Ajinamanta Babiloniamanta qharis chayamuspa, paywan munakuypi puñorqanku. Ajinata paytaqa ch'ichicharqanku, paypis paykunawan ch'ichichachikullarqataj, sonqonqa chay qhariswan amichikorqa.

¹⁸ Chay jina sut'ita tukuypa rikunanta qhenchachakuyman qokorqa, ukhunta q'alallata rikuchikuspa. Chayrayku, paymanta millachikorqani, imaynatachus ñañamanta millachikorqani ajinata.

¹⁹ Astawan astawan qhenchachakullarqapuni, Egipto jallp'api sipas kashaspa sajra purisqanta yuyarikuspa.

²⁰ Egipciosta munapayaspa mayta locayarqa, chaykunaj munapayayninkutaj burrospata, caballospata jina karqa.

²¹ Qanqa, Aholiba, sipas kashajtiyki sajra purisqaykita llakirikuspa watejmanta yuyarikushanki, egipcio qharis chuchusniykita llujchiykususqankuta.

^22-23 Aholiba, chayrayku Señorqa kay jinata nin: Kunan sonqoyki millachikun, chay munapayasojkunataqa contraykipi jatarichisaj, tukuynejmantataj qampa contraykipi kachaykamusqayki: Babiloniamanta kajkunata caldeosta, Pekodmanta kajkunata, Soamanta, Coamanta ima, chantá asiriokunatawan; paykunaqa munapayanapaj jina sumachaj waynas, kurajkuna, jatun kamachejkunataj, maqanakunapaj atiyniyoj capitankunataj, paykunaqa tukuyninku caballospi purejkuna kanku.

²⁴ Contraykipi may ashkha soldados carretaspi jamonqanku, tukuynejmantataj muyuykusonqanku. Sumaj armasqastaj, fierro monterayoj, escudosniyojtaj, noqataj paykunaj makinkuman cheqanchasunankupaj atiyta qosaj, paykunaj leyninkuman jinataj cheqanchasonqanku.

²⁵ Phiñakuywan contraykipi tumpasqayki, paykunataj may sajrata ruwasonqanku. Senqaykita, ningrisniykitawan khuchusonqanku. Mirayniykimanta puchojkunataqa espadawan wañurachenqanku. Qhari wawasniykita, warmi wawasniykitawan jap'ikaponqanku, qanmanta puchojtataj ninawan tukuchenqanku.

²⁶ P'achasniykita lluch'usonqanku, k'achanchakuna imasniykitapis qhechusonqanku.

²⁷ Ajinamanta Egipto jallp'api munayniykipi purisqaykita, qhenchachakusqaykitawan chinkachisaj. Manataj egipciostaqa ujtawampis qhawarinkichu, Egiptomantataj mana jayk'ajpis yuyarikunkiñachu.

²⁸ Señorqa kay jinata nin: Chejnikorqanki chaykunaj makinman jaywaykusqayki, sonqoyki millachikorqa chaykunaj makinman jaywaykusqayki.

²⁹ Paykunaqa chejnikuywan qhawasonqanku. Llank'akuspa ruwakusqaykita jap'ikaponqanku, q'alapachallata mana imayojta saqerpayasonqanku. Qhenchachakuy juchaman qosqayki, ukhuykeqa sut'ipacha rikhukonqa, munayniykiman jina khuchiriopi purisqaykipis yachakonqa.

³⁰ Kay imasta qanwan ruwanqanku, chay jallp'aspi tiyakojkunaj qhepanta risqaykirayku, qhasi mana kaj dioskunasninkuta yupaychaspa ch'ichichakusqaykirayku.

³¹ Ñañaykej purinanta purerqanki. Chayrayku imayna vasomantachus payman ujyacherqani, chayllamantataj qanmampis ujyachisqayki.

³² Señorqa kay jinata nin: Ñañaykej ujyananmanta ujyanki, uj jatun vaso, ancho ukhutaj, alqochakuywan, qhesachaywantaj junt'a.

³³ Samaria ñañaykej vasonqa thuñiywan, t'unaykuywan junt'a kashan, chaywantaj machaykunki, nanasqataj qhepakunki.

³⁴ Tukuykunaykikama ujyanki, chaymanta t'unaykunki, chay k'analla t'unasqaswan chuchusniykita lleqherakunki. Noqa Señor kaytaqa parlani.

³⁵ Chayrayku noqa Señorqa nini: Noqamanta qonqasqaykirayku, wasanchawasqaykiraykutaj qan jasut'isqa kanayki tiyan, munayniykipi purisqaykimanta, qhenchachakuy juchaspi kausasqaykimantawan.

³⁶ Señorqa niwan: Runa, manachu Aholata, Aholibatawanqa sajrata ruwasqankumanta uyanchaspa juchachanki?

³⁷ Paykunaqa qhenchachakorqanku, makisninkutaj yawarwan ch'ichichasqas kashanku. Qhasi mana kaj dioskunasninkuta yupaychaspa wasanchawarqanku. Noqapaj wawasta nacechikorqanku, chay wawasninkutapis ninawan enqhaspa dioskunasninkuman jaywarqanku.

³⁸ Kaytawan paykuna ruwawarqanku: Chay p'unchaypi Diosta yupaychana wasiyta ch'ichicharqanku, samakuna p'unchayniytapis mana kasuta ruwarqankuchu.

³⁹ Wawasninkuta dioskunasninkuman ninapi ruphachispa jaywarqanku, chay kikin p'unchayllapitaj wasinkuman yaykuspa ch'ichicharqanku. Chayta ruwarqanku kikin wasiypi.

⁴⁰ Karu llajtasmanta qharista pusachimorqanku, paykunataj jamorqanku. Chaykunata munakuspa mayllakorqanku, ñawisninkuta jawikorqanku, walqasta churakuspa k'achachakorqanku, chay qharista jap'iqanankupaj.

⁴¹ Chanta sumaj k'acha wakichisqa puñuna patapi tiyaykukorqanku, mesapi mikhunata wakicherqanku. Chay patapitaj noqapaj t'aqasqa inciensoyta, aceiteytawan churarqanku.

⁴² Qhochukuta ruwajpa wasimpi ch'ajway uyarikorqa, chay runasqa, ch'innejpi tiyakojkuna tantakamojkuna karqanku. Paykunataj warmispa makisninkuman brazaletesta churarqanku, umasninkumantaj k'acha pillusta.

⁴³ Chanta, sonqoy ukhupi nerqani: Qhenchachakuypi payayasqa warmeqa, qhenchachakullanqapunichu?. Kay warmeqa qhenchakuy juchapi kaj qhariswan purillanqapunichu?

⁴⁴ Imaynatachus sajra puriyniyoj warmiman qharis jamunku, ajinata ch'ichi warmis Aholaman, Aholibamampis jamorqanku.

⁴⁵ Chayrayku, cheqanta kausaj qharisqa, qhenchachakuy juchaspi purej warmista, runa wañuchi warmistapis ruwasqankuman jina juchachanqanku. Qhenchachakoj warmis kanku, runa wañuchistaj.

⁴⁶ Chaymantataj Señorqa kay jinata nin: Noqa chay warmispa contrampi ashkha runasta tantaykamusaj, t'ukushajta saqenankupaj, suwanankupajtaj.

⁴⁷ Chay runasqa rumiswan ch'anqaspa wañurachenqanku, espadasninkuwantaj pasachenqanku. Qhari wawasta, warmi wawasnintawan wañurachenqanku, wasisninkutataj khanaykonqa.

⁴⁸ Noqa kay suyupi chay jina millay kausayta chinkachisaj. Chay jinamanta waj jallp'asmanta kajkuna ama chay millay kausayta yachaqakunankupaj.

⁴⁹ Chay iskayninku millay juchapi purisqasninkumanta jasut'isqas kanqanku, dioskunata yupaychaspa juchallisqankumantawan. Ajinapi, yachankichej noqa Señor kasqayta.