Ezequiel 12 - Qheshwa Biblia DC

Ezequiel wijch'usqa kanankumanta willan

^1-2 Señor parlamuwarqa, niwarqataj: Qan runa, mana kasukoj runas chaupipi tiyashanki. Ñawisniyoj kanku, manataj rikunkuchu. Ningriyoj kanku, manataj uyarinkuchu. Mana kasukoj runas kanku.

³ Chayrayku, qan runa, tukuy imata wakichikuy, ch'innejman rikunankuta llojsinaykipaj. Tukuypa rikunanta chaupi p'unchayta wasiykimanta llojsispa waj cheqaman ripuy. Ichapis ajinamanta mana kasukoj runas kasqankuta reparakonqanku.

⁴ Chaupi p'unchayta, tukuy rikushasojtinku, tukuy imasniykita oqharispa qharqosqa runa jina ripuy. Jinallatataj tardempi tukuypa rikunanta qharqosqa runa jina llojsipuy.

⁵ Chantá tukuyninkoj rikunanta perqapi uj jusk'uta kichariy, chaynintataj llojsinki.

⁶ Llaqhayaykojtintaj tukuyninkoj rikunanta q'epiykita oqhariykukuy. Uyaykita qhatakuy ama jallp'ata rikunaykipaj. Chaytaj Israel ayllu reparanampaj uj señal kanqa.

⁷ Noqa q'epichakorqani Señorpa kamachiwasqanman jina. P'unchaytaj q'epiyta q'epiriykukuspa llojserqani, qharqosqa runapis kayman jina. Tardenejtataj perqapi uj jusk'uta allaspa kicharerqani. Laqhaykojtintaj tukuyninku qhawashawajtinku, chay imasniyta lijrariykukuspa llojserqani.

^8-9 Q'ayantintaj Señorqa parlamuwaspa niwarqa: Runa, mana kasukoj Israel aylloqa, manachu tapurisunki imatachus ruwashasqaykita, imatá ruwashankiri?, nispa.

¹⁰ Sutiypi paykunaman parlay: Kay sut'inchayqa Jerusalempi kuraj kajpaj, chantá kay jallp'api tiyakunku chay tukuy israelita runakunapajwan, nispa.

¹¹ Paykunaman niy: Noqa señal jina churasqa kani, imachus jamushan chaykunamanta willanasuykichejpaj. Imaynatachus noqa ruwarqani, kikillantataj qankunapis ruwankichej, imaraykuchus jap'iraspa apasqas kankichej.

¹² Kuraj kamachejniykeqa, imatachus apakunan kajta lijrariykukonqa, laqhayajtintaj perqata jusk'onqanku chaynejta llojsenqa, uyanta qhataykukuspa ama pi payta rikunampaj, nitaj paypis jallp'ata rikuyta atinampaj.

¹³ Noqa ch'ipayta paypa patanman choqaykamusaj, chaywan jap'isqa rikhurenqa. Chantá Babiloniaman apachisaj, caldeospa jallp'anman, chay jallp'ata mana rikonqachu, chaypitaj wañonqa.

¹⁴ Muyuynimpi payta waqaychajkunataqa tawantin ladosman ch'eqerachisaj, jinallataj soldadosnintapis. Cuchillowan paykunata qhatiykachasaj.

¹⁵ Jinata waj jallp'asman, waj llajtasmantaj wijch'urajtiy, noqa Señor kasqayta rejsiwanqanku.

¹⁶ Ujkunata paykunamanta ayqechisaj, ch'ajwamanta, yarqhaymanta, onqoykunamanta ima, maymanchá renqanku chay nacionespi imaymana ruwasqanku p'enqaykunata willakunankupaj. Rejsiwanqankutaj noqa Señor kasqayta yachanankupaj.

Waj jasut'imantañataj willakun

^17-18 Ujtawan Señorqa parlamuwarqa, niwarqataj: Runa, manchariywan kharkatitispa mikhuy, yakuykitataj may llakiywan ujyay.

¹⁹ Chay jallp'api tiyakoj runasman, Jerusalempi tiyakojkuna israelitasman ima noqamanta niy: T'antankuta may manchachikuywan mikhonqanku, yakutataj llakikuywan mancha manchalla ujyanqanku. Jallp'asniykichejta t'ajrasman tukuchisqas kanqa, mana ima poqojtaj. Chay llajtapi tiyakojkuna sajrata kausasqankurayku chayqa jina kanqa.

²⁰ Tukuynin llajtas runasniyoj kajkunaqa t'unasqas kanqanku, jallp'ataj mana imayoj t'ajra pampa qhepakonqa. Chaypacharaj qankunaqa noqa Señor kasqayta rejsiwankichej.

^21-22 Señorqa parlamuwarqa, niwarqataj: Israelitas imatataj chay nisqankuwan niyta munankuri: P'unchaykuna pasakapushanku, profetaj sut'inchasqantaj mana junt'akushanchu nispari?

²³ Paykunaman niy ari: Señorqa nin ama chay nisqaqa ujtawampis Israelpi parlachunchu. Nillaytaj paykunaman, profetaman mosqoypi jina rikhurisqan junt'akunampaj p'unchayqa qayllamushanña.

²⁴ Israel ayllu ukhupi, mosqoypi jina llulla rikuykuna, nitaj llulla sut'inchaykunapis kanqañachu.

²⁵ Imaraykuchus noqa Señormin parlasaj, palabraytaj junt'akonqapacha. Mana kasukoj ayllu, qankunallataj chayta rikunkichej. Noqa parlasaj, nisqaytataj junt'asaj. Noqa Señormin chayta parlani.

^26-27 Señor parlamuwarqa, niwarqataj: Runa, Israelmanta kaj runakunaqa nishanku: Kay profetaj mosqoypi jina rikusqanqa, unaymantaraj junt'akonqa, unay tiempopi junt'akunampaj kayqa sut'inchan, nispa.

²⁸ Chayrayku paykunaman niy: Señorqa kay jinata nin: Palabrasneyqa mana unaymantachu junt'akonqa, imatachus nisaj chayqa junt'akonqapacha. Noqa Señor chaytaqa nini.