Ezequiel 13 - Qheshwa Biblia DC

Señorqa llulla profetasta juchachan

^1-2 Señorqa parlamuwarqa, niwarqataj: Runa, Israelpa profetasnimpa contranta sutiypi parlay. Chay paykuna sonqollamanta sut'inchanku chaykunaman niy: Señorpa palabranta uyariychej.

³ Señorqa kay jinata nin: Way, chay mana yuyayniyoj profetas, pay kikimpa espiritunman jina purinku, manataj imatapis rikunkuchu!

⁴ Profetasniykeqa, Israel, ch'inkunapi tiyakoj atojkunaman rijch'akunku.

⁵ Perqapi jusk'usman mana wicharerqankichejchu, ni perqatapis Israel aylloj muyuynimpi llajtata waqaychanampaj ruwankichejchu, maqanakuna p'unchaypi sinch'ita sayanampaj Señorpa p'unchaynin chayamojtin.

⁶ Mosqoypi jina rikuyninkoqa qhasi manakajlla. Sut'inchasqankutaj llullalla. Noqamanta sut'inchasqankuta ninku, noqataj paykunataqa mana kachamorqanichu. Parlasqasninku junt'akunanta suyanku.

⁷ Mosqoypi jina rikusqaykichejqa qhasi manakaj kanku. Profeta jina parlasqaykichejqa llullalla. Noqamanta parlasqaykichejta ninkichej, noqataj mana imatapis nerqanichu.

⁸ Chayrayku noqa Señorqa nini: Ch'auka imasta parlasqaykichejrayku, mosqoypi jina rikusqaykichej llullaslla kasqankurayku noqa contraykichejpi kani. Noqa Señor chaytaqa nini.

⁹ Makiyta oqharisaj, ch'auka rikuyniyoj profetaspaj, chantá llullastataj sut'inchanku, chay profetasta jasut'inaypaj. Israel aylluypa tantakuyninman mana yaykuyta atenqankuchu. Sutisninkoqa mana qelqasqachu Israel aylloj librompi. Mana Israelpa jallp'anman yaykonqankuchu. Chaypacha rejsiwanqanku noqa Señor kasqayta.

¹⁰ Arí, paykunaqa aylluyta ch'aukiyarqanku, tukuy imapis allillan rishan nispa, chaypachaqa mana jinachu kasharqa. Pillapis uj perqata sayarichinman, ujkunataj chay perqata unu t'uruwan lluch'arqanku chayman rijch'akunku.

¹¹ Niy ari, chay t'uruwan lluch'ajkunata chay perqaqa thuñikapunanta. Llojlla para jamonqa, rumi jina granizotaj chayamonqa, sinch'i wayrawan.

¹² Chay perqatajrí urmaykonqa. Chaypacha tapurisonqanku. Imanakuntaj chay t'uruwan churasqaykichejri?, nispa.

¹³ Chayrayku noqa Señorqa nini: K'ajaj phiñakuyniypi sinch'ita wayrachimusaj. Manchay phiñakuy sinch'ita parachisaj, rumi jina granizotataj urmachimusaj, sinch'i phiñakuyniywan chinkachinaypaj.

¹⁴ Unu t'uruwan yurajyachisqaykichej perqata urmachisaj. Cimientosnin rikhurinankama pampachasaj. Arí, perqaqa urakama urmaykonqa, qankunataj chay t'unaykusqay chaupipi wañunkichej. Chaypacha yachankichej noqa Señor kasqayta.

¹⁵ Tukuy phiñakuyniyta chay perqapi samarichisaj, chay perqata yurajyachejkunapiwan. Runastaj nenqanku: Perqaqa manaña kanchu, t'uruwan chay lluch'ajkunamantapis nillataj ujpis kanchu.

¹⁶ Israelpa profetasnin manallataj kanchu, pikunachus mosqoypi jina llulla rikusqankuta Jerusalenman willasharqanku, tukuy imapis allillan rishan nispa, manataj cheqamantaqa jinachu kasharqa. Noqa Señor chaytaqa nini.

Sut'inchaj warmista Señorqa juchachan

¹⁷ Kunanqa runa, aylluykipi kaj warmispa contrampi uraykuy, paykunaj sonqonkuman jinalla sutiypi parlanku chaykunata.

¹⁸ Niy paykunaman: Señorqa kay jinata nin: Ay qankunamanta, runasta mask'aspa purejkuna, layqanapaj uma suk'unasta sirajkuna tukuy runa makinwan churakunampaj, uma mayt'unasta ruwajkuna, juch'uykuna, paya warmispis churakunankupaj. Ajinata runasta jap'inkichej. Yuyankichejchu aylluypi atinaykichejta, runasta kausachiyta wañuchiytataj munayniykichejman jina?

¹⁹ Qankunaqa, aylluy ukhupi p'enqaypi rikhurichiwankichej, uj jich'i cebadarayku, uj juch'uy t'antaraykutaj kausanampaj karqa chay runata wañuchispa, wañunan karqa chay runatataj kausachispa. Ajinata aylluyta ch'aukiyankichej llullata kasusqanrayku.

²⁰ Chayrayku, noqa Señorqa nini: Noqa chay layqanapaj mayt'unasta ruwasqaykichejpa contrampi kani, chaykunawan runasta p'isqosta jina jap'irankichej. Noqa makisniykichejmanta paykunata kacharichisaj. Chantá p'isqosta jina kacharisaj phawarinankupaj.

²¹ Uma mayt'unasniykichejta llik'iraspa, makisniykichejmanta paykunata kacharichisaj. Manañataj ujtawan makisniykichejman urmanqankuchu. Chaypacha qankuna rejsiwankichej noqa Señor kasqayta.

²² Qankunaqa llullirioswan cheqa kausaypi kaj runasta manchachinkichej. Noqaqa mana munarqanichu chay jinata ruwaytaqa. Astawanqa, sonqochankichej sajra sonqoyoj runasta, umachankichejtaj ama t'aqakunankuta sajra puriyninkumanta, ajinamanta noqa paykunata ama kausachinaypaj.

²³ Chaymanta qankunaqa manaña mosqoypi jina llulla rikusojta rikunkichejchu, nitaj llulla imasta sut'inchankichejchu. Noqa qankunaj atiyniykichejmanta aylluytaqa salvasaj. Qankunataj rejsiwankichej noqa Señor kasqayta.