Ezequiel 17 - Qheshwa Biblia DC

Uvas sach'awan, ankawan rijch'anachina

^1-2 Señorqa parlamuwarqa niwarqataj: Runa, Israel aylluman uj rijch'anachiwan parlay.

^3-4 Niytaj: Señorqa kayta nin: Uj manchay jatun anka Libanoman chayamorqa. Lijrasnenqa manchay jatuchaj, sayt'ustaj karqanku, tukuy laya color phurusniyojtaj. Uj cedro sach'aj puntanta jap'ispa, aswan jatun kaj ramanta k'uturara. Qhatojkunaj jallp'anman apaspa, uj llajtaman plantaykamorqa.

⁵ Chanta llajtamanta uj mujuta oqharispa, uj qhollisqa jallp'aman tarpuykorqa, ashkha yakuyoj mayu cantoman.

⁶ Mujumanta p'utumuspa, ashkha yurasniyoj ch'ampa uvas sach'a wiñarqa. Juch'uylla karqa, ramasnin anka ladoman wiñasharqa, saphisnintaj jallp'aman chinkaykusharqa. Uj uvas sach'amantaj tukorqa. Ramasnin q'erqeramorqa, uvas chhullchusta wiñaramorqa.

⁷ Waj anka kallarqataj aswan jatumpuni, jatuchaj lijrasniyoj, ashkha phurusniyojtaj. Chaypacha uvas sach'aqa anka ladoman, saphisninta, ramasninta ima wiñacherqa, ashkha yakuwan surk'usnin qarpasqa kanampaj.

⁸ Chantapis, sumaj jallp'aman plantasqa karqa, maypichus ashkha yaku karqa chaypi, chaypitaj sumajta wiñaspa poqonampaj, chantá k'acha uvas sach'amantaj tukunampaj.

⁹ Paykunaman noqaj sutiypi parlay: Kay sach'aqa mana allintachu wiñanqa. Manachu ankaqa saphisninta sik'iraspa, poqoyninta urmarachispataj, chay sach'ata ch'akerpayachenqa? Tukuy q'omer laphisnin ch'akiraponqa, pisi kallpallawan, pisi runasllawantaj saphinmanta sik'erqanku.

¹⁰ Kunanqa plantasqa kashan, chaywampis wiñanmanchu? Manachu inti llojsimuynejmanta wayra wayrarimojtin tukuynin ch'akiponqa? Arí, q'erqemunan kashajtin, pachampi ch'akiponqa.

^11-12 Señorqa parlamuwaspa niwarqa: Tapuriy kay mana kasukoj aylluta, yachankichu kay rijch'anachina ima niytachus munasqanta?, nispa. Chantá niytaj paykunaman: Babiloniaj reynin Jerusalenman jamorqa, reyniykita, chantá kamachejkunatawan jap'iraspa Babiloniaman aparqa.

¹³ Chanta reypa mirayninmanta uj kuraj churinta jap'erqa. Paywantaj juramentachispa tratota ruwarqa. Chay jallp'amanta atiyniyoj runastawan apakaporqa.

¹⁴ Chay jinamanta Judá reinoqa pisi atiyniyoj rikhurinampaj, manataj paypa contranta sayariyta atinampaj, astawampis tratota ruwasqanta waqaychaspa paywan khuska pachampi sayanampaj.

¹⁵ Chay reypa kuraj churintaj Babiloniapi reypa contranta jatarerqa, lantinta Egiptoman kacharqa, ashkha runasta, caballostawan apachimunanta mañaspa. Allinchu paypaj kanman, chay imasta ruwaspa atipakunmanchuri? Pichus tratota p'akejqa atinmanchu atipakuytari?

¹⁶ Noqa Señorqa, kausayniyrayku jurani, pichus reyman juramentota ruwasqanta qhesachajqa, paywan tratota ruwasqantapis p'akejaqa, Babiloniapi wañonqa, maypichus reyqa kamachinampaj tiyaykucherqa chay cheqapi.

^17-18 Maqanakuy ratopitaj faraonqa, mana jatun atiyninwan, nitaj runaswampis paytaqa yanapanqachu; ashkha runasta wañurachinapaj kanqa, chanta perqas ima muyuynimpi ruwakushajtin, imaraykuchus jurasqanmanta asiykukun, trato ruwasqanta p'akin, makinta ima jaywaspañataj kunan kay tukuy imasta ruwan. Chayrayku wañuymantaqa mana ayqenqachu.

¹⁹ Noqa Señorqa, kausayniyrayku jurani: Paywan juramentota ruwasqanmanta asiykukun, tratota ruwasqaytataj mana junt'anchu. Chayrayku paymanta cuentata mañasaj.

²⁰ Ch'ipasniyta payman choqaspa jap'isaj, Babiloniamantaj apasaj. Chaypitaj tukuy imata contraypi ruwasqanmanta cuentata mañasaj.

²¹ Maqankuypi aswan sumaj soldadosnin wañuranqanku. Chaykunamanta kausashaj puchojkunataj tawantin ladosman ch'eqerachisqas kanqanku. Chaypacha yachankichej noqa Señor parlasqayta.

²² Noqa Señor nini: Aswan jatun kaj cedroj puntanta p'akiraspa plantaykusaj, chantá aswan jatun kaj q'omer puntanta p'akirasaj. Chaytataj noqa kikiy plantaykusaj manchay jatun orqo pataman.

²³ Israelpi aswan jatun orqopi plantasaj. Chanta ramasnin may jinata thansarenqa, poqonqataj, manchay sumaj cedromampuni tukonqa. Tukuy laya animales llanthun urapi kakonqanku. Tukuy laya p'isqostaj ramasnimpi thapachakonqanku.

²⁴ Tukuynin sach'as kajkuna yachanqanku noqa Señor kasqayta, jatunchakoj sach'asta noqa urmachisqayta, juch'uypaj qhawasqa sach'atataj wiñachisqaytataj, q'omer sach'ata ch'akichisqayta, ch'akisqa sach'achatataj q'omeryachisqayta. Noqa Señormin nini, junt'asajtaj.