Ezequiel 2 - Qheshwa Biblia DC

Ezequielta Dios wajyan

¹ Niwarqataj: Qan, runaj wawan sayariy, parlasqayki, nispa.

^2-3 Parlamushawajtin, Diospa atiynin yaykuwarqa, sayarichiwarqataj, chantá uyarerqani chay parlamuwajta, niwarqataj: Runa, qanta kachasqayki israelitasman, mana kasukoj, noqaj contraypi sayarej aylluman. Paykunapis ñaupa tatasninku jinallataj kunan p'unchaykama contraypi sayarinku.

⁴ Wawasninkupis mana q'ewiy atina jina, rumi sonqostaj kanku. Paykunaman parlamunaykipaj qanta kachasqayki, kay jinata paykunaman niy: Señorqa kayta nin.

⁵ Kasusuchunkupis amapis, imaraykuchus oqharikoj runas kanku. Ajinamanta paykuna chaupipi uj profeta kasqanta yachanqanku.

⁶ Qanqa runa, paykunamanta ama manchachikuychu imata nisojtinkupis, khishkas chaupipi jina tarikuspapis; chayri atoj atoj chaupipi jina kashaspapis. Amapuni paykunaj parlasqankumanta manchachikuychu, amataj kharkaychu paykunaj ñaupaqenkupi, imaraykuchus contraypi oqharikoj ayllumin.

⁷ Qanqa palabrasniyta paykunaman willay, uyarisuchunkupis amapis, imaraykuchus paykunaqa contraypi manchayta oqharikojkuna kanku.

⁸ Qanqa, runaj wawan, astawan parlasusqayta allinta uyariy, amataj paykuna jinaqa mana kasukoj kaychu. Simiykita kichariy, mikhuytaj imatachus noqa qosqayki chayta.

⁹ Qhawarispataj rikorqani, noqaman uj makita aysarimushajta, chay kikimpitaj karqa uj k'uyusqa libro.

¹⁰ Ñaupaqeypi chay k'uyusqa librota kicharerqa. Chaytaj puraj uyampi qelqasqa karqa: Sonqo nanaywan, qhapariykunawan, ayqoykunawan ima.